రూ.2,399కే స్మార్ట్ డ్రైవింగ్ అనుభవం - జియో కార్ సింక్ డివైస్ ప్రత్యేకతలు ఇవే!

జియో కార్ సింక్‌తో వైర్డ్ Apple CarPlay & Android Autoను వైర్‌లెస్‌గా మార్చుకోండి. ధర, ఫీచర్లు, సపోర్ట్ చేసే కార్లు, సెటప్ విధానం & ప్రయోజనాలపై పూర్తి వివరాలు తెలుసుకోండి.

తెలుగులో ఆటోమొబైల్‌ వార్తలు

Source : https://x.com/

Jio carsync wireless carplay device: నేటి కార్లలో Apple CarPlay & Android Auto ఫీచర్లు సాధారణంగా మారిపోయాయి. నావిగేషన్, మ్యూజిక్, కాల్స్, మెసేజ్‌లు వంటి అనేక సేవలను కారు ఇన్ఫోటైన్‌మెంట్ స్క్రీన్‌పై సులభంగా ఉపయోగించుకునే అవకాశం ఇవి కల్పిస్తున్నాయి. అయితే చాలా కార్లలో ఈ ఫీచర్లను ఉపయోగించాలంటే ప్రతిసారి ఫోన్‌ను USB కేబుల్‌తో కనెక్ట్ చేయాల్సి ఉంటుంది. కారు స్టార్ట్ చేసిన తర్వాత కనెక్షన్ కోసం ఎదురుచూడడం కొందరికి ఇబ్బందిగా అనిపిస్తుంది.

ఈ సమస్యకు పరిష్కారంగా జియోథింగ్స్ సంస్థ కొత్తగా తీసుకొచ్చిన జియో కార్ సింక్ ‍‌(Jio CarSync) డివైస్ ప్రస్తుతం కార్ యూజర్ల దృష్టిని ఆకర్షిస్తోంది. జియో ప్లాట్‌ఫార్మ్స్‌కు చెందిన ఈ చిన్న డాంగిల్ ద్వారా వైర్డ్ Apple CarPlay & Android Autoను వైర్‌లెస్‌గా మార్చుకోవచ్చు.

ధర ఎంత?

ప్రస్తుతం జియో కార్ సింక్ ప్రముఖ ఈ కామర్స్ వేదికలలో సుమారు రూ.2,399 ధరకు అందుబాటులో ఉంది. ఒకసారి ఫోన్‌ను డివైస్‌తో పెయిర్ చేసిన తర్వాత, ప్రతిసారి కారు స్టార్ట్ చేసిన వెంటనే ఆటోమేటిక్‌గా కనెక్ట్ అవుతుంది. దీంతో USB కేబుల్ అవసరమే రాదు.

ఎలాంటి కార్లలో పనిచేస్తుంది?

జియో కార్ సింక్ కొనుగోలు చేసే ముందు ఒక ముఖ్యమైన విషయం తెలుసుకోవాలి. ఇది ఇప్పటికే ఫ్యాక్టరీ ఫిట్ చేసిన వైర్డ్ Apple CarPlay లేదా Android Auto సపోర్ట్ ఉన్న కార్లలో మాత్రమే ఇది పనిచేస్తుంది.

మీ కారులో ఈ రెండు ఫీచర్లు లేకపోతే ఈ డివైస్ ఉపయోగపడదు. ప్రస్తుతం మార్కెట్లో ఉన్న అనేక ప్రముఖ కార్లలో ఇది సపోర్ట్ చేస్తుంది. ముఖ్యంగా మారుతి బాలెనో, హ్యుందాయ్ క్రెటా, టాటా నెక్సాన్, హోండా సిటీ, స్కోడా స్లావియా, ఎంజీ హెక్టర్ వంటి మోడళ్లలో దీనిని ఉపయోగించవచ్చు.

రోజూ Android Auto లేదా Apple CarPlay ఉపయోగించే డ్రైవర్లకు ఇది ఎంతో ఉపయోగకరమైన యాక్సెసరీ అవుతుంది.

స్పెసిఫికేషన్లు ఎలా ఉన్నాయి?

జియో కార్ సింక్‌లో Bluetooth 5.3తో పాటు 5GHz Wi-Fi సపోర్ట్ అందించారు. వేగవంతమైన & స్థిరమైన కనెక్షన్ కోసం ఈ టెక్నాలజీలు ఉపయోగపడతాయి.

iOS 12 లేదా అంతకంటే పై వెర్షన్ కలిగిన ఐఫోన్లతో పాటు Android 11 లేదా ఆ తర్వాతి వెర్షన్ ఉన్న స్మార్ట్‌ఫోన్లకు ఇది అనుకూలంగా పనిచేస్తుంది.

కనెక్టివిటీ కోసం USB Type-A పోర్ట్‌ను ప్రధానంగా అందించారు. అలాగే Type-C అడాప్టర్ కూడా బాక్స్‌లో ఇవ్వడం మరో ప్రత్యేకత.

డిజైన్ పరంగా చూసినా ఈ డివైస్ ఆకట్టుకుంటుంది. మెటల్ యూనిబాడీ డిజైన్ కారణంగా ఇది సాధారణ ప్లాస్టిక్ డాంగిళ్ల కంటే ప్రీమియంగా కనిపిస్తుంది. చిన్న పరిమాణంలో ఉండటంతో డ్యాష్‌బోర్డ్ దగ్గర ఎక్కువ స్థలం ఆక్రమించదు.

సెటప్ ప్రక్రియ చాలా సులభం

జియో కార్ సింక్‌ను ఉపయోగించడం చాలా ఈజీ. మొదటిసారి డివైస్‌ను కారు USB పోర్ట్‌లో కనెక్ట్ చేయాలి. ఆ తర్వాత ఫోన్‌ను Bluetooth ద్వారా పెయిర్ చేయాలి. ఒక్కసారి సెటప్ పూర్తయిన తర్వాత ప్రతిసారి కారు స్టార్ట్ చేసినప్పుడు ఫోన్ ఆటోమేటిక్‌గా కనెక్ట్ అవుతుంది. కొన్ని Android ఫోన్లలో Wireless Android Auto ఆప్షన్‌ను ముందుగా యాక్టివేట్ చేయాల్సిరావచ్చు. అందువల్ల తొలి సెటప్‌కు కొంత సమయం పట్టే అవకాశం ఉంది. ఒకసారి కనెక్షన్ పూర్తయిన తర్వాత కేవలం కొన్ని సెకన్లలోనే Apple CarPlay లేదా Android Auto యాక్టివ్ అవుతుంది.

ఏ ఫీచర్లు పనిచేస్తాయి?

జియో కార్ సింక్ ద్వారా Google Maps నావిగేషన్, Spotify & ఇతర మ్యూజిక్ యాప్‌లు, ఫోన్ కాల్స్, WhatsApp వాయిస్ రిప్లైలు వంటి ఫీచర్లను సులభంగా ఉపయోగించుకోవచ్చు. అంతేకాకుండా... కారు స్టీరింగ్ వీల్ కంట్రోల్స్, టచ్‌స్క్రీన్ ఇన్‌పుట్‌లు & కారులోని బిల్ట్-ఇన్ మైక్రోఫోన్ కూడా సాధారణంగానే పనిచేస్తాయి. అంటే వైర్డ్ కనెక్షన్‌లో లభించే అనుభవమే వైర్‌లెస్ రూపంలో పొందవచ్చు.

కొనాలా, వద్దా?

ప్రతిరోజూ కారులో Apple CarPlay లేదా Android Auto ఉపయోగించే వారికి జియో కార్‌సింక్ మంచి ఎంపికగా చెప్పవచ్చు. ప్రతిసారి కేబుల్ కనెక్ట్ చేసే ఇబ్బంది లేకుండా, కారు స్టార్ట్ చేసిన వెంటనే ఆటోమేటిక్ కనెక్షన్ లభించడం దీని అతిపెద్ద ప్రయోజనం. ముఖ్యంగా, వైర్ల గందరగోళం లేకుండా క్లీన్ & స్మార్ట్ క్యాబిన్ అనుభవం కోరుకునే వారికి రూ.2,399 ధరలో జియో కార్ సింక్ మంచి విలువను అందించే యాక్సెసరీగా నిలుస్తోంది. 

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.

మరిన్ని చదవండి

Aprilia SR 125, SR 175 బుకింగ్స్ ప్రారంభం- హైదరాబాద్‌లో మిలిటరీ ఎడిషన్ స్కూటీల ధరలివే

మీ కారు సస్పెన్షన్‌ను అర్ధం చేసుకోండి - సింపుల్ నుంచి హైటెక్ వరకు