కొత్తగా డ్రైవింగ్ లైసెన్స్ తీసుకునేవారికి అలర్ట్.. ఇకపై 75 శాతం మార్కులు తప్పనిసరి! కేంద్రం ప్రతిపాదన
డ్రైవింగ్ లైసెన్స్ నిబంధనల్లో మార్పులకు కేంద్రం ప్రతిపాదనలు చేసింది. డ్రైవింగ్ పరీక్షలో 75% అర్హత మార్కులు, 30 నిమిషాల శిక్షణ, కొన్ని ఆన్‌లైన్ సేవలకు ఫీజు మినహాయింపు వంటి అంశాలు ఇందులో ఉన్నాయి.
Driving licence new rules 2026: మన దేశంలో డ్రైవింగ్ లైసెన్స్ పొందాలనుకునేవారికి కేంద్ర ప్రభుత్వం కీలక ప్రతిపాదనలు చేసింది. ఇకపై డ్రైవింగ్ టెస్ట్‌లో అర్హత సాధించాలంటే గతం కంటే ఎక్కువ మార్కులు తెచ్చుకోవాల్సి రావచ్చు. ప్రస్తుతం 60%గా ఉన్న అర్హత మార్కులను 75%కు పెంచాలని కేంద్ర రోడ్డు రవాణా & రహదారుల మంత్రిత్వ శాఖ (MoRTH) ప్రతిపాదించింది. ఈ మార్పులు అమల్లోకి వస్తే, డ్రైవింగ్ లైసెన్స్ కోసం దరఖాస్తు చేసుకునేవారు కొత్త నిబంధనలకు అనుగుణంగా పరీక్షకు సిద్ధం కావాల్సి ఉంటుంది.
అయితే, ఇవి ఇంకా ప్రతిపాదనల దశలోనే ఉన్నాయి. కొత్త నిబంధనలపై ప్రజలు, సంబంధిత వర్గాల నుంచి అభిప్రాయాలు సేకరించిన తర్వాత కేంద్ర ప్రభుత్వం తుది నిర్ణయం తీసుకోనుంది.
30 నిమిషాల శిక్షణ తప్పనిసరి!
డ్రైవింగ్ లైసెన్స్ నిబంధనల్లో భాగంగా సురక్షిత డ్రైవింగ్ పాఠ్యాంశాల శిక్షణకు కనీస సమయాన్ని కూడా నిర్ణయించాలని కేంద్రం ప్రతిపాదించింది. ఈ శిక్షణ కనీసం 30 నిమిషాల పాటు కొనసాగాలి. రహదారి భద్రత, ట్రాఫిక్ నిబంధనలు, సురక్షితంగా వాహనాలు నడపడం వంటి అంశాలపై దరఖాస్తుదారులకు అవగాహన కల్పించడం ఈ విధానం ఉద్దేశంగా కనిపిస్తోంది.
ప్రస్తుతం ఉన్న 60% అర్హత మార్కులను 75%కు పెంచే ప్రతిపాదన అమల్లోకి వస్తే, పరీక్షలో ఉత్తీర్ణత సాధించేందుకు మరింత శ్రద్ధ పెట్టాల్సి ఉంటుంది. అయితే, పరీక్ష నిర్వహణకు సంబంధించిన పూర్తి వివరాలపై తుది నిబంధనల్లో స్పష్టత వస్తుంది.
లైసెన్స్ వివరాల మార్పునకు 15 రోజుల గడువు
డ్రైవింగ్ లైసెన్స్‌లో పేరు, చిరునామా వంటి వ్యక్తిగత వివరాలను మార్చుకోవాలనుకునేవారికి కూడా కేంద్రం కీలక ప్రతిపాదన చేసింది. ఇలాంటి దరఖాస్తులపై లైసెన్సింగ్ అధికారులు 15 రోజుల్లోగా నిర్ణయం తీసుకోవాలని సూచించింది. దరఖాస్తును ఆమోదిస్తారా? తిరస్కరిస్తారా? అనే విషయాన్ని నిర్ణీత గడువులోగా తెలియజేయాల్సి ఉంటుంది. ఒకవేళ దరఖాస్తును తిరస్కరిస్తే, అందుకు గల కారణాలను కూడా స్పష్టంగా వెల్లడించాలి. సంబంధిత అధికారులు 15 రోజుల్లోగా ఏ నిర్ణయం తీసుకోకపోతే, ఆ దరఖాస్తు ఆమోదం పొందినట్లు భావించాలి. ఈ నిబంధన అమల్లోకి వస్తే దరఖాస్తుదారులు తమ దరఖాస్తుల స్టేటస్‌ను స్పష్టంగా తెలుసుకునే అవకాశం ఉంటుంది.
