ఆసుపత్రిలో అబ్బాస్, అసలు ఏమైంది?

తాజాగా అబ్బాస్ గురించి ఓ వార్త బయటకు వచ్చింది. ఆయన ఆరోగ్యం పాడై ఆసుపత్రి పాలయ్యారనే వార్తలు సోషల్ మీడియాలో చక్కర్లు కొడుతున్నాయి.

Abbas (Image Credit: Social Media)

హీరో అబ్బాస్ గురించి తెలియని వారుండరు. తెలుగులో 'ప్రేమదేశం' సినిమాతో యూత్ లో మంచి క్రేజ్ తెచ్చుకున్నారాయన. అయితే ఆ సినిమా తర్వాత కొన్ని తెలుగు సినిమాలతో పాటు ఇతర భాషా చిత్రాల్లో కూడా నటించారు అబ్బాస్. ఆ తర్వాత సినిమాలకు దూరంగా ఫ్యామిలితో కలసి ఉంటున్నారు. అయితే తాజాగా అబ్బాస్ గురించి ఓ వార్త బయటకు వచ్చింది. ఆయన ఆరోగ్యం పాడై ఆసుపత్రి పాలయ్యారనే వార్తలు సోషల్ మీడియాలో చక్కర్లు కొడుతున్నాయి.

తెలుగులో 1996లో వచ్చిన 'ప్రేమ దేశం' సినిమాతో అబ్బాస్ భారీ హిట్ అందుకున్నాడు. ఈ సినిమాతో ఆయనకు విపరీతమైన ఫాలోయింగ్ వచ్చింది. అప్పట్లో ఈ సినిమా యూత్ ను అంతలా ఆకట్టుకుంది. దీంతో మంచి క్రేజ్ వచ్చేసింది. అప్పట్లో అబ్బాస్ కు లేడి ఫాలోయింగ్ కూడా ఎక్కువగానే ఉండేది. చాలామంది అమ్మాయిలకు అతనే డ్రీమ్ హీరో. అబ్బాస్ కటింగ్ కూడా ఆ టైమ్ లో  యూత్ ను ఒక ఊపు ఊపిందనే చెప్పాలి. అయితే ఈ సినిమా తర్వాత తెలుగు, తమిళంలో పలు సినిమాల్లో నటించారు అబ్బాస్. తర్వాత సినిమాలకు దూరంగా ఉన్నాడు. న్యూజిలాండ్ లో ఫ్యామిలీతో ఉంటున్నారు. అక్కడే సాఫ్ట్ వేర్ ఇంజినీర్‎ గా సెటిల్ అయ్యాడు. అయితే చాలా సంవత్సరాలుగా అటు సినీ ఇండస్ట్రీకి, సోషల్ మీడియాకు దూరంగా ఉన్న అబ్బాస్ మళ్ళీ వార్తల్లోకి వచ్చాడు. తాజాగా అబ్బాస్ ఆసుపత్రి బెడ్ పై ఉన్న ఫోటో ను షేర్ చేసి అభిమానులకు షాక్ ఇచ్చాడు. ఈ ఫోటోలో ఆయన చేతికి సెలైన్, ఆక్సిజన్ ట్యూబ్స్ తో ఐసీయూలో ఉన్నట్లు కనిపించాడు. ఇది ఇప్పుడు సోషల్ మీడియాలో వైరల్‌గా చక్కర్లు కొడుతోంది.

అయితే ఇటీవల ఆయనకు శస్త్ర చికిత్స జరిగినట్లు తెలుస్తోంది. కొద్దిరోజుల క్రితం అబ్బాస్ కు బైక్ యాక్సిడెంట్ జరిగిందట. దాంతో ఆయన మోకాలికి గాయమైందట. ఆ గాయం బాగా ఇబ్బంది కలుగజేస్తుండటంతో వైద్యులు సర్జరీ చేయాలని సూచించారట. వైద్యుల సలహా మేరకు ఆయన మోకాలికి సర్జరీ చేయించుకున్నారని సమాచారం. అబ్బాస్ ఆ ఫోటో ను షేర్ చేస్తూ ఆసుపత్రిలో ఉన్న సమయంలో తన మనసంతా గందరగోళంగా ఉందని తెలిపాడు. దాన్ని అధిగమించేందుకు తాను ఎంతగానో ప్రయత్నించానని, అయితే సర్జరీ తర్వాత కొంత ఉపశమనం కలిగినట్లు పేర్కొన్నాడు. తన కోసం ప్రార్థించినవారికి ధన్యవాదాలు అని తెలిపాడు.

అబ్బాస్ తమిళంతో పాటు, తెలుగు, మలయాళం, కన్నడ, హిందీ సినిమాల్లోనూ నటించారు.  తెలుగులో కూడా ఆయనకు అభిమానులు బాగానే ఉన్నాడు. 'ప్రేమదేశం' సినిమాతో గుర్తింపు తెచ్చుకున్న ఆయన మలయాళంలోనూ హీరోగా నటించాడు. తెలుగులో ప్రేమదేశంతో పాటు రాజా, అనగనగా ఒక అమ్మాయి, కృష్ణ బాబు, అల్లుడు గారు వచ్చారు, మాధురి, నీ ప్రేమకై, శ్వేత నాగు, పొలిటికల్ రౌడీ, చంద్రహాస్, అనసూయ, ఇది సంగతి, బ్యాంక్, మారో లాంటి సినిమాల్లో నటించాడు అబ్బాస్. అయితే 2015 తర్వాత సినిమాల నుంచి దూరం అయిన ఆయన వ్యక్తిగత జీవితాన్ని గడుపుతున్నాడు.