DeepSeek AI: చైనా ‘డీప్సీక్’ సంచలనం, అమెరికా ఏఐ ఇండస్ట్రీ సైతం బెంబేలు- అసలేంటీ ‘డీప్సీక్’?
చైనాకు చెందిన ‘డీప్సీక్’ స్టార్టప్ సంస్థ సంచలనం సృష్టించింది. ఈ ఏఐ అసిస్టెంట్ చాట్జీపీటీని ఓవర్టేక్ చేసి అమెరికాలోని యాపిల్ యాప్ స్టోర్లో టాప్లో నిలిచింది.
DeepSeek AI: చైనాకు చెందిన ‘డీప్సీక్’ (DeepSeek) స్టార్టప్ సంస్థ సంచలనం సృష్టించింది. తక్కువ ఖర్చుతో హై ఎఫీషియెన్సీ ఆర్టిఫిషియల్ ఇంటెలిజెన్స్ (Artificial intelligence) మోడల్ని ప్రపంచానికి పరిచయం చేసింది. అదిమాత్రమే కదా.. ఏకంగా చాట్జీపీటీని అధిగమించింది. ఈ ఏఐ అసిస్టెంట్ ఇప్పుడు చాట్జీపీటీని ఓవర్టేక్ చేసి అమెరికాలోని యాపిల్ యాప్ స్టోర్లో టాప్లో నిలిచింది. ఇప్పుడు ఈ డీప్సీక్తో ప్రపంచ దేశాల్లోని లీడింగ్ ఆర్టిఫిషియల్ ఇంటెలిజెన్స్ కంపెనీలు హడలెత్తిపోతున్నాయి. ముఖ్యంగా అమెరికాలోని దిగ్గజ టెక్ కంపెనీల్లో ప్రకంపనలు మొదలయ్యాయి.
అసలేంటి ఈ డీప్సీక్?
ఏఐ, క్వాంటిటేటివ్ ఫైనాన్స్లో సిద్ధహస్తుడైన చైనా ఇంజినీర్, ఎంటర్ప్రెన్యూర్ లియాంగ్ వెన్ఫెంగ్ 2023లో ఈ డీప్సీక్ని స్థాపించారు. ఈ ఏఐ మోడల్ని డీప్సీక్ ఆర్1 అని నామకరణం చేశాడు. డీప్సీక్ సృష్టించడానికి ముందు ఆయన దేశంలో ఆర్థిక డేటాను విశ్లేషించడానికి ఏఐని ఉపయోగించే హెడ్జ్ ఫండ్ సంస్థకు నాయకత్వం వహించారు. ఈ కంపెనీ ఓపెన్సోర్స్ ఏఐ మోడల్స్ని డెవలప్ చేసి, వాటిని ప్రపంచవ్యాప్తంగా ఉన్న డెవలపర్స్కి అందజేసింది. వారు తమ టెక్నాలజీని మెరుగుపరుచుకునేందుకు డీప్సీక్ ఆర్1ని వాడుకుంటున్నారు.
అదే ముఖ్యమైన తేడా..
డీప్సీక్ సంచలనంగా మారడంతో దానిని ఇప్పుడు ఓపెన్ఏఐకి చెందిన చాట్జీపీటీతో పాటు ఇతర ఏఐ మోడల్స్తో పోల్చుతున్నారు. ఏఐ మోడల్స్ని తీసుకొచ్చేందుకు పలు సంస్థలు బిలియన్ డాలర్లు ఖర్చు చేస్తుంటే.. వాటిల్లో సగం కూడా ఖర్చు చేయకుండానే ఏఐ మోడల్స్ని తీసుకొచ్చింది డీప్సీక్. ప్రాంప్ట్కి సమాధానం ఇచ్చే ముందు అందుకు కారణాలు కూడా చెబుతుంది. తక్కువ ఖర్చుతో రూపొందడం, అంశాలను విష్లేషించడమే డీప్సీక్ ఆర్1కి, ఇతర మోడల్స్కి మధ్య ఉన్న ప్రధాన వ్యత్యాసం. సక్సెస్ఫుల్ ఓపెన్ఏఐ టెక్నాలజీతో ఇది సమానంగా పనిచేస్తుందని సంస్థ చెబుతోంది.
మాథ్య్స్, జీకే, క్వశ్చన్ అండ్ ఆన్సర్లో బెటర్ పెర్ఫార్మెన్స్
అమెరికాలోని మైక్రోసాఫ్ట్, మెటా వంటి టాప్ సంస్థలు ఏఐ కోసం భారీ మొత్తంలో ఖర్చు చేస్తున్నాయి. కానీ వారు వెచ్చించే సగం ఖర్చుతోనే డీప్సీక్ వస్తోంది. అంతేకాదు.. ఇతర మోడల్స్తో పోల్చితే డీప్సీక్ మాథ్య్స్, జీకే, క్వశ్చన్ అండ్ ఆన్సర్ పర్ఫార్మెన్స్లో కూడా ఎంతో బెటర్గా చేస్తోందని సంస్థ చెబుతోంది.
