Prasanth Varma: అనుపమ 'ఆక్టోపస్' రీ-షెడ్యూల్? 'హను-మాన్' డైరెక్టర్ నెక్స్ట్ మూవీ 'జై హనుమాన్' కాదా?

Prasanth Varma's Next: 'హనుమాన్' చిత్రంతో హిట్టు కొట్టిన ప్రశాంత్ వర్మ.. 'జై హనుమాన్' అనే సీక్వెల్ ను ప్రకటించారు. అయితే ఇప్పుడు దీని కంటే ముందు మరో మూవీతో రాబోతున్నట్లు వార్తలు వస్తున్నాయి. 

'హనుమాన్' డైరెక్టర్ ప్రశాంత్ వర్మ (Image Credit: Instagram)

Prasanth Varma’s Next: టాలీవుడ్ లో ఎప్పటికప్పుడు వైవిధ్యమైన కాన్సెప్ట్స్ తో కమర్షియల్ సినిమాలను రూపొందిస్తూ తనకంటూ ప్రత్యేకమైన గుర్తింపు తెచ్చుకున్నాడు క్రియేటివ్ డైరెక్టర్ ప్రశాంత్ వర్మ. డెబ్యూ మూవీతోనే జాతీయ స్థాయిలో ప్రశంసలు అందుకున్న యువ దర్శకుడు.. కెరీర్ ప్రారంభం నుంచీ కొత్త తరహా సినిమాలనే తెరకెక్కిస్తూ వస్తున్నాడు. ఇటీవల 'హను-మాన్' చిత్రంతో బిగ్గెస్ట్ బ్లాక్ బస్టర్ సాధించి, బాక్సాఫీస్ వద్ద సెన్సేషన్ క్రియేట్ చేసాడు. దీంతో టాలెంటెడ్ డైరెక్టర్ నెక్స్ట్ ప్రాజెక్ట్ పై అందరిలో మంచి అంచనాలు ఏర్పడ్డాయి. 

ప్రశాంత్ వర్మ సినిమాటిక్ యూనివర్స్ లో భాగంగా తెరకెక్కించిన సూపర్ హీరో మూవీ 'హనుమాన్' ఘన విజయం సాధించిన తర్వాత, దానికి సీక్వెల్ గా 'జై హనుమాన్' అనే చిత్రాన్ని అనౌన్స్ చేసిన సంగతి తెలిసిందే. ప్రస్తుతం ప్రీ ప్రొడక్షన్ వర్క్స్ జరుగుతున్నాయని చెప్పిన దర్శకుడు.. త్వరలోనే ఫస్ట్‌ లుక్‌ పోస్టర్‌ ను కూడా రిలీజ్ చేస్తామని తెలిపారు. 2025లో రాబోతోందని ప్రకటించబడిన ఈ సినిమా కోసం సినీ అభిమానులు ఆసక్తిగా ఎదురు చూస్తున్నారు. అయితే ఇప్పుడు దీని కంటే ముందు ప్రశాంత్ మరో మూవీతో ప్రేక్షకుల ముందుకు రానున్నట్లు రూమర్స్ వినిపిస్తున్నాయి. 

'జై హనుమాన్' సినిమా కథంతా హనుమంతుడి చుట్టూ తిరుగుతుందని ఇప్పటికే క్లారిటీ వచ్చేసింది. దీంతో హనుమాన్ రోల్ లో ఏ హీరో నటిస్తారనే దాని గురించి సోషల్ మీడియాలో తెగ చర్చలు జరుగుతున్నాయి. అయితే ఈ ప్రాజెక్ట్ కోసం ప్రశాంత్ వర్మ ఇంకా ఏ నటీనటులను లాక్ చేయలేదట. ప్రస్తుతం క్యాస్టింగ్ ను ఫైనలైజ్ చేసే పనిలో ఉన్న యువ దర్శకుడు.. ఈ గ్యాప్ లో అసంపూర్తిగా మిగిలిపోయిన 'ఆక్టోపస్' అనే సినిమాని కంప్లీట్ చేయనున్నారని టాక్ నడుస్తోంది. 