ఇది కూడా చదవండి: స్పోర్టీ లుక్‌తో వచ్చిన ఏప్రిలియా SXR GT 175 మ్యాక్సీ స్కూటర్.. ఇంజిన్, ఫీచర్లు, సౌకర్యం ఎలా ఉన్నాయి?
పేరు, చిరునామా మార్పునకు ఫీజు ఉండదా?
డ్రైవింగ్ లైసెన్స్‌లో వ్యక్తిగత వివరాలను మార్చుకునేవారికి మరో ఊరట కల్పించే ప్రతిపాదనను కూడా కేంద్రం తీసుకొచ్చింది. పేరు, చిరునామా వంటి వివరాల మార్పునకు ప్రస్తుతం వసూలు చేస్తున్న ఫీజ్‌లను తొలగించాలని ప్రతిపాదించింది. అలాగే, ఆధార్ ధ్రువీకరణతో పూర్తి చేసే కొన్ని ఆన్‌లైన్ లైసెన్స్ సేవలకు ఫీజు మినహాయింపు ఇవ్వాలని సూచించింది. ఈ ప్రతిపాదన అమల్లోకి వస్తే అర్హత కలిగిన సేవలను ఆన్‌లైన్‌లో పొందేవారికి ఖర్చు తగ్గే అవకాశం ఉంటుంది. అయితే, ఏయే సేవలకు మినహాయింపు వర్తిస్తుంది? ఏ నిబంధనల ప్రకారం ఈ సదుపాయం అందుతుంది? అనే వివరాలు తుది నిబంధనల్లో స్పష్టమవుతాయి.
గుర్తింపు పత్రాల జాబితాలో ఇవి కూడా!
డ్రైవింగ్ లైసెన్స్ కోసం దరఖాస్తు చేసుకునేవారు సమర్పించాల్సిన తమ గుర్తింపు, వయస్సు, నివాస ధ్రువీకరణ పత్రాల గురించి కూడా ముసాయిదా నిబంధనల్లో పేర్కొన్నారు. ఆధార్ కార్డు, పాస్‌పోర్టు, ఓటరు గుర్తింపు కార్డు, ఈ-రేషన్ కార్డు, జనన ధ్రువపత్రం వంటి పత్రాలను సంబంధిత అవసరాలకు అనుగుణంగా సమర్పించవచ్చు. ఈ జాబితాలో ఇతర పత్రాలు కూడా ఉన్నాయి. దరఖాస్తుదారులు తమ అవసరానికి సరిపోయే ధ్రువీకరణ పత్రాలను సిద్ధం చేసుకోవాలి.
లైసెన్స్ కార్డు రూపంలోనే జారీ!
డ్రైవింగ్ లైసెన్స్ జారీ, పునరుద్ధరణ విషయంలోనూ కేంద్రం మార్పులను ప్రతిపాదించింది. లైసెన్సింగ్ అధికారులు జారీ చేసే లేదా పునరుద్ధరించే ప్రతి డ్రైవింగ్ లైసెన్స్‌ను ఫారం 7 ప్రకారం లామినేటెడ్ కార్డు లేదా పాలీవినైల్ క్లోరైడ్ (PVC) కార్డు రూపంలో అందించాలని పేర్కొంది. ఈ ప్రతిపాదన ద్వారా లైసెన్స్ జారీ విధానంలో ఒక నిర్దిష్ట కార్డు రూపాన్ని అమలు చేయాలని కేంద్రం భావిస్తోంది.
ఇది కూడా చదవండి: 39hp పవర్.. ట్విన్ సిలిండర్ ఇంజిన్.. కేటీఎం డ్యూక్‌కు పోటీ.. Kawasaki Z300 గురించి ఇంకా మీకేం తెలుసు?
30 రోజుల్లో అభిప్రాయాలు తెలియజేయాలి
కేంద్ర రోడ్డు రవాణా & రహదారుల మంత్రిత్వ శాఖ ఈ మార్పులను కేంద్ర మోటారు వాహనాల నిబంధనలకు సంబంధించిన ముసాయిదా సవరణల్లో పొందుపరిచింది. ఈ ప్రతిపాదనలపై సంబంధిత వర్గాలు తమ అభ్యంతరాలు, సూచనలను తెలియజేయడానికి 30 రోజుల గడువు ఇచ్చింది. ప్రజల నుంచి వచ్చే అభిప్రాయాలను పరిశీలించిన తర్వాతే కేంద్ర ప్రభుత్వం తదుపరి చర్యలు తీసుకోనుంది. అప్పటివరకు ఈ మార్పులను అమల్లోకి వచ్చిన నిబంధనలుగా భావించకూడదు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
