2026 టాటా పంచ్‌ ఫేస్‌లిఫ్ట్‌ రివ్యూ: కొత్త ఇంజిన్‌ పవర్‌ ఎంత?, ఉపయోగపడే ఫీచర్లు ఇచ్చారా?
2026 Tata Punch Facelift కొత్త టర్బో పెట్రోల్‌ ఇంజిన్‌, అప్‌డేటెడ్‌ డిజైన్‌, లేటెస్ట్‌ ఫీచర్లతో మార్కెట్‌లోకి వచ్చింది. డ్రైవింగ్ అనుభవం నుంచి ధర వరకు పూర్తి రివ్యూ తెలుసుకోండి.
2026 Tata Punch Facelift Review: ఐదేళ్ల ప్రయాణం, ఏడు లక్షలకుపైగా కస్టమర్లు. టాటా మోటార్స్‌కు Tata Punch అంత పెద్ద సక్సెస్‌ అనడానికి ఇవే సరైన ఉదాహరణలు. అయితే కాలం మారింది, కస్టమర్‌ అంచనాలు కూడా పెరిగాయి. అందుకే 2026లో టాటా పంచ్‌కు మిడ్‌-లైఫ్‌ అప్‌డేట్‌ తప్పనిసరి అయింది. కొత్త ఇంజిన్‌, తాజా డిజైన్‌, మరిన్ని ఫీచర్లతో 2026 Tata Punch Facelift మార్కెట్‌లోకి అడుగుపెట్టింది.
2026 Tata Punch Facelift: ఇంజిన్‌ & గేర్‌బాక్స్‌
ఈ ఫేస్‌లిఫ్ట్‌లో పెద్ద అప్‌డేట్‌ అంటే కొత్త 1.2 లీటర్‌ టర్బో పెట్రోల్‌ ఇంజిన్‌. టాటా నెక్సాన్‌లో ఇప్పటికే నిరూపించుకున్న ఈ 3-సిలిండర్‌ ఇంజిన్‌ ఇప్పుడు పంచ్‌లోకి వచ్చింది. ఇది 120 హార్స్‌పవర్‌, 170 Nm టార్క్‌ ఉత్పత్తి చేస్తుంది. దీనితో పాటు 6-స్పీడ్‌ మాన్యువల్‌ గేర్‌బాక్స్‌ మాత్రమే లభిస్తుంది.
ఇప్పటికే ఉన్న 1.2 లీటర్‌ న్యాచురల్‌ ఆస్పిరేటెడ్‌ పెట్రోల్‌ ఇంజిన్‌ కూడా కొనసాగుతోంది. ఇది పెట్రోల్‌లో 88 హార్స్‌పవర్‌, 115 Nm, CNG మోడ్‌లో 73 హార్స్‌పవర్‌, 103 Nm ఇస్తుంది. దీనికి 5-స్పీడ్‌ మాన్యువల్‌, 5-స్పీడ్‌ AMT ఆప్షన్లు ఉన్నాయి.
టర్బో పెట్రోల్‌ డ్రైవింగ్ అనుభవం
రూ.10 లక్షల లోపు సెగ్మెంట్‌లో ఇది అత్యంత శక్తిమంతమైన ఇంజిన్‌లలో ఒకటి. స్టార్ట్‌ చేసిన క్షణం నుంచే పంచ్‌ షార్ప్‌గా స్పందిస్తుంది. 2,000 rpm దాటాక ఇంజిన్‌ పూర్తి ఉత్సాహంతో పుల్‌ ఇస్తుంది. ఓవర్‌టేకింగ్‌, అకస్మాత్తుగా వేగం పెంచాల్సిన సందర్భాల్లో ఇది బాగా సహాయపడుతుంది.
అయితే హార్డ్‌గా రేవ్‌ చేసినప్పుడు ఫ్లోర్‌ దగ్గర కొద్దిగా వైబ్రేషన్లు కనిపిస్తాయి. NVH లెవెల్స్‌ ఇంకా మెరుగుపర్చవచ్చు. హైవేలో మాత్రం ట్రిపుల్‌ డిజిట్‌ స్పీడ్స్‌ సులభంగా చేరుతుంది. గేర్‌బాక్స్‌ కొద్దిగా రఫ్‌గా అనిపిస్తుంది. క్లచ్‌ ట్రావెల్‌ ఎక్కువగా ఉండటంతో సిటీ ట్రాఫిక్‌లో ఎడమ కాలు అలసిపోవచ్చు.