'ఆక్టోపస్' అనేది ప్రశాంత్ వర్మ చాలా కాలం క్రితమే సెట్స్ మీదకు తీసుకెళ్లిన ప్రాజెక్ట్. ఇందులో మలయాళ బ్యూటీ అనుపమ పరమేశ్వర కథానాయికగా నటిస్తోంది. గతంలో 65 శాతం షూటింగ్ పూర్తి చేసుకున్న తర్వాత కొన్ని అనివార్య కారణాలతో ఈ సినిమాని హోల్డ్ లో పెట్టారని టాక్. అయితే ఇన్నాళ్లకు మళ్ళీ ఈ చిత్రాన్ని తిరిగి  సెట్స్ పైకి తీసుకొస్తున్నారట. 10 రోజులు షూటింగ్ చేస్తే సినిమా అంతా పూర్తవుతుందని, అందుకే హనుమాన్ దర్శకుడు ముందుగా ఈ ఫీమేల్ ఓరియెంటెడ్ ప్రాజెక్ట్ ను ఫినిష్ చేయనున్నారని, దీని తర్వాత 'జై హనుమాన్'ను ప్రారంభిస్తారని అంటున్నారు. ఇందులో నిజమెంతనేది తెలియాలంటే, దీనికి సంబంధించిన అధికారిక ధృవీకరణ వచ్చే వరకూ ఆగాల్సిందే. 

హీరో నాని నిర్మాణంలో వచ్చిన 'అ!' చిత్రంతో డైరెక్టర్ గా పరిచయమైన ప్రశాంత్ వర్మ.. 'కల్కి' సినిమాతో కమర్షియల్ సక్సెస్ సాధించాడు. బాలనటుడిగా పేరు తెచ్చుకున్న తేజ సజ్జని హీరోగా ఇంట్రడ్యూస్ చేస్తూ, భారతదేశపు తొలి జాంబి మూవీగా 'జాంబీ రెడ్డి' తీసి హిట్టు కొట్టాడు. ఆ తర్వాత 'అద్భుతం' సినిమాకు అద్భుతమైన కథ అందించారు. ఇదే క్రమంలో తొలి తెలుగు సూపర్ హీరో సినిమాగా 'హను-మాన్' ను తెరకెక్కించి, పాన్ ఇండియా సక్సెస్ అందుకున్నారు. తేజ హీరోగా రూపొందిన ఈ సినిమా బాక్సాఫీస్ దగ్గర 300 కొట్లకు పైగా వసూళ్లు రాబట్టింది. ఇప్పుడు ఓటీటీలోనూ సంచలనం సృష్టిస్తోంది. 

ఇదిలా ఉంటే 'జై హనుమాన్' కంటే ముందు 'అధీరా' అనే మరో సూపర్ హీరో మూవీని ప్రకటించారు డైరెక్టర్ ప్రశాంత్ వర్మ. ఈ సినిమాతో RRR నిర్మాత డీవీవీ దానయ్య తనయుడిని హీరోగా లాంచ్ చేయనున్నట్లు వెల్లడించారు. దీనికి సంబంధించిన ఫస్ట్ గ్లింప్స్ కూడా రిలీజ్ చేసారు. అయితే ఆ తర్వాత ఈ సినిమా నుంచి ఎలాంటి అప్డేట్ లేదు. ఈ ప్రాజెక్ట్ చేతులు మారిందని, ప్రశాంత్ వర్మ అందించిన కథని మరొక డైరెక్టర్ తెరక్కిస్తారని ఊహాగానాలు వినిపించాయి. ఇప్పుడు టాలెంటెడ్ దర్శకుడి నుంచి 'ఆక్టోపస్' మూవీ రానుందని అంటున్నారు. త్వరలోనే వీటన్నింటిపై స్పష్టత వస్తుందేమో చూడాలి.