AP New SEC: ఏపీ లోకల్ పోల్స్ కు లైన్ క్లియర్ - కొత్త ఎస్ఈసీగా పునేఠా నియామకం
Andhra SEC: ఆంధ్రప్రదేశ్ కొత్త ఎన్నికల కమిషనర్ గా రిటైర్డ్ ఐఏఎస్ అధికారి అనిల్చంద్ర పునేఠా నియమితులయ్యారు. ప్రభుత్వం ఈ మేరకు ఉత్తర్వులు జారీ చేసింది.
Punetha appointed as new Andhra SEC: ఆంధ్రప్రదేశ్ ప్రభుత్వం రాష్ట్ర కొత్త ఎన్నికల కమిషనర్ (SEC)గా రిటైర్డ్ ఐఏఎస్ అధికారి అనిల్చంద్ర పునేఠా నియమితులయ్యారు. ఈ మేరకు రాష్ట్ర ప్రభుత్వం పంపిన ప్రతిపాదనలకు గవర్నర్ ఆమోదముద్ర వేయడంతో, ప్రభుత్వం అధికారికంగా నోటిఫికేషన్ విడుదల చేసింది. నీలం సాహ్ని పదవీ విరమణ తర్వాత ఖాళీ అయిన ఈ రాజ్యాంగబద్ధమైన పదవికి పునేఠా సరైన వ్యక్తిగా ప్రభుత్వం భావించింది.
సీనియర్ ఐఏఎస్గా విశేష అనుభవం
1984 బ్యాచ్కు చెందిన రిటైర్డ్ ఐఏఎస్ అధికారి అనిల్చంద్ర పునేఠాకు పరిపాలనలో అపారమైన అనుభవం ఉంది. ఆయన గతంలో ఉమ్మడి ఆంధ్రప్రదేశ్లో, విభజన తర్వాత నవ్యాంధ్రలో పలు కీలక బాధ్యతలు నిర్వహించారు. ముఖ్యంగా 2018-19 కాలంలో చంద్రబాబు నాయుడు ప్రభుత్వ హయాంలో ఆంధ్రప్రదేశ్ **ప్రభుత్వ ప్రధాన కార్యదర్శి గా పనిచేశారు. భూపరిపాలన ప్రధాన కమిషనర్ , పంచాయతీరాజ్, గ్రామీణాభివృద్ధి శాఖల ప్రత్యేక ప్రధాన కార్యదర్శిగా కూడా ఆయన సేవలందించారు. శ్రీకాకుళం జిల్లా కలెక్టర్గా పనిచేసిన సమయంలో వరుసగా మూడుసార్లు ఉత్తమ కలెక్టర్ అవార్డును అందుకోవడం ఆయన పనితీరుకు నిదర్శనం.
విజిలెన్స్ నుంచి ఎన్నికల కమిషనర్గా..
ప్రస్తుతం అనిల్చంద్ర పునేఠా ఆంధ్రప్రదేశ్ స్టేట్ విజిలెన్స్ కమిషనర్ గా బాధ్యతలు నిర్వర్తిస్తున్నారు. 2024లో కూటమి ప్రభుత్వం అధికారంలోకి వచ్చిన తర్వాత ఆయనను ఈ పదవిలో నియమించింది. ఇప్పుడు ఆయన స్టేట్ ఎలక్షన్ కమిషనర్గా పదవిని స్వీకరించనుండటంతో, విజిలెన్స్ కమిషనర్ స్థానంలో మరొక సీనియర్ రిటైర్డ్ అధికారి నీరభ్కుమార్ ప్రసాద్ ను నియమిస్తూ ప్రభుత్వం నిర్ణయం తీసుకుంది. నీరభ్కుమార్ ప్రసాద్ గతంలో ఏపీ సీఎస్గా పనిచేసి పదవీ విరమణ చేశారు.
రాజకీయంగా ప్రాధాన్యత
రాష్ట్రంలో త్వరలోనే మున్సిపల్, పంచాయతీ ఎన్నికలు జరగాల్సి ఉన్నాయి. ఈ సమయంలో అనిల్చంద్ర పునేఠా నియామకం అత్యంత ప్రాధాన్యత సంతరించుకుంది. గతంలో నిమ్మగడ్డ రమేష్ కుమార్, నీలం సాహ్ని హయాంలో ఎన్నికల కమిషన్ , ప్రభుత్వం మధ్య కొన్ని వివాదాలు తలెత్తిన నేపథ్యంలో, మృదుస్వభావి , నిజాయితీ గల అధికారిగా పేరున్న పునేఠా ఈ సవాలును ఎలా ఎదుర్కొంటారనేది ఆసక్తికరంగా మారింది. ఎన్నికల ప్రక్రియను పారదర్శకగా, వివాదరహితంగా నిర్వహించడంపై ఆయన తనదైన ముద్ర వేస్తారని ప్రభుత్వం భావిస్తోంది.
ఒక సీనియర్ మోస్ట్ అధికారికి ఎన్నికల కమిషనర్గా బాధ్యతలు అప్పగించడం ద్వారా పారదర్శకతకు పెద్దపీట వేస్తున్నట్లు ప్రభుత్వం సంకేతాలిచ్చింది. వచ్చే ఐదేళ్ల కాలం పాటు ఆయన ఈ పదవిలో కొనసాగుతారు. పరిపాలనలో దశాబ్దాల అనుభవం ఉన్న పునేఠా సారధ్యంలో రాష్ట్ర ఎన్నికల కమిషన్ మరింత పటిష్టంగా పనిచేస్తుందని భావిస్తున్నారు.
టాప్ హెడ్ లైన్స్
ట్రెండింగ్ వార్తలు