CNG AMT & ప్యాడిల్‌ షిఫ్టర్స్‌
CNG కారులో ప్యాడిల్‌ షిఫ్టర్స్‌ అవసరమా అనే సందేహం మొదట వస్తుంది. కానీ రియల్‌ వరల్డ్‌లో ఇవి నిజంగా ఉపయోగపడతాయి. CNG మోడ్‌లో ఇంజిన్‌ పనితీరు మితంగా ఉంటుంది. ఇక్కడ ఫ్యూయల్‌ ఎఫిషియెన్సే ప్రాధాన్యం.
AMTలో గేర్‌ లీవర్‌ మార్చాల్సిన అవసరం లేకుండా ప్యాడిల్స్‌ ద్వారా గేర్‌ కంట్రోల్‌ లభించడం పెద్ద ప్లస్‌. ఓవర్‌టేక్‌ సమయంలో 5,500 rpm వరకూ గేర్‌ను పట్టుకోవచ్చు. ఈ సెగ్మెంట్‌లో ఇది మంచి డ్రైవింగ్ కంట్రోల్‌ ఇస్తుంది. NVH కూడా ఇక్కడ మెరుగ్గా ఉంటుంది.
రైడ్‌ & హ్యాండ్లింగ్‌
రూ.10 లక్షల లోపు ధరలో, బ్యాడ్‌ రోడ్లపై బెస్ట్‌ డ్రైవింగ్ క్వాలిటీ ఇవ్వగల కారు పంచ్‌ అని చెప్పొచ్చు. దీని సస్పెన్షన్‌.. గుంటలు, బ్రేకర్లు సులభంగా తట్టుకుంటుంది. 190 mm గ్రౌండ్‌ క్లియరెన్స్‌, 16 అంగుళాల వీల్స్‌, 400 mm వాటర్‌ వేడింగ్‌ సామర్థ్యంతో చెడు రోడ్లపై ధైర్యం ఇస్తుంది. స్టీరింగ్‌ బాగా వెయిటెడ్‌గా ఉన్నా, సెంటర్‌ దగ్గర కొద్దిగా వాగ్‌నెస్‌ ఉంటుంది. ఎత్తైన బాడీ కారణంగా కార్నర్లలో బాడీ రోల్‌ కనిపిస్తుంది.
డిజైన్‌ మార్పులు
ముందు ఉన్న భారీ హాలోజన్‌ యూనిట్ల స్థానంలో ఇప్పుడు వర్టికల్‌గా అమర్చిన LED హెడ్‌ల్యాంప్స్‌, స్లిమ్‌ DRLs వచ్చాయి. వెనుక కనెక్టెడ్‌ లైట్‌ బార్‌ కొత్తగా కనిపిస్తుంది. బ్లాక్‌-సిల్వర్‌ బంపర్‌ డిజైన్‌ కారు లుక్‌ను షార్ప్‌గా మార్చింది. సైడ్‌ ప్రొఫైల్‌ పెద్దగా మారలేదు. బ్లాక్‌ క్లాడింగ్‌ మాత్రం ఇంకా ఎక్కువగానే ఉంది.
క్యాబిన్‌ & ఫీచర్లు
10.25 అంగుళాల టచ్‌స్క్రీన్‌, వైర్‌లెస్‌ Android Auto, Apple CarPlay, కనెక్టెడ్‌ ఫీచర్లు ఉన్నాయి. టాప్ వేరియంట్లలో సన్‌రూఫ్‌, వైర్‌లెస్‌ ఛార్జర్‌, హార్మన్‌ ఆడియో, 360 డిగ్రీ కెమెరా లభిస్తాయి. కొత్త డెనిమ్‌ ఫాబ్రిక్‌ సీట్లు, మెరుగైన అండర్‌-థై సపోర్ట్‌ కంఫర్ట్‌ను పెంచాయి. బూట్‌ స్పేస్‌ CNGతో 210 లీటర్లు, లేకపోతే 366 లీటర్లు.
ఎక్స్‌-షోరూమ్‌ ధర రూ.5.59 లక్షల నుంచి రూ.10.54 లక్షల వరకు ఉన్న ఈ పంచ్‌ ఫేస్‌లిఫ్ట్‌ ఇప్పుడు Swift, Baleno, Fronx, Exter, Kiger, Magniteలకు గట్టి పోటీ ఇస్తుంది. మైలేజ్‌లో మారుతి ముందుంటే.... రైడ్‌ క్వాలిటీ, భద్రత (5-స్టార్‌ Bharat NCAP)లో పంచ్‌ బలంగా నిలుస్తుంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
