Kajal Aggarwal: బాలయ్య కొత్త పేరు బయటపెట్టిన చందమామ - కాజల్ ‘బంతి’ పిలాసఫీని గుర్తుచేసుకుంటున్న ఫ్యాన్స్

'భగవంత్ కేసరి' సినిమాతో బాలకృష్ణ, కాజల్ అగర్వాల్ తొలిసారిగా కలిసి నటిస్తున్నారు. ఈ మూవీ ట్రైలర్ లాంచ్ ఈవెంట్ లో కాజల్ బాలయ్యను కొత్త పేరుతో పిలవడం నందమూరి అభిమానులను దృష్టిని ఆకర్షించింది. 

కాజల్ అగర్వాల్ (Image Credit: X)

వెండితెర మీద అలరించే హీరోలను వారి అభిమానులు వివిధ పేర్లతో ప్రేమగా పిలుచుకుంటూ ఉంటారు. టాలీవుడ్ సీనియర్ హీరోల్లో ఒకరైన నందమూరి బాలకృష్ణ ఫ్యాన్స్ కూడా అలానే పిలుచుకుంటారు. సినిమాల్లో ఆయన అద్భుతమైన నటనకు మారుపేరుగా 'నటసింహం' అని, 'యువరత్న' అని.. బాక్సాఫీస్ రికార్డులను తిరగరాసే 'గాడ్ ఆఫ్ మాసెస్' అని, 'బాక్సాఫీసు బొనాంజా' అని కొనియాడుతుంటారు. ఆయన మీదున్న అభిమానాన్ని చాటుకోడానికి 'జై బాలయ్య' అనే స్లోగన్ ఇస్తుంటారు. అయితే ఇప్పుడు హీరోయిన్ కాజల్ అగర్వాల్ బాలయ్యకు ఓ కొత్త పేరు పెట్టింది. 

బాలకృష్ణ కథానాయకుడిగా సక్సెస్ ఫుల్ డైరెక్టర్ అనిల్ రావిపూడి దర్శకత్వంలో తెరకెక్కుతున్న తాజా చిత్రం ‘భగవంత్ కేసరి'. షైన్ స్క్రీన్స్ బ్యానర్‌ లో రూపొందుతున్న ఈ సినిమాలో కాజల్ అగర్వాల్ హీరోయిన్ గా నటిస్తుండగా, శ్రీలీల కీలక పాత్ర పోషిస్తున్నారు. దసరా కానుకగా అక్టోబర్ 19న విడుదల కానున్న ఈ మోస్ట్ అవైటెడ్ మూవీ ట్రైలర్ లాంచ్ ఈవెంట్ ను ఆదివారం వరంగల్ లో గ్రాండ్ గా నిర్వహించారు. ఈ వేదికపై బాలయ్యను కాజల్ 'బాల్స్' అని పిలవడం అందరి దృష్టిని ఆకర్షించింది. 

కాజల్ అగర్వాల్ మాట్లాడుతూ.. ‘భగవంత్ కేసరి' నాకు చాలా చాలా స్పెషల్ మూవీ. బాలయ్య గారు ఒక గ్రేట్ లెజెండ్. బిగ్ సూపర్ స్టార్ అయ్యుండి ఎంతో హంబుల్ గా, డౌన్ టూ ఎర్త్ గా, ఒక ఫ్రెండ్ లా ఉంటారు. 'నన్ను సార్ అని పిలవద్దు, బాల్స్ అని పిలవు' అని ఆయన నాతో చెప్పారు. బాల్స్.. థాంక్యూ సో మచ్. మీతో కలిసి వర్క్ చేయడం గౌరవంగా భావిస్తున్నాను. మీరు అందరికీ ఇన్స్పిరేషన్. మీ లెగసీ ఆకాశాన్ని దాటి వేరే ప్లానెట్స్ కి కూడా చేరుకోవాలని కోరుకుంటున్నాను. అనిల్ రావిపూడితో వర్క్ చేయడం ఆనందంగా వుంది. శ్రీలీల మంచి ట్యాలెంటెడ్ ఉన్న అమ్మాయి. వండర్ ఫుల్ పర్శన్. ఈ సినిమాలో పని చేసిన అందరికీ పేరుపేరునా ధన్యవాదాలు. అభిమానులకు కృతజ్ఞతలు అని అన్నారు. అయితే, ఆమె ఫ్యాన్స్ మాత్రం.. ఎన్టీఆర్‌తో నటించిన ‘బాద్‌షా’ మూవీలో చెప్పే ‘బంతి’ ఫిలాసఫీని గుర్తుతెచ్చుకుంటున్నారు.

సాధారణంగా ఇండస్ట్రీలో సినీ ప్రముఖులందరూ బాలకృష్ణను 'బాలయ్య' అని, 'బాల' అని పిలవడం మనం వింటుంటాం. అయితే కాజల్ అగర్వాల్ మాత్రం ఆయన్ను 'బాల్స్' అంటూ సంబోధించడం, అది కూడా బాలయ్యే స్వయంగా అలా పిలవమని చెప్పడం నందమూరి అభిమానులను ఆకట్టుకుంది. తమ ఫేవరేట్ హీరోని ముద్దుగా పిలుచుకోడానికి చందమామ మరో కొత్త పేరు ఇచ్చిందని వ్యాఖ్యానిస్తున్నారు. 

కాగా, 'భగవంత్ కేసరి' సినిమాతో బాలకృష్ణ, కాజల్ అగర్వాల్ తొలిసారిగా స్క్రీన్ షేర్ చేసుకుంటున్నారు. ఇందులో బాలయ్య మిడిల్ ఏజ్డ్ మ్యాన్ గా నటించగా, కాత్యాయని అనే సైకాలజిస్ట్ పాత్రను కాజల్ పోషించింది. 2021లో వచ్చిన 'మోసగాళ్ళు' తర్వాత ఆమె నటిస్తున్న స్ట్రెయిట్ తెలుగు సినిమా ఇదే. అందులోనూ పెళ్ళై ఒక బిడ్డకు జన్మనిచ్చిన తర్వాత చేసిన మూవీ కావడంతో ఇంకా ప్రత్యేకంగా మారింది. 

ఇప్పటికే విడుదలైన 'భగవంత్ కేసరి' మూవీ పోస్టర్స్, టీజర్, పాటలు హ్యూజ్ బజ్ ని క్రియేట్ చేశాయి. లేటెస్టుగా వచ్చిన ట్రైలర్ కూడా సోషల్ మీడియాలో మిలియన్ల వ్యూస్ తో ట్రెండింగ్ లో దూసుకుపోతోంది. దీంతో ఈ మూవీ కచ్ఛితంగా బ్లాక్ బస్టర్ అవుతుందని నందమూరి అభిమానులు భావిస్తున్నారు. ఈ చిత్రం అక్టోబర్ 19న ప్రపంచ వ్యాప్తంగా భారీ స్థాయిలో విడుదల కానుంది.

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial