Animal Park: ‘యానిమల్ పార్క్’పై కీలక అప్డేట్ - కథ సిద్ధం, షూటింగ్ ఎప్పుడంటే?

Animal Park: రణబీర్ కపూర్, సందీప్ రెడ్డి వంగా కాంబినేషన్‌లో తెరకెక్కబోయే ‘యానిమల్ పార్క్’ గురించి ప్రేక్షకులు అప్పుడే ఆసక్తిగా ఎదురుచూడడం మొదలుపెట్టారు. తాజాగా దీనికి సంబంధించిన అప్డేట్ బయటికొచ్చింది.

Image Credit: Ranbir Kapoor/Twitter

Animal Park Update: రణబీర్ కపూర్, సందీప్ రెడ్డి వంగా కాంబినేషన్‌లో తెరకెక్కిన ‘యానిమల్’ దేశవ్యాప్తంగా సెన్సేషన్ సృష్టించింది. ఈ సినిమాను పాజిటివ్‌గా తీసుకున్న వారికంటే నెగిటివ్‌గా తీసుకున్నవారి సంఖ్యే ఎక్కువ. అయినా కూడా కలెక్షన్స్ విషయంలో ఏ మాత్రం వెనక్కి తగ్గలేదు ‘యానిమల్’. పైగా దీనిని ఒక ఫ్రాంచైజ్‌లాగా తెరకెక్కిస్తానని దర్శకుడు సందీప్ ప్రకటించినప్పటి నుంచి ప్రేక్షకులు మరింత ఆసక్తితో దీనికోసం ఎదురుచూస్తున్నారు. ఇక ‘యానిమల్’కు సీక్వెల్‌గా తెరకెక్కనున్న ‘యానిమల్ పార్క్’ గురించి ఒక ఆసక్తికరమైన అప్డేట్ బయటికొచ్చింది. 

‘రామాయణ’లో రణబీర్ కపూర్..

సందీప్ రెడ్డి వంగా తెరకెక్కించనున్న ‘యానిమల్’లో రెండో భాగంగా వస్తున్న చిత్రమే ‘యానిమల్ పార్క్’. తాజా సమాచారం ప్రకారం ‘యానిమల్ పార్క్’కు సంబంధించిన బేసిక్ స్క్రిప్ట్ పూర్తయ్యిందట. ఇక ఈ స్క్రిప్ట్ పనిని పూర్తిస్థాయిలో ముగించడం కోసం రైటర్స్‌తో కలిసి సమావేశం అవ్వనున్నాడట సందీప్. ఈ ఏడాది చివరిలోపు స్క్రిప్ట్ పనులు దాదాపుగా ఫైనల్ చేయాలనే ఆలోచనలో దర్శకుడు ఉన్నట్టు తెలుస్తోంది. ఇక స్క్రిప్ట్ పూర్తయినా కూడా రణబీర్ కపూర్ డేట్స్ అందుబాటులో ఉండడం ముఖ్యం. ప్రస్తుతం రణబీర్ కపూర్.. నితీష్ తివారీ దర్శకత్వంలో తెరకెక్కుతున్న ‘రామాయణ’లో నటిస్తున్నట్టు సమాచారం.

‘యానిమల్ పార్క్’ కథ అదే..

‘యానిమల్’ కథను రాసుకున్నప్పుడే.. ‘యానిమల్ పార్క్’కు సంబంధించిన బేసిక్ కథ పూర్తయినట్టు సమాచారం. కానీ దానిని పూర్తిస్థాయి స్క్రిప్ట్‌గా మార్చడానికి మరికాస్త సమయం పడుతుంది. ఇక ‘యానిమల్ పార్క్’ బేసిక్ కథ ప్రకారం.. ఇది రణబీర్ కపూర్ క్యారెక్టర్ అయిన రణవిజయ్ సింగ్‌కు, తనలాగే కనిపించే విలన్‌కు మధ్య జరిగే వైలెన్స్‌పై ఆధారపడి ఉంటుంది. ఇప్పటికే రణబీర్ కపూర్ తరహాలోనే ఉండే విలన్‌ను ‘యానిమల్’ క్లైమాక్స్‌లో ప్రేక్షకులకు పరిచయం చేశాడు దర్శకుడు సందీప్. దాంతో పాటు రణవిజయ్ పాత్రకు, తన భార్య గీతాంజలి, వాళ్ల కొడుకుకు మధ్య రిలేషన్‌షిప్‌ను కూడా ‘యానిమల్ పార్క్’లో మరింత స్పష్టంగా చూపించబోతున్నాడట సందీప్ రెడ్డి వంగా. ప్రస్తుతం రణబీర్ కపూర్.. ‘రామాయణ’పై ఫోకస్ చేస్తుండగా.. సందీప్ ‘స్పిరిట్’ ప్రీ ప్రొడక్షన్ పనుల్లో బిజీ కానున్నాడు.

‘స్పిరిట్’తో బిజీ..

సందీప్ రెడ్డి వంగా.. ప్రభాస్‌తో ‘స్పిరిట్’ అనే మూవీ చేయడానికి సిద్ధంగా ఉన్నాడు. ప్రస్తుతం ప్రభాస్ హీరోగా నటిస్తున్న ‘కల్కి 2898 ఏడీ’ మూవీ షూటింగ్ చివరిదశకు చేరుకోవడంతో ‘రాజా సాబ్’తో పాటు ‘స్పిరిట్’ షూటింగ్‌ను కూడా ఒకేసారి చేసేయాలనే ఆలోచనలో ప్రభాస్ ఉన్నట్టు తెలుస్తోంది. ఒకవేళ అదే జరిగితే సందీప్ సోదరుడు ప్రణయ్ వంగా.. ‘యానిమల్ పార్క్’ స్క్రిప్ట్‌పై దృష్టిపెట్టనున్నాడు. రైటర్స్‌తో కలిసి స్క్రిప్ట్‌ను పూర్తిచేసే విషయంలో ప్రణయ్ సాయం చేయనున్నాడని తెలుస్తోంది. ఇప్పటికే రణబీర్ కపూర్, రష్మిక మందనా సైతం ‘యానిమల్ పార్క్’ చాలా వైలెంట్‌గా ఉంటుందని స్టేట్‌మెంట్స్ ఇచ్చారు. ప్రస్తుతం ఇండస్ట్రీలో వైరల్ అవుతున్న కథనాల ప్రకారం ‘యానిమల్ పార్క్’ షూటింగ్ 2025లో ప్రారంభం కానుంది.