క్రాస్ఓవర్ లుక్‌, పెద్ద స్క్రీన్లు, కొత్త ప్లాట్‌ఫామ్‌! ఫోర్త్‌ జనరేషన్ Hyundai i20లో ఇవే హైలైట్స్‌
హ్యుందాయ్ i20 నాలుగో జనరేషన్ మోడల్‌ను బ్రెజిల్‌లో ఆవిష్కరించారు. కొత్త డిజైన్‌, పెద్ద స్క్రీన్లు, K3 ప్లాట్‌ఫామ్‌, ADAS ఫీచర్లతో వచ్చిన ఈ కారు ప్రస్తుత i20తో పోలిస్తే ఎలా భిన్నంగా ఉందో తెలుసుకోండి.
Hyundai i20 third-gen vs fourth-gen: హ్యుందాయ్ కంపెనీ, తన ప్రముఖ ప్రీమియం హ్యాచ్‌బ్యాక్‌ i20కు సంబంధించిన నాలుగో జనరేషన్ మోడల్‌ను బ్రెజిల్‌లో అధికారికంగా ఆవిష్కరించింది. ప్రస్తుతం భారత మార్కెట్లో అమ్ముడవుతున్న మూడో జనరేషన్ i20తో పోలిస్తే ఈ కొత్త మోడల్‌ డిజైన్‌, టెక్నాలజీ, ప్లాట్‌ఫామ్‌, ఫీచర్ల పరంగా గణనీయమైన మార్పులతో వచ్చింది.
డిజైన్‌లో భారీ మార్పులు
కొత్త i20ను చూస్తే ఇది సాధారణ హ్యాచ్‌బ్యాక్‌ కంటే క్రాస్ఓవర్ తరహాలో కనిపిస్తుంది. బాడీ క్లాడింగ్‌, ఎత్తైన ఫ్రంట్‌ డిజైన్‌, బోల్డ్‌ లైన్స్ కారణంగా SUV తరహా లుక్‌ను సొంతం చేసుకుంది.
ముందు భాగంలో Y-ఆకారపు LED డే టైమ్ రన్నింగ్ లైట్లు, కనెక్టెడ్‌ LED హెడ్‌ల్యాంప్స్‌, పెద్ద హెక్సాగనల్‌ గ్రిల్‌ ప్రత్యేక ఆకర్షణగా నిలుస్తున్నాయి. పక్క భాగంలో కొత్త అలాయ్ వీల్స్‌, ఏటవాలుగా పైకి ఎగసిన విండో లైన్‌, బాక్సీ ప్రొఫైల్‌ కనిపిస్తాయి.
వెనుక భాగంలో కనెక్టెడ్‌ LED టెయిల్‌ల్యాంప్స్‌, కొత్త బంపర్‌, సిల్వర్‌ డిఫ్యూజర్‌ డిజైన్‌ కారుకు మరింత ప్రీమియం లుక్‌ను అందిస్తున్నాయి.
సైజ్‌ కూడా పెరిగింది
ఫోర్త్‌ జనరేషన్ i20 పొడవు 4,130 మిల్లీమీటర్లు, వెడల్పు 1,780 మిల్లీమీటర్లు. ఇది ప్రస్తుత i20 కంటే 135 మిల్లీమీటర్లు పొడవుగా, 5 మిల్లీమీటర్లు వెడల్పుగా ఉంది. అయితే వీల్‌బేస్‌ మాత్రం 2,580 మిల్లీమీటర్లుగానే కొనసాగింది.
భారతదేశంలో ఉన్న సబ్‌-4 మీటర్‌ ట్యాక్స్‌ ప్రయోజనాలు ఈ మోడల్‌కు వర్తించకపోవచ్చు. అందుకే భారత్‌లో విడుదలయ్యే వెర్షన్‌ డిజైన్‌లో కొన్ని మార్పులు ఉండే అవకాశం ఉంది.
క్యాబిన్‌లో హైటెక్‌ ఫీచర్లు
ఇంటీరియర్‌లో కూడా పెద్ద మార్పులు చోటుచేసుకున్నాయి. కొత్త i20లో రెండు 12.3 అంగుళాల డిజిటల్‌ స్క్రీన్లు, కొత్త స్టీరింగ్‌ వీల్‌, మెరుగైన గ్రాఫిక్స్‌తో కూడిన డిజిటల్‌ క్లస్టర్‌ అందుబాటులో ఉన్నాయి.
సెంటర్‌ కన్సోల్‌ మరింత అడ్వాన్స్‌డ్‌గా ఉండగా, క్యాపాసిటివ్‌ AC కంట్రోల్స్‌, వైర్‌లెస్‌ ఆండ్రాయిడ్‌ ఆటో, ఆపిల్‌ కార్‌ప్లే, OTA అప్‌డేట్స్‌, లెవల్‌-2 ADAS వంటి అధునాతన ఫీచర్లు కూడా ఇందులో ఉన్నాయి.
అలాగే బూట్‌ స్పేస్‌ 346 లీటర్లకు పెరిగింది. ఇది ప్రస్తుత i20 కంటే 35 లీటర్లు ఎక్కువ.
కొత్త K3 ప్లాట్‌ఫామ్‌
నాలుగో జనరేషన్ i20ని హ్యుందాయ్ తాజా K3 ప్లాట్‌ఫామ్‌పై రూపొందించారు. ఇదే ప్లాట్‌ఫామ్‌ను కొత్త తరం Kia Seltosలో కూడా ఉపయోగిస్తున్నారు. భద్రత, స్థిరత్వం పరంగా ఇది మెరుగ్గా ఉంటుందని భావిస్తున్నారు.
ఇంజిన్‌ ఎంపికలు
బ్రెజిల్‌ మార్కెట్లో కొత్త i20 రెండు 1.0 లీటర్‌ 3-సిలిండర్‌ ఇంజిన్‌ ఆప్షన్లతో అందుబాటులోకి రానుంది. ఒకటి నేచురల్లీ ఆస్పిరేటెడ్‌, మరొకటి టర్బో పెట్రోల్‌ యూనిట్‌. ఇవి E30 (30 శాతం ఇథనాల్‌ మిశ్రమం) ఇంధనంతో కూడా పనిచేస్తాయి.
టర్బో ఇంజిన్‌ 115 hp పవర్‌, 172 Nm టార్క్‌ ఉత్పత్తి చేస్తుంది. దీనికి 6-స్పీడ్‌ ఆటోమేటిక్‌ గేర్‌బాక్స్‌ జతచేశారు. ప్రస్తుతం భారత మార్కెట్లో ఉన్న i20 మాత్రం 1.2 లీటర్‌ పెట్రోల్‌ ఇంజిన్‌తో మాత్రమే విక్రయిస్తున్నారు.
మొత్తంగా...
కొత్త Hyundai i20 డిజైన్‌, ఫీచర్లు, టెక్నాలజీ పరంగా పూర్తిగా కొత్త దిశలో అడుగులు వేస్తోంది. క్రాస్ఓవర్ స్టైల్‌, పెద్ద స్క్రీన్లు, ADAS, కొత్త ప్లాట్‌ఫామ్‌ వంటి అప్‌డేట్స్‌తో ప్రీమియం హ్యాచ్‌బ్యాక్‌ సెగ్మెంట్‌లో మరింత పోటీని పెంచే అవకాశాలు కనిపిస్తున్నాయి. అయితే భారత మార్కెట్‌కు ఇదే రూపంలో వస్తుందా లేదా అనే విషయంపై హ్యుందాయ్ నుంచి ఇంకా అధికారిక ప్రకటన వెలువడాల్సి ఉంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
