Stock Market Rise: ట్రంప్ బెదిరించినా భారతీయ స్టాక్ మార్కెట్ రాకెట్‌లా ఎందుకు పెరిగింది? ఇవే కారణాలు

Stock Market Today: ఈ రోజు మార్కెట్‌ పెరిగినప్పటికీ, దీనిని కొలమానంగా తీసుకోకూడదని, మార్కెట్లో అస్థిరత ఆవిరైపోలేదని నిపుణులు చెబుతున్నారు.

ఐటీ స్టాక్స్‌లో బలమైన రికవరీ

Source : Twitter

Share Market News Today: 2025 ఏప్రిల్ 02వ తేదీ నుంచి భారతదేశం సహా అనేక దేశాలపై ప్రతీకార సుంకాలు విధిస్తామని అమెరికా అధ్యక్షుడు డొనాల్డ్ ట్రంప్ ప్రకటించారు. ఈ రోజు (బుధవారం, 05 మార్చి 2025) మన స్టాక్‌ మార్కెట్ ఓపెన్‌ కావడానికి ముందే ఈ వార్త అందరికీ తెలిసింది. ఇది మార్కెట్‌ను గట్టి దెబ్బ కొడుతుందని, ప్రతికూల ప్రభావం చూపుతుందని అంతా భావించారు. కానీ, అలా జరగలేదు. తానొకటి తలిస్తే మార్కెట్‌ మరొకటి తలిచింది. పడడానికి బదులుగా, ఈ రోజు భారతీయ స్టాక్ మార్కెట్‌ రాకెట్‌ వేగంగా పుంజుకుంది. చాలా రోజుల పతనం బాధ తర్వాత, పెట్టుబడిదార్లకు ఉపశమనం కలిగిన రోజు ఇది. 

మార్నింగ్‌ సెషన్‌లో మార్కెట్‌ పరుగులు పెడుతూనే ఉంది. మధ్యాహ్నం, యూరోపియన్‌ మార్కెట్లు ఓపెన్‌ అయిన తర్వాత కాస్త నెమ్మదించిప్పటికీ, దాదాపు 1% లాభాల్లో కొనసాగింది. మధ్యాహ్నం 2:30 గంటల సమయానికి, BSE సెన్సెక్స్ 684.36 పాయింట్లు లేదా 0.94% పెరిగి 73,831.08 వద్ద ఉండగా, నిఫ్టీ 238.60 పాయింట్లు లేదా 1.08% పెరిగి 22,321.25 వద్ద ట్రేడవుతోంది.

మార్కెట్‌ పెరుగుదలకు ప్రధాన కారణాలు:

ఐటీ స్టాక్స్‌లో బలమైన రికవరీ
ఐటీ కంపెనీల షేర్లు ఈ రోజు మార్కెట్‌కు మద్దతు ఇచ్చాయి. సాబర్ కార్ప్‌తో $1.56 బిలియన్ల ఒప్పందంపై సంతకం చేసిన తర్వాత కోఫోర్జ్ షేర్లు దాదాపు 10 శాతం పెరిగాయి. JP మోర్గాన్ 'హై-కన్విక్షన్ ఐడియాస్ లిస్ట్'లో చేరడంతో ఇన్ఫోసిస్, పెర్సిస్టెంట్ సిస్టమ్స్ షేర్లు కూడా పెరిగాయి. గత 10 సెషన్లలో 8 శాతానికి పైగా పడిపోయిన ఐటీ ఇండెక్స్ ఈ ఒక్క రోజే 2 శాతం లాభపడింది.

ఆసియా మార్కెట్లలో ఆనందం
ఆసియా మార్కెట్లు కూడా పెరుగుదలను చూశాయి. అమెరికా వాణిజ్య కార్యదర్శి గినా రైమోండో చేసిన ప్రకటన మార్కెట్లకు మద్దతు ఇచ్చింది. కెనడా, మెక్సికోలపై విధించిన కొన్ని సుంకాలను ఉపసంహరించుకోవచ్చని ఆ అధికారి చెప్పారు. దీనివల్ల ఆసియా మార్కెట్లలో సానుకూల వాతావరణం ఏర్పడింది. ఇండోనేషియా మార్కెట్ 3 శాతం పెరిగింది, మలేషియా రింగిట్, దక్షిణ కొరియా వోన్ కూడా బలాన్ని చూశాయి.

సర్వీస్‌ సెక్టార్‌లో వృద్ధి
భారతదేశ సేవల రంగం మంచి వృద్ధిని కనబరిచింది. HSBC సర్వీసెస్ PMI (పర్చేజింగ్ మేనేజర్స్ ఇండెక్స్) జనవరిలో 56.5 నుంచి 59.0కి పెరిగింది. ఎగుమతి ఆర్డర్‌ల పెరుగుదల ఈ వృద్ధిలో ముఖ్యమైన పాత్ర పోషించింది.

ట్రంప్‌ టారిఫ్‌లు మార్కెట్‌ను ప్రభావితం చేస్తాయా?
సుంకాల గురించి మార్కెట్లో ఇప్పటికీ ఆందోళనలు ఉన్నాయి. 2025 ఏప్రిల్ 02 నుంచి కొత్త ప్రతీకార సుంకాలు అమల్లోకి వస్తాయని అమెరికా అధ్యక్షుడు డొనాల్డ్ ట్రంప్ ప్రకటించారు. దీనివల్ల ప్రపంచ మార్కెట్లలో గందరగోళం ఏర్పడవచ్చు, భారతీయ మార్కెట్ కూడా దీని ప్రభావానికి లోనుకావచ్చు. అమెరికా సుంకాలకు ప్రతిస్పందనగా కెనడా, చైనా ఇప్పటికే సుంకాల యుద్ధానికి బాకా ఊదాయి.

ఈ రోజు రేస్‌ మార్కెట్‌ పెట్టుబడిదార్లకు కాస్త సంతోషం కలిగించినప్పటికీ, మార్కెట్లో అస్థిరత ఇంకా కొనసాగుతుందని నిపుణులు భావిస్తున్నారు. వాణిజ్య ఉద్రిక్తతలు, సుంకాలకు సంబంధించిన అనిశ్చితి కారణంగా మార్కెట్లో అస్థిరత కొనసాగవచ్చని చెబుతున్నారు.

Disclaimer: ఈ వార్త కేవలం సమాచారం కోసం మాత్రమే. మ్యూచువల్‌ ఫండ్లు, స్టాక్‌ మార్కెట్‌, క్రిప్టో కరెన్సీ, షేర్లు, ఫారెక్స్‌, కమొడిటీల్లో పెట్టే పెట్టుబడులు ఒడుదొడుకులకు లోనవుతుంటాయి. మార్కెట్‌ పరిస్థితులను బట్టి ఆయా పెట్టుబడి సాధనాల్లో రాబడి మారుతుంటుంది. ఫలానా మ్యూచువల్‌ ఫండ్‌, స్టాక్‌, క్రిప్టో కరెన్సీలో పెట్టుబడి పెట్టాలని లేదా ఉపసంహరించుకోవాలని 'abp దేశం' చెప్పడం లేదు. పెట్టుబడి పెట్టే ముందు, లేదా ఉపసంహరించుకునే ముందు అన్ని వివరాలు పరిశీలించడం ముఖ్యం. అవసరమైతే సర్టిఫైడ్‌ ఫైనాన్షియల్‌ అడ్వైజర్ల నుంచి సలహా తీసుకోవడం మంచిది.

మరో ఆసక్తికర కథనం: 8వ వేతన సంఘం ఫార్ములాతో మీ జీతం ఎంత పెరుగుతుందో తెలుసా?