Minister Venugopala Krishna : అయ్యన్న పాత్రుడు అరెస్టుపై కుల రాజకీయాలు, టీడీపీపై మంత్రి వేణు గోపాల కృష్ణ ఫైర్

Minister Venugopala Krishna : అయ్యన్న పాత్రుడు చేసిన తప్పులకు శిక్ష తప్పదని మంత్రి చెల్లుబోయిన వేణు గోపాల కృష్ణ అన్నారు. అయ్యన్న అరెస్టుతో కులరాజకీయాలు చేస్తున్నారన్నారు.

మంత్రి వేణు గోపాల కృష్ణ

Minister Venugopala Krishna : అయ్యన్నపాత్రుడు అరెస్ట్ ను బీసీల అణచివేతగా వక్రీకరిస్తున్నారని మంత్రి వేణుగోపాల కృష్ణ టీడీపీపై మండిపడ్డారు.  డాక్టర్ బి.ఆర్ అంబేడ్కర్ కోనసీమ జిల్లా రామచంద్రపురం వైసీపీ కార్యాలయంలో మంత్రి వేణు గోపాల కృష్ణ మీడియాతో మాట్లాడారు.  టీడీపీ మాజీ మంత్రి  అయ్యన్నపాత్రుడు చేసిన తప్పు వల్లే సీఐడీ పోలీసులు అరెస్ట్ చేశారని, ఆ అరెస్ట్ ను వక్రీకరించి కుల రాజకీయాలు చేయాలని టీడీపీ చూస్తుందని బీసీ సంక్షేమ శాఖ, సినిమాటోగ్రఫీ సమాసర శాఖ మంత్రి చెల్లుబోయిన  వేణుగోపాల కృష్ణ తీవ్ర స్థాయిలో ఖండించారు. చింతకాయల అయ్యన్న పాత్రుడు చేసిన తప్పులకు శిక్ష తప్పదని, తప్పు చేస్తే ఎంతటి వారైనా పోలీసుల నుంచి తప్పించుకోలేరని అన్నారు.

చట్టం ముందు ఎవరైనా ఒక్కటే 

అయ్యన్న పాత్రుడు టీడీపీ పాలనలో చేసిన తప్పులు ఒక్కొకటిగా వెలుగులోకి వస్తున్నాయని, అంతేకాని బీసీలను తొక్కేస్తున్నారు అని, కళ్లబొల్లి కబుర్లు చెప్పొద్దు అని మంత్రి అన్నారు. చట్టం ముందు ఎవరైనా ఒకటే అని బీసీలు అయితే ఒక చట్టం, ఇంకో వర్గం అయితే మరో చట్టం చేశారా అని చంద్రబాబు నాయుడుని నిలదీశారు. టీడీపీ ప్రభుత్వ పాలనలో చేసిన అన్యాయలు అక్రమాలు ఒక్కొకటి వెలుగులోకి వస్తున్నాయన్నారు. తప్పు చేసిన వారికి శిక్ష తప్పదని, సిగ్గు లేకుండా తప్పు చేసిన వారిని కాపాడటానికి బీసీలను అడ్డుపెట్టుకుంటున్నారని టీడీపీ నాయకులపై మంత్రి తీవ్రంగా మండిపడ్డారు. 

అయ్యన్న సత్యశీలుడా? 

"చంద్రబాబు, టీడీపీ నేతలు అనేక సత్యదూరమైన ఆరోపణలు చేస్తున్నారు. అయ్యన్నపాత్రుడు అరెస్టును బీసీలపై దాడిగా టీడీపీ ఆపాదిస్తుంది. దీనిని మేం ఖండిస్తుంది. పోలీసులు పెట్టిన కేసుల్లో ఎలాంటి తప్పు చేయకపోతే అయ్యన్న నిరూపించుకోవాలి. అంతేకానీ అరెస్టుతో కులరాజకీయాలు చేస్తున్నారు. అయ్యన్న ఏదో సత్యశీలుడిగా చంద్రబాబు చెబుతున్నారు. పోలీసులపై అనవసర ఆరోపణలు చేస్తున్నారు. అయ్యన్నపై గంజాయి, లేటరైట్, బాక్సైట్ అక్రమ తవ్వకాలతో సహా ఎన్నో ఆరోపణలు ఉన్నాయి." - మంత్రి చెల్లుబోయిన వేణు గోపాల కృష్ణ

తప్పు చేస్తే అరెస్టు చెయ్యరా- ఎమ్మెల్యే ఉమాశంకర్ గణేష్ 

 తప్పు చేసిన అయ్యన్న పాత్రుడిని అరెస్ట్ చేస్తే టీడీపీ నాయకులు రచ్చ చేస్తున్నారని ఎమ్మెల్యే ఉమాశంకర్ గణేష్ అన్నారు. గత మూడున్నరేళ్లగా కుల రాజకీయాలు, శవ రాజకీయాలు చేయడమే టీడీపీ పనిగా పెట్టుకుందని ఆరోపించారు. అయ్యన్నపాత్రుడిని అరెస్ట్ చేస్తే బీసీ నాయకుడిని అరెస్టు చేశారని టీడీపీ బీసీ నేతలు మాట్లాడడం సమంజసమేనా అని ప్రశ్నించారు. బీసీ నాయకులు తప్పు చేస్తే అరెస్ట్ చేయకూడదా అని అన్నారు. తానూ బీసీ నాయకుడినే.. తాను తప్పు చేస్తే అరెస్టు చేయరా అంటూ ఆగ్రహం వ్యక్తం చేశారు. టీడీపీ నాయకులు రోడ్ల మీదకు వచ్చి బీసీ నేతను అరెస్టు చేశారని కుల రాజకీయం మొదలు పెట్టారిన ధ్వజమెత్తారు. అయ్యన్నపాత్రుడిని అరెస్ట్ చేయడానికి గల కారణం ఏమిటో రాష్ట్ర ప్రజలందరికీ తెలుసన్నారు. ఇరిగేషన్ డిపార్ట్‌మెంట్‌కు సంబంధించిన స్థలాన్ని ఆక్రమించి ఇల్లు కట్టడమే కాకుండా, ఆ స్థలానికి చెందిన డాక్యుమెంట్లను ఫోర్జరీ చేశారని అరెస్టు చేశారని వివరించారు. ఇంత తప్పు చేసిన అయ్యన్నను అరెస్ట్ చేస్తే.. టీడీపీ నాయకులు దాన్ని రాజకీయం చేసి ప్రభుత్వం మీద బురదజల్లే ప్రయత్నం  చేస్తున్నారన్నారు.