Amaravati Farmers Plot Allotment: అమరావతి రైతుల‌కు గుడ్‌న్యూస్.. మలి విడత ప్లాట్ల కేటాయింపుపై CRDA కీలక ప్రకటన

ఏపీ రాజధాని అమరావతి కోసం భూములు ఇచ్చిన రైతులకు ప్లాట్లను కేటాయిస్తున్నారు. జనవరి 29న మలివిడత భూములు ఇచ్చిన రైతులకు సీఆర్డీఏ ఈ లాటరీ ద్వారా ప్లాట్లు కేటాయించనుంది.

రాజ‌ధాని రైతుల‌కు గుడ్‌న్యూస్.. మలి విడత ప్లాట్ల కేటాయింపుపై CRDA కీలక ప్రకటన

Source : ABP Desam

అమరావతి: ఏపీ ప్రభుత్వం రాజధాని అమరావతి కోసం భూములు ఇచ్చిన రైతులకు శుభవార్త అందించింది. రాజధాని అమరావతి ప్రాంత రైతుల ప్రయోజనాలను పరిగణనలోకి తీసుకుని ఈనెల 29వ తేదీన రెండో విడత ప్లాట్ల కేటాయింపు ప్రక్రియను చేపట్టాలని ప్రభుత్వం నిర్ణయించింది. ముఖ్యంగా రాజధానిలో ప్రధానమైన సీడ్ యాక్సిస్ రోడ్డు నిర్మాణం కోసం తమ భూములను ఇచ్చిన రైతులకు ఈ విడతలో ప్లాట్లను కేటాయించనున్నారు. పారదర్శకతకు పెద్దపీట వేస్తూ, ఈ ప్రక్రియ మొత్తాన్ని ఈ-లాటరీ (E-Lottery) విధానం ద్వారా నిర్వహించాలని అధికారులు నిర్ణయించారు.

ముందుగా నిర్ణయించిన నిబంధనల ప్రకారం, లాటరీ పద్ధతిలో అర్హులైన రైతులకు ప్లాట్ల కేటాయింపు జరుగుతుందని ఆంధ్రప్రదేశ్ రాజధాని ప్రాంత అభివృద్ధి ప్రాధికార సంస్థ (CRDA) అధికారులు స్పష్టం చేశారు. అయితే, గతంలో ఈ లాటరీని ఈనెల 28వ తేదీన నిర్వహించాలని భావించినప్పటికీ, కొన్ని అనివార్య కారణాల వల్ల దీనిని 29వ తేదీకి మార్చినట్లు సీఆర్డీఏ వెల్లడించింది. దీనికి సంబంధించి అధికారులు ఇప్పటికే అన్ని ఏర్పాట్లు పూర్తి చేశారు.

రాజధాని కోసం భూ సేకరణ
అమరావతి: ఆంధ్రప్రదేశ్ నూతన రాజధాని నిర్మాణానికి అవసరమైన భూమిని సేకరించేందుకు ప్రభుత్వం చేపట్టిన 'ల్యాండ్ పూలింగ్' విధానం ప్రపంచవ్యాప్తంగా గుర్తింపు పొందింది. రైతుల స్వచ్ఛంద భాగస్వామ్యంతో రాజధాని అవసరాల కోసం సుమారు 34,000 ఎకరాలకు పైగా భూమిని సేకరించారు. ప్రభుత్వం వద్ద ఉన్న భూములను సైతం రాజధాని కోసం ఇచ్చింది. ఈ ప్రక్రియ ప్రధానంగా రెండు విడతల్లో సాగింది. ఇటీవల మరికొన్ని వేల ఎకరాల భూ సేకరణకు నోటిఫికేషన్ సైతం ఇచ్చారు.

తొలి విడత భూసేకరణ 
రాజధాని ప్రకటన వెలువడిన వెంటనే 2014-15లో తొలి విడత భూసేకరణ ప్రారంభమైంది. సీడ్ క్యాపిటల్ మరియు పరిపాలనా నగరం కోసం తుళ్లూరు, తాడికొండ, మంగళగిరి మండలాల్లోని 25 గ్రామాల రైతులు ముందుకు వచ్చారు. సుమారు 30,000 ఎకరాలకు పైగా భూమిని రైతులు ప్రభుత్వానికి అప్పగించారు. భూములిచ్చిన రైతులకు బదులుగా ప్రభుత్వం అభివృద్ధి చేసిన నివాస, వాణిజ్య ప్లాట్లను కేటాయించింది. అలాగే ఏటా కౌలు చెల్లింపును ప్రారంభించింది. సