Hyderabad Fake Liquor Gang: యూట్యూబ్ చూసి ఇంట్లోనే మద్యం తయారీ -హైదరాబాద్లో ఖరీదైన బ్రాండ్ల పేరిట దందా.. ముఠా గుట్టురట్టు!
Cheap Liquor Mixed In Costly Bottles: ఇంట్లోనే మద్యం తయారు చేసిఅది ప్రముఖ బ్రాండ్ అని చెప్పి అమ్మేస్తున్నారు ఓ ముఠా. ఎక్సైజ్ అధికారుల దాడుల్లో ఈ ముఠా పట్టుబడింది.
Spurious Liquor Manufacturing At Home Hyderabad: హైదరాబాద్ మహానగరంలో యూట్యూబ్ను చూసి ఇంట్లోనే అక్రమంగా మద్యం, వైన్ తయారు చేస్తూ, వాటిని ప్రముఖ ఖరీదైన బ్రాండ్ల పేరుతో మార్కెట్లో విక్రయిస్తున్న ఒక ముఠా ఉదంతం బుధవారం వెలుగులోకి వచ్చింది. సాంకేతికతను మంచి కోసం కాకుండా, అడ్డదారిలో డబ్బులు సంపాదించేందుకు వాడుకున్న ఈ ముఠాను హైదరాబాద్ ఎక్సైజ్ , టాస్క్ఫోర్స్ అధికారులు పక్కా సమాచారంతో దాడులు నిర్వహించి పట్టుకున్నారు. నిందితుల నుంచి భారీగా నకిలీ మద్యం, వివిధ రకాల బ్రాండ్ల ఖాళీ సీసాలు, లేబుళ్లను స్వాధీనం చేసుకున్నారు.
నిందితులు సులభంగా డబ్బు సంపాదించాలనే దురాశతో యూట్యూబ్లో లభించే వివిధ రకాల హోమ్ మేడ్ వైన్ , లిక్కర్ మేకింగ్ ట్యుటోరియల్స్ ను క్షుణ్ణంగా పరిశీలించారు. ఇంట్లోనే కెమికల్స్, స్పిరిట్, ఇతర రంగులు, ఫ్లేవర్లను ఉపయోగించి గుట్టుచప్పుడు కాకుండా మద్యం తయారు చేయడం ప్రారంభించారు. ఇలా స్థానికంగా తయారు చేసిన నకిలీ, కల్తీ మద్యాన్ని సాధారణ బ్రాండ్లలా కాకుండా మార్కెట్లో విక్రయించే ఖరీదైన విదేశీ, ప్రీమియం బ్రాండ్ల సీసాలలో నింపడం అలవాటు చేసుకున్నారు. ఈ ముఠా తాము తయారు చేసిన నకిలీ మద్యాన్ని అసలైన బ్రాండ్ల కంటే కాస్త తక్కువ ధరకు ఇస్తామంటూ ఐటీ కారిడార్లోని సాఫ్ట్వేర్ ఉద్యోగులను, యువతను టార్గెట్ చేసినట్లు విచారణలో తేలింది. బార్లలో పారేసిన ఖరీదైన ఖాళీ సీసాలను సేకరించి ఈ మోసానికి పాల్పడేవారని అధికారులు తెలిపారు.
ఈ వ్యవహారంపై ఎక్సైజ్ డిస్ట్రిక్ట్ టాస్క్ఫోర్స్ టీమ్కు అందిన రహస్య సమాచారంతో బుధవారం నగరంలోని పలు ప్రాంతాలలో ఏకకాలంలో దాడులు జరిపారు. ఈ దాడుల్లో నిందితులు సాగిస్తున్న నకిలీ మద్యం తయారీ కేంద్రం బట్టబయలైంది. ల్యాబ్ లాంటి సెటప్తో కెమికల్స్ మిక్స్ చేస్తున్న దృశ్యాలను చూసి అధికారులే షాకయ్యారు. మార్కెట్లో వీటికి భారీ డిమాండ్ సృష్టించి, ఒరిజినల్ బాటిళ్లను పోలినట్లుగా ఉండే సీల్స్, నకిలీ హోలోగ్రామ్లను కూడా వీరు సిద్ధం చేసుకున్నట్లు గుర్తించారు.
ఈ దాడుల్లో లక్షల రూపాయల విలువైన నకిలీ మద్యం, తయారీ పరికరాలు, కల్తీ కెమికల్స్ను సీజ్ చేశారు. నిందితులను అదుపులోకి తీసుకుని కేసు నమోదు చేసినట్లు ఎక్సైజ్ సీఐ తెలిపారు. ఈ కల్తీ మద్యం తాగడం వల్ల కాలేయం దెబ్బతినడంతో పాటు ప్రాణాలకే ప్రమాదమని, తక్కువ ధరకు వస్తున్నాయని నకిలీ మద్యం కొనుగోలు చేసి మోసపోవద్దని, సమాచారం ఉంటే అధికారులకు తెలపాలని మందుబాబులను హెచ్చరించారు.
టాప్ హెడ్ లైన్స్
ట్రెండింగ్ వార్తలు
