Secret Marriage: భార్యకు తెలియకుండా భర్త సీక్రెట్ పెళ్లి, సరిగ్గా తాళి కట్టే టైంకి అవాక్కైన ఫ్యామిలీ!

భార్యకు తెలియకుండా భర్త రెండో పెళ్లి చేసుకుంటుండగా భార్యే అతడిని రెడ్‌ హ్యాండెడ్‌గా పట్టుకున్న ఘటన ఆదివారం జరిగింది.

ప్రతీకాత్మక చిత్రం

భార్యకు తెలియకుండా గుట్టుగా మరో మహిళను పెళ్లి చేసుకుంటున్న వ్యక్తి బాగోతం తాజాగా బయటపడింది. రహస్యంగా జరుగుతున్న పెళ్లిని భార్యే గుర్తించి మధ్యలోనే నిలిపి వేయించింది. తనకు తెలియకుండానే మరో మహిళను పెళ్లి చేసుకుంటున్నాడని భార్య ఆవేదన చెందింది. భర్త తనకు తెలియకుండా ఇలా రెండో పెళ్లి చేసుకొనేందుకు యత్నించడం ఇదేం మొదటిసారి కాదని, గతంలో రెండుసార్లు గుట్టుగా పెళ్లి చేసుకుంటుంటే తాను ఆపేసినట్లుగా తెలిపింది. క్రిష్ణా జిల్లా పెనుగంచిప్రోలులో ఈ ఘటన చోటు చేసుకుంది.

పోలీసులు, స్థానికులు వెల్లడించిన వివరాల ప్రకారం.. భార్యకు తెలియకుండా భర్త రెండో పెళ్లి చేసుకుంటుండగా భార్యే అతడిని రెడ్‌ హ్యాండెడ్‌గా పట్టుకున్న ఘటన ఆదివారం జరిగింది. నిందితుడిది తెలంగాణలోని నల్గొండ జిల్లా. భువనగిరి ప్రాంతానికి చెందిన చెరుకుమల్లి మధు బాబు అనే వ్యక్తికి హైదరాబాద్‌ బోడుప్పల్‌కు చెందిన సరిత అనే యువతితో నాలుగేళ్ల క్రితమే వివాహం జరిగింది. కొన్నేళ్లకు అత్తగారింటి వారు వరకట్న వేధింపులకు పాల్పడ్డారు. దీంతో గత మూడేళ్లుగా సరిత పుట్టింటికి వచ్చేసి తల్లిదండ్రుల దగ్గరే ఉంటూ ఉంది. తనపై వరకట్న వేధింపులకు పాల్పడ్డారని భువనగిరి పోలీస్‌ స్టేషన్‌లో సరిత అప్పుడే కేసు పెట్టింది. ప్రస్తుతం ఆ కేసు కోర్టులో విచారణ దశలో ఉంది.

ఇదిలా ఉండగా.. భర్త మధుబాబు గతంలో రెండు సార్లు వివాహం చేసుకోబోగా భార్య సరిత అడ్డుకుంది. ఈ సారి మధుబాబు కోదాడ సమీపంలోని గ్రామానికి చెందిన యువతితో పెళ్లి నిశ్చయించుకుని పెళ్లి చేసుకునేందుకు ఆదివారం పెనుగంచిప్రోలు తిరుపతమ్మ ఆలయానికి వచ్చారు. ఆలయంలో పెద్ద తిరునాళ్లు కావడంతో భక్తుల సంఖ్య ఎక్కువగా ఉంది. అక్కడే ఉండే బేడా మండపంలో వివాహం గుట్టుగా జరుగుతుండగా.. సరిత ఆమె కుటుంబ సభ్యులు ఒక్కసారిగా పెళ్లి కొడుకు మధుబాబుపై మెరుపు దాడి చేశారు. వెంటనే వివాహాన్ని అడ్డుకున్నారు. 

గతంలో జరిగిన వివాహం గురించి పెళ్లి కుమార్తె కుటుంబ సభ్యులకు వీరంతా చెప్పడంతో.. వారు మధుబాబు కుటుంబ సభ్యులపై మండి పడి అక్కడి నుంచి తిట్టుకుంటూ వెళ్లిపోయారు. మధుబాబును పోలీస్‌ స్టేషన్‌కు తీసుకువచ్చి జరిగిన విషయాన్ని పోలీసులకు వివరించారు. తర్జనభర్జనల అనంతరం ఇప్పటికే భువనగిరి పోలీస్‌ స్టేషన్‌లో కేసు విచారణలో ఉన్నందున పెనుగంచిప్రోలులో కేసు అవసరం లేదని వెళ్లిపోయినట్లుగా పోలీసులు వెల్లడించారు.