Warangal News: రిటైర్డ్ ఎంపీడీఓ కిడ్నాప్ విషాదాంతం - మూడ్రోజుల తర్వాత క్వారీ గుంతలో మృతదేహం లభ్యం

Warangal News: రిటైర్డ్ ఎంపీడీఓ రామకృష్ణయ్య కిడ్నాప్ విషాధాంతంగా మారింది. కిడ్నాప్ అయిన మూడ్రోజులకు ఆయన మృతదేహం లభ్యం అయింది. 

రిటైర్డ్ ఎంపీడీఓ కిడ్నాప్ విషాదాంతం

Warangal News: రిటైర్డ్ ఎంపీడీఓ రామకృష్ణయ్య కిడ్నాప్ విషాదాంతంగా మారింది. కిడ్నాప్ అయిన మూడ్రోజులకు ఆయన మృతదేహం లభ్యం అయింది. జనగామ సమీంపలోని చంపల్ హిల్స్ క్వారీ గుంతలో రామకృష్ణయ్య మృతదేహాన్ని స్థానికులు గుర్తించారు. ఈక్రమంలోనే కుటుంబ సభ్యులు కొందరిపై అనుమానం వ్యక్తం చేయగా.. వారిని అదుపులోకి తీసుకొని పోలీసులు విచారిస్తున్నారు. హత్యకు భూ వివాదాలే కారణం అని స్థానికులు భావిస్తున్నారు. హత్య వెనుక అధికార పార్టీ నాయకుల హస్తం ఉందని కుటుంబ సభ్యులు ఆరోపిస్తూ ఆందోళనకు దిగారు. 

అసలేం జరిగిందంటే..? 
బచ్చన్నపేట మండలం పోచన్నపేట గ్రామానికి చెందిన రిటైర్డ్ ఎంపీడీఓ నల్లా రామకృష్ణయ్య మృతదేహం లభించడంతో మూడు రోజుల మిస్టరీకి తెరపడింది. రామకృష్ణయ్య కిడ్నాప్ ఉదంతం జిల్లాలో సంచలనం కల్గించగా.. అధికార పార్టీ నేతల హస్తం ఉన్నట్లు కుటుంబ సబ్యులు ఆరోపించడంతో వరంగల్ పోలీస్ కమిషనర్ రంగనాథ్ రంగంలోకి దిగినట్లు సమాచారం. కిడ్నాప్ కు స్థానిక పోలీసులతో పాటు టాస్క్ ఫోర్స్ బృందం అనుమానితులను అదుపులోకి తీసుకుని విచారిస్తున్నారు. అంతలోనే రామకృష్ణయ్య హత్యకు సంబంధించిన సమాచారం శనివారం సాయంత్రమే బయటకు వచ్చింది. పోచన్నపటేకు చెందిన రామ కృష్ణయ్య గతంలో నర్మట, రఘునాథపల్లి, భూపాలపల్లి తదితర ప్రాంతాల్లో ఎంపీడీఓగా పని చేశారు. ఆ తర్వాత ఇంటి వద్దనే ఉంటూ.. సమాచార హక్కు చట్టం కింద వివరాలు సేకరణలో యాక్టివ్ గా పని చేస్తున్నారు. జీపీ, తదితర ప్రభుత్వ కార్యాలయాలకు సంబంధించి సర్కారు నుంచి మంజూరైన నిధులు, వాటి వినియోగం తదితర వివరాలు సేకరించే వారు. 

కిడ్నాప్ చేసే సమయంలో దారిలో పడిపోయిన రామకృష్ణయ్య సెల్ ఫోన్ 
ఆయన ఈనెల 15వ తేదీన బచ్చన్నపేట మండల కేంద్రం నుంచి తన ద్విచక్ర వాహనంపై పోచన్నపేటకు వస్తుండగా.. మధ్యాహ్నం గుర్తు తెలియని వ్యక్తులు కిడ్నాప్ చేశారు. అదే రోజు కుటుంబ సభ్యులు అనుమానితులపై స్థానిక పీఎస్ లో ఫిర్యాదు చేశారు. క్రైమ్ నెంబర్ 105/2023, యూ/ఎస్ ఐపీఎస్ కింద కేసు నమోదు చేసి విచారణ ప్రారంభించారు. రామకృష్ణయ్యను కిడ్నాపర్లు జనగామ మండలం ఓబుల్ కేశ్వాపురం వైపు తీసుకు వెళ్లినట్లు పోలీసులు గుర్తించి ఆ కోణంలో దర్యాప్తు ప్రారంభించారు. కిడ్నాప్ చేసే సమయంలో రిటైర్డ్ ఎంపీడీఓ సెల్ ఫోన్ దారిలో పడిపోయింది. ఫోన్ సిగ్నల్ ను ట్రాక్ చేసిన పోలీసులు.. ఓ రైతు వద్ద ఉన్నట్లు గుర్తించారు. విచారణలో భాగంగా బీఆర్ఎస్ పార్టీకి చెందిన ఓ ప్రజాప్రతినిధి భర్తతో పాటు ఆయన సోదరుడు, మరో నలుగురిని అదుపులోకి తీసుకొని విచారణ మొదలు పెట్టారు. చివరికి రిటైర్డ్ ఎంపీడీఓ రామకృష్ణయ్య కిడ్నాప్ విషాదాంతంగా ముగిసింది.