CLAT 2023: నేడు కామన్‌ లా అడ్మి‌షన్‌ టెస్ట్‌ - 2023, అభ్యర్థులకు సూచనలివే!

దేశ‌వ్యా‌ప్తంగా ఉన్న నేషనల్‌ లా యూనివర్సిటీల్లో బీఏ ఎల్‌‌ఎ‌ల్‌బీ, ఎల్‌‌ఎ‌ల్‌ఎం కోర్సుల్లో ప్రవే‌శాలు కల్పిస్తారు. 23 రాష్ట్రా‌ల్లోని 127 కేంద్రాల్లో పరీక్ష జరు‌గ‌నుంది.

క్లాట్ - 2023 ఎగ్జామ్

కామన్‌ లా అడ్మి‌షన్‌ టెస్ట్‌ (CLAT‌)- 2023ను నేడు జరుగనుంది. ఆది‌వారం (డిసెంబరు 18) మధ్యాహ్నం 2 నుంచి సాయంత్రం 4 గంటల వరకు పరీక్ష నిర్వహిం‌చ‌ను‌న్నారు. దీనిద్వారా దేశ‌వ్యా‌ప్తంగా ఉన్న నేషనల్‌ లా యూనివర్సిటీల్లో బీఏ ఎల్‌‌ఎ‌ల్‌బీ, ఎల్‌‌ఎ‌ల్‌ఎం కోర్సుల్లో ప్రవే‌శాలు కల్పిస్తారు. 23 రాష్ట్రా‌ల్లోని 127 కేంద్రాల్లో పరీక్ష జరు‌గ‌ను‌ంది. ఈ ప్రవేశపరీక్షలో మొత్తం 22 లా యూనివర్సిటీలు, వాటి పరిధిలో ఉన్న 104 కాలేజీలు పాల్గొంటున్నాయి. వీటిలో ఆయా కోర్సుల్లో 2801 సీట్లు అందుబాటులో ఉన్నాయి. ఇందులో యూజీ కోర్సుల్లో 2 వేలకుపైగా సీట్లు ఉన్నాయి.  పరీక్షకు సంబంధించిన ఆన్సర్ కీని డిసెంబరు 18నే విడుదల చేయనున్నారు. ఆన్సర్ కీపై అభ్యంతరాలను డిసెంబరు 19 నుంచి స్వీకరించనున్నారు. తదనంతరం డిసెంబరు చివరివారంలో ఫలితాలు వెలువడే అవకాశం ఉంది.

పరీక్ష కేంద్రంలోకి అభ్యర్థులను మధ్యాహ్నం 1 గంట నుంచి లోపలికి అనుమతిస్తారు. అభ్యర్థులు మధ్యాహ్నం 1.30 గంటల్లోకి కేంద్రంలో వారికి కేటాయించిన సీట్లలో ఉండటం ఉత్తమం. పరీక్ష సమయం తర్వాత 15 నిమిషాలు అంటే మధ్యాహ్నం 2.15 గంటల వరకు మాత్రమే పరీక్షకు అనుమతిస్తారు. నిర్ణీత సమయం తర్వాత ఎట్టి పరిస్థితుల్లోనూ అనుమతించరు. సాయంత్రం 4 గంటల తర్వాతే పరీక్ష కేంద్రం నుంచి అభ్యర్థులను బయటకు పంపిస్తారు.

అభ్యర్థులకు ముఖ్య సూచనలు..
➥ పరీక్షకు హాజరయ్యే అభ్యర్థులు హాల్‌టికెట్‌తోపాటు ప్రభుత్వ గుర్తింపు పొందిన ఏదైనా ఒరిజినల్ ఐడీకార్డును వెంట తీసుకెళ్లాల్సి ఉంటుంది.
➥ క్యాలికులేటర్లు, ఫోన్లు, ఇతర ఎలాంటి ఎలక్ట్రానిక్స్ వస్తువులను పరీక్ష కేంద్రంలోకి అనుమతించరు. 
➥ బ్లాక్ లేదా బ్లూ బాల్ పాయింట్ పెన్ తీసుకెళ్లాలి.
➥ ఫేస్ మాస్కులు తప్పనిసరిగా ధరించాలి.
➥ బ్యాగులను పరీక్ష కేంద్రంలోకి అనుమతించరు.

క్లాట్‌ పరీక్ష విధానం..
క్లాట్ యూజీ: 
✪ క్లాట్ యూజీ పరీక్ష ఆఫ్‌లైన్‌ విధానంలో జరుగుతుంది. మొత్తం 150 మార్కులకుగాను 150 ప్రశ్నలకు క్లాట్‌ పరీక్ష జరుగుతుంది. ఆబ్జెక్టివ్‌ తరహా ప్రశ్నలు ఉంటాయి. ప్రతి ప్రశ్నకు ఒక మార్కు కేటాయిస్తారు. పరీక్ష సమయం రెండు గంటలు. నెగిటివ్‌ మార్కుల విధానం అమల్లో ఉంది. ప్రతి తప్పు సమాధానానికి 0.25 మార్కు తగ్గిస్తారు. ప్రశ్న పత్రం ఇంగ్లిష్‌లో ఉంటుంది. 
✪ క్లాట్‌ యూజీలో మొత్తం ఐదు విభాగాల నుంచి ప్రశ్నలుంటాయి. క్వాంటిటేటివ్‌ టెక్నిక్స్‌ విభాగం నుంచి 10శాతం(13–17) , ఇంగ్లీష్‌ లాంగ్వేజ్‌ 20 శాతం(28–32), లీగల్‌ రీజనింగ్‌ 20 శాతం(35–39), కరెంట్‌ అఫైర్స్‌(జనరల్‌ నాలెడ్జ్‌తో కలిపి) నుంచి 25శాతం(35–39), లాజికల్‌ రీజనింగ్‌ నుంచి 25శాతం(28–32) ప్రశ్నలు వస్తాయి. 

పీజీ(ఎల్‌ఎల్‌ఎం) క్లాట్‌:
✪ పీజీ(ఎల్‌ఎల్‌ఎం) క్లాట్‌ పరీక్ష 120 మార్కులకు ఉంటుంది. ప్రశ్నలు మల్టిపుల్‌ చాయిస్‌ పద్ధతిలో అడుగుతారు. పరీక్ష సమయం 2 గంటలు. ప్రతి తప్పు సమాధానానికి 0.25 మార్కులు తగ్గిస్తారు. ప్రశ్న పత్రం ఇంగ్లిష్‌లో ఉంటుంది. కాన్‌స్టిట్యూషనల్‌ లా 60 ప్రశ్నలు–60 మార్కులు, ఇతర లా సబ్జెక్టులు(కాంట్రాక్ట్, టార్ట్స్, క్రిమినల్, ఇంటర్నేషనల్‌ లా, ఎన్విరాన్‌మెంట్, లేబర్‌ అండ్‌ ఇండస్ట్రియల్‌ లా, ఐపీఆర్‌ తదితర) నుంచి 60 ప్రశ్నలు–60 మార్కులకు పరీక్ష ఉంటుంది.