వెల్లువెత్తిన డౌన్లోడ్స్
ఈ డీప్సీక్కి ప్రపంచవ్యాప్తంగా డౌన్లోడ్స్ వెల్లువెత్తుతున్నాయి. దీంతో అమెరికాలో యాపిల్ యాప్ స్టోర్లో చాట్జీపీటీని వెనక్కి నెట్టి, ఈ డీప్సీక్ ఆర్1 టాప్లో నిలిచింది. డౌన్లోడ్స్ తాకిడిని తట్టుకోలేక యాప్ క్రాష్ కూడా అవ్వడంతో వెంటనే పునరుద్ధరించారు. అయితే ఆ వెంటనే డీప్సీక్ ఐఏ అసిస్ట్పై సైబర్ దాడి జరిగింది. ఈ విషయాన్ని చైనా సంస్థ స్వయంగా ప్రకటించింది. ఫలితంగా.. రిజిస్ట్రేషన్ని తాత్కాలికంగా లిమిట్ చేస్తున్నట్టు సంస్థ వెల్లడించింది.
పనిచేయని అమెరికా మంత్రం
సాంకేతిక ఆధిపత్య రేసులో చైనా ముందుకు వెళ్లకుండా అమెరికా నిరోధిస్తున్నప్పటికీ.. ఇవేవీ పెద్దగా ప్రభావం చూపడంలేదు. చైనా ఆధిపత్యాన్ని నిలువరించేందుకు జీపీయూ సెమీకండక్టర్ల వంటి హై-ఎండ్ టెక్నాలజీలను ఆ దేశానికి ఎగుమతి చేయడాన్ని అమెరికా నిషేధించింది. అయితే ఇవేవీ తమపై పెద్దగా ప్రభావితం చూపవని డీప్సీక్ సక్సెస్తో బహిర్గతమవుతోంది.
పనతమైన అమెరికా సంస్థల షేర్లు
డీప్సీక్ సంచలనంతో అమెరికాలోని దిగ్గజ సంస్థల షేర్లు కుదేలవుతున్నాయి. అమెరికా నాస్డాక్ 3 శాతం పతనమైంది. ఆర్టిఫీషియల్ ఇంటెలిజెన్స్ కోసం భారీ డేటా, టెక్ను రూపొందించే దిగ్గజ కంపెనీ ఎన్విడియా సంస్థ షేర్లు 17శాతం కుప్పకూలాయి. ఒక్క ట్రేడింగ్ సెషన్లోనే ఈ కంపెనీ దాదాపు 600 బిలియన్ డాలర్లను కోల్పోయింది. ఫలితంగా ఎన్ విడియా కార్పొరేషన్ సహ వ్యవస్థాపకుడు జెన్ సెన్ హువాంగ్ సంపద 20.1 బిలియన్ డాలర్లు తగ్గింది. ఇది ఆయన మొత్తం సంపదలో 20 శాతం.
పతనమైన 108 బిలియన్ డాలర్లు
మొత్తంగా టెక్ కంపెనీల యజమానులు, ప్రపంచంలోని అత్యంత ధనువంతుల సంపద ఏకంగా 108 బిలియన్ డాలర్లు పతనమైంది. ఒరాకిల్ కార్పొరేషన్ సహ వ్యవస్థాపకుడు లారీ ఎల్లిసన్ 22.6 బిలియన్ డాలర్లు నష్టపోయారు. ఇది ఆయన మొత్తం సంపదలో 12 శాతం. డెల్ కంపెనీ యజమాని మైకేల్ డెల్ 13 బిలియన్ డాలర్ల నష్టాలు చవిచూశారు. బినాన్స్ హోల్డింగ్స్ లిమిటెడ్ సహవ్యవస్థాపకుడు చాంగ్ పెంగ్ సీజడ్ జావో 12.1 బిలియన్ డాలర్ల సంపద కోల్పోయారు.
చైనాలోని సున్నిత అంశాలపై నో రెస్పాన్స్
ఇతర చైనీస్ ఆర్టిఫిషియల్ ఇంటెలిజెన్స్ మోడల్స్ మాదిరిగానే డీప్సీక్ కూడా చైనాలో సున్నితమైన అంశాలపై స్పందించేందుకు తిరస్కరిస్తోంది. 1989 తియానన్మెన్ స్క్వేర్ నిరసనలు, తైవాన్పై చైనా దురాక్రమణ వంటి సంఘటనల గురించి అడిగిన ప్రశ్నలకు సమాధానం చెప్పకుండా తప్పించుకుంటోంది. చైనా అధ్యక్షుడు జిన్ పింగ్పైనా వ్యాఖ్యానించడానికి నిరాకరించింది.
టాప్ హెడ్ లైన్స్
ట్రెండింగ్ వార్తలు
