Director Teja: ఎన్టీఆర్ బయోపిక్ నా డ్రీమ్ ప్రాజెక్ట్‌, ఆ నందమూరి హీరోతో తీస్తా: దర్శకుడు తేజ

తేజ దర్శకత్వంలో దగ్గుబాటి అభిరామ్ హీరోగా ‘అహింస’ అనే సినిమా తెరకెక్కింది. జూన్2న ఈ సినిమా విడుదల కానుంది. ఈ నేపథ్యంలో ఓ ఇంటర్వ్యూలో పాల్గొన్న తేజ, ఎన్టీఆర్ బయోపిక్ గురించి ఆసక్తికర విషయాలు చెప్పారు.

తేజ, ఎన్టీఆర్(Photo Credit: Social Media)

టాలీవుడ్ టాప్ ప్రొడ్యూసర్ సురేష్ బాబు రెండో కొడుకు అభిరామ్ హీరోగా, తేజ దర్శకత్వంలో తెరకెక్కుతున్న సినిమా ‘అహింస’. గీతిక తివారీ హీరోయిన్ గా నటిస్తున్న ఈ సినిమాలో సదా కీలక పాత్ర పోషిస్తున్నారు. ఈ సినిమాతో రానా సోదరుడు అభిరామ్ వెండి తెరకు హీరోగా పరిచయం అవుతున్నారు. షూటింగ్ మొదలైనప్పటి నుంచి రకరకాల ఇబ్బందులను ఎదుర్కొన్న ఈ సినిమా ఎట్టకేలకు విడుదలకు రెడీ అవుతోంది. జూన్ 2వ తేదీన ఈ సినిమా విడుదల కానుంది.

ఎన్టీఆర్ బయోపిక్ నుంచి తప్పుకోవడానికి కారణం ఏంటంటే?

సినిమా ప్రమోషన్ లో భాగంగా ఓ ఇంటర్వ్యూలో పాల్గొన్న తేజ, ఎన్టీఆర్ బయోపిక్ గురించి కీలక విషయాలు వెల్లడించారు. ఎన్టీఆర్ బయోపిక్‌ ముహుర్తం షాట్ తర్వాత దర్శకుడిగా తేజ ఆ ప్రాజెక్ట్ నుంచి తప్పుకోవడం చర్చనీయాంశమైంది. తాజాగా ఆ సినిమా నుంచి వైదొలగడంపై తేజ వివరణ ఇచ్చారు. “ఎన్టీఆర్ గొప్ప నటుడు, నాయకుడు. నేను ఇష్టపడే హీరోలు ఇద్దరు. ఒకరు ఎన్టీఆర్. మరోకరు ఎంజీఆర్. అలాంటి ఎన్టీఆర్ జీవిత కథ ఆధారంగా తెరకెక్కే సినిమాకు నేను న్యాయం చేయలేను అనిపించింది. ఎన్టీఆర్ గొప్పదనాన్ని చూపించే శక్తి నాకు సరిపోదు అనుకున్నాను.  అందుకే సినిమా నుంచి తప్పుకున్నాను. బాలకృష్ణతో విభేదాలు రావడం వల్ల బయటకు వచ్చాననే వార్తలు శుద్ధ అబద్ధం. ఆయనతో నాకు ఎలాంటి విభేదాలు లేవు” అని తెలిపారు.  

ఆయనతో నందమూరి తారక రామారావు బయోపిక్ తీస్తా!

ఎన్టీఆర్ బయోపిక్ తీయం అనేది తన డ్రీమ్ ప్రాజెక్టులలో ఒకటని తేజ వెల్లడించారు. “వివిధ కారణాల వల్ల ఇప్పటికే 70 సినిమాలను తిరస్కరించాను. కానీ, ఎన్టీఆర్ బయోపిక్ నుంచి తప్పుకోవాల్సి వచ్చినందుకు  చింతిస్తున్నాను. కానీ, ఎన్టీఆర్ బయోపిక్ తీయడం అనేది నా డ్రీమ్ ప్రాజెక్ట్‌లలో ఒకటిగా ఉంటుంది. ఇది నేను వెబ్ సిరీస్‌ల రూపంలో  ప్రయత్నిస్తాను. ఎన్టీఆర్ పాత్రలో ఏ నటుడినైనా నటింపజేయడం చాలా కష్టం. అందుకే, నందమూరి తారక రామారావు మనవడు ఎన్టీఆర్ ఈ పాత్రకు సరిపోతాడు. ఎందుకంటే అతడు లెజెండ్ లాగా కనిపిస్తాడు. ఆయన పాత్రకు సరైన ఎంపిక ఎన్టీఆర్ అని భావిస్తున్నాను” అని తేజ తెలిపారు. 

బాక్సాఫీస్ దగ్గర ఆకట్టుకోని సీనియర్ ఎన్టీఆర్ బయోపిక్

ఎన్టీఆర్ బయోపిక్ నుంచి తేజ తప్పుకున్న తర్వాత, ఆయన స్థానంలో దర్శకుడిగా క్రిష్ లైన్ లోకి వచ్చారు. ఆయన రెండు భాగాలుగా ఈ సినిమాను తెరకెక్కించారు. అయితే, ఈ సినిమా అనుకున్న స్థాయిలో సక్సెస్ కాలేదు. బాక్సాఫీస్ దగ్గర యావరేజ్ గా ఆడింది. దానికి కారణం లేకపోలేదు. ఆదే సమయంలో రామ్ గోపాల్ వర్మ ఎన్టీఆర్ కు సంబంధించి ఓ సినిమా తెరకెక్కించారు. ‘లక్ష్మీస్ ఎన్టీఆర్’ పేరుతో విడుదల చేశారు. చాలా మంది క్రిష్ సినిమా కంటే ఆర్జీవీ సినిమా చూసేందుకే మొగ్గుచూపారు.