అమ్మకాల్లో హీరో స్ప్లెండర్, హోండా యాక్టివా హవా! దూసుకుపోతున్న టూ-వీలర్ సేల్స్

ఇండియ‌న్ టూ-వీలర్ మార్కెట్ ఫిబ్రవరి 2026లో 30.56 శాతం వృద్ధితో అదరగొట్టింది. హీరో స్ప్లెండర్, హోండా యాక్టివా అగ్రస్థానాల్లో నిలిచి తమ ఆధిపత్యాన్ని చాటుకున్నాయి.

అమ్మకాల్లో హీరో స్ప్లెండర్, హోండా యాక్టివా హవా

Source : Heromotocorp

ఇండియాలోని టాప్ 10 టూ-వీలర్ మోడళ్లు ఫిబ్రవరి 2026 నెలలో రికార్డు స్థాయి అమ్మకాలను నమోదు చేశాయి. మొత్తం 12,52,889 యూనిట్ల విక్రయాలతో గతేడాది ఫిబ్రవరి (9,59,598 యూనిట్లు) తో పోలిస్తే 30.56 శాతం వృద్ధి సాధించాయి. కమ్యూటర్ మోటార్‌సైకిళ్లు, స్కూటర్లకు పెరిగిన డిమాండ్ ఈ గ్రోత్‌కు ప్రధాన కారణం. ముఖ్యంగా గ్రామీణ ప్రాంతాల్లో కొనుగోళ్లు పెరగడం, సులభమైన ఫైనాన్స్ ఆప్షన్లు అందుబాటులోకి రావడంతో వాహన రంగం జోరు మీదుంది.

మళ్ళీ స్ప్లెండర్, యాక్టివాలదే పైచేయి
హీరో స్ప్లెండర్ దేశంలోనే అత్యధికంగా అమ్ముడైన వాహనంగా తన స్థానాన్ని పదిలం చేసుకుంది. ఫిబ్రవరిలో ఏకంగా 3,21,952 యూనిట్ల అమ్మకాలతో 54.96 శాతం భారీ వార్షిక వృద్ధిని కనబరిచింది. హోండా యాక్టివా 2,54,449 యూనిట్ల సేల్స్‌తో రెండో స్థానంలో నిలిచింది. ఆటోమేటిక్ స్కూటర్ సెగ్మెంట్‌లో యాక్టివాకు తిరుగులేదని ఈ గణాంకాలు నిరూపిస్తున్నాయి. పట్టణ ప్రాంతాలతో పాటు పల్లెటూర్లలో కూడా ఈ స్కూటర్ క్రేజ్ ఏమాత్రం తగ్గలేదు. హోండా షైన్ 1,71,360 యూనిట్లతో మూడో స్థానంలో ఉండగా, టీవీఎస్ జూపిటర్ 1,27,089 యూనిట్ల విక్రయాలతో నాలుగో స్థానాన్ని దక్కించుకుంది. స్పోర్టీ లుక్ ఇష్టపడే వారి ఛాయిస్ అయిన బజాజ్ పల్సర్ సిరీస్ 1,11,617 యూనిట్ల అమ్మకాలతో ఐదో స్థానంలో నిలిచింది.

మిడ్-సెగ్మెంట్ మోడళ్ల జోరు
హీరో హెచ్ఎఫ్ డీలక్స్ 71,717 యూనిట్ల సేల్స్ నమోదు చేయగా, ప్రీమియం స్కూటర్ ఆప్షన్ అయిన సుజుకి యాక్సెస్ 70,137 యూనిట్ల అమ్మకాలతో తన పట్టును నిరూపించుకుంది. టీవీఎస్ అపాచీ 45,166 యూనిట్లతో 19 శాతం వృద్ధిని సాధించింది. మరోవైపు టీవీఎస్ ఎక్స్ఎల్ (XL) మోపెడ్ అమ్మకాలు 34.32 శాతం పెరిగి 45,095 యూనిట్లకు చేరుకోవడం విశేషం. ఇది గ్రామీణ మార్కెట్‌లో ఉన్న డిమాండ్‌ను ప్రతిబింబిస్తోంది. చివరగా రాయల్ ఎన్‌ఫీల్డ్ క్లాసిక్ 350 మోడల్ 34,307 యూనిట్ల విక్రయాలతో టాప్ 10 జాబితాలో చోటు సంపాదించుకుంది. మిడ్-సైజ్ బైక్ సెగ్మెంట్‌లో దీని పర్ఫార్మెన్స్ స్థిరంగా కొనసాగుతోంది. మొత్తంగా చూస్తే, వాహనదారుల అవసరాలకు తగ్గట్లుగా కంపెనీలు కొత్త మోడళ్లను తీసుకురావడం, మెరుగైన సేవలందించడం వల్ల టూ-వీలర్ మార్కెట్ కొత్త పుంతలు తొక్కుతోంది.