Bhuvaneshwari Mulakat Application Rejected: చంద్రబాబుతో భువనేశ్వరి ములాఖత్‌ నిరాకరణ - కారణం వెల్లడించిన రాజమండ్రి జైలు అధికారులు

Bhuvaneshwari Mulakat Application Rejected: రాజమండ్రి సెంట్రల్ జైలులో ఉన్న మాజీ సీఎం చంద్రబాబును కలిసేందుకు ఆయన సతీమణి నారా భువనేశ్వరికి అనుమతి లభించలేదు.

చంద్రబాబుతో భువనేశ్వరి ములాఖత్‌ నిరాకరణ

Bhuvaneshwari Mulakat Application Rejected: : ఏపీ స్కిల్ డెవలప్ మెంట్ కేసులో అరెస్టై రాజమండ్రి సెంట్రల్ జైలులో ఉన్న మాజీ సీఎం చంద్రబాబును కలిసేందుకు ఆయన సతీమణి నారా భువనేశ్వరికి అనుమతి లభించలేదు. తన భర్త చంద్రబాబును ఇటీవల కలిసిన భువనేశ్వరి మరోసారి ములాఖత్ అయ్యేందుకు దరఖాస్తు చేసుకోగా, జైలు అధికారులు తిరస్కరించారు. వారానికి మూడు సార్లు ములాఖత్‍కు అవకాశం ఉన్నప్పటికీ అధికారులు తిరస్కరించారని నారా భువనేశ్వరి ఆవేదన వ్యక్తం చేస్తున్నారు. ఈ విషయంపై రాజమండ్రి జైలులో ములాఖత్ పై జైళ్ల శాఖ స్పష్టత ఇచ్చింది.

నారా భువనేశ్వరి ఆర్పీ నెంబర్ 7691 చంద్రబాబుతో గురువారం మధ్యాహ్నం 12 గంటలకు రాజమండ్రి జైలులో ములాఖత్ అయ్యేందుకు దరఖాస్తు చేసుకున్నారని తెలిపారు. అయితే వారానికి రెండు ములాఖత్ లు మాత్రమే ఉంటాయని, ఆ నిబంధన కారణంగానే భువనేశ్వరిని చంద్రబాబును కలిసేందుకు ఈ వారం మరోసారి అనుమతించలేమని పత్రికా ప్రకటనలో పేర్కొన్నార.

సాధారణంగా ఒక రిమాండ్ ముద్దాయికి ఒక వారంలో రెండు ములాఖత్ లకు మాత్రమే అవకాశం ఉంటుంది. అందులోనూ ఒక ములాఖత్ లో ముగ్గురు సందర్శకులకు మాత్రమే అనుమతి ఇవ్వనున్నారు.

రిమాండ్ ముద్దాయి చంద్రబాబు సెప్టెంబర్ 11న రాజమండ్రి జైలుకు వచ్చారు. ఆయన ఈ వారం రెండు ములాఖత్ లు ఇప్పటికే వినయోగించుకున్నారు. సెప్టెంబర్ 12న భార్య నారా భువనేశ్వరి, కుమారుడు నారా లోకేష్, కోడలు నారా బ్రాహ్మణి చంద్రబాబుతో ములాఖత్ అయ్యారు.  అనంతరం సెప్టెంబర్ 14న జరిగిన రెండో ములాఖత్ లో భాగంగా ఆయన తనయుడు నారా లోకేష్, వియ్యంకుడు, టీడీపీ ఎమ్మెల్యే బాలకృష్ణ, జనసేన అధినేత పవన్ కళ్యాణ్ లు చంద్రబాబును కలిసి పరామర్శించారు. దాంతో జైలులో ఓ ముద్దాయిని కలిసేందుకు వారంలో ఉన్న రెండు ములాఖత్ లు పూర్తయ్యాయి. 

కానీ, అత్యవసర కారణాలతో ఎవరైనా సందర్శకులు రిమాండ్ ముద్దాయిని కలిసి మాట్లాడటానికి లిఖిత పూర్వకంగా అభ్యర్థించాల్సినట్లయితే.. అందుకు గల అత్యవసర కారణాలను పేర్కొనాల్సి ఉంటుంది. ఆ కారణం వాస్తవమని నిర్ధారణ అయితే జైలు పర్యవేక్షణాధికారి విచాక్షణాధికారాలు ఉపయోగించి 3వ ములాఖత్ కు అనుమతి ఇవ్వనున్నారు. అయితే ప్రస్తుతం భువనేశ్వరి ఎలాంటి అత్యవసర కారణాలను తన దరఖాస్తులో ప్రస్తావించలేదు. ఆ కారణంగా నిబంధనల ప్రకారం మూడో ములాఖత్ లో నారా భువనేశ్వరికి రాజమండ్రి జైలు అధికారులు అనుమతి చేయలేకపోయారని కోస్తాంధ్ర ప్రాంతం, రాజమహేంద్రవరం జైళ్ల ఉప శాఖాధికారి శుక్రవారం ఓ పత్రికా ప్రకటనలో స్పష్టం చేశారు. 

ములాఖత్‌పై కూడా ఏపీ ప్రభుత్వం అవమానీయంగా వ్యవహరిస్తోందని భువనేశ్వరి ఆరోపించారు. నిబంధనల ప్రకారం ములాఖత్ ఇచ్చేందుకు అవకాశం ఉన్నా, మూడో ములాఖత్ కు ఛాన్స్ ఇవ్వలేదని కన్నీళ్లు పెట్టుకున్నారు. మరోవైపు చంద్రబాబు అరెస్టు అయిన తర్వాత నుంచి లోకేష్, నారా భువనేశ్వరి రాజమండ్రిలోనే ఉంటున్నారు. నిన్న రాత్రి లోకేష్ ఢిల్లీకి వెళ్లారు. ఢిల్లీలో కొందరు ప్రముఖ నేతలతో భేటీ కోసం ఎదురు చూస్తున్నారు. 

మారిన సుపరింటెండెంట్‌
రాజమండ్రి జైలు సూపరింటెండెంట్ రాహుల్ సెలవుపై వెళ్లారు. నేటి నుంచి (సెప్టెంబర్ 15) రెండు రోజుల పాటు సెలవులో ఉండనున్నారు. భార్య అనారోగ్యంతో ఆసుపత్రిలో అడ్మిట్ కావడంతో  సెలవు పై వెళ్లారు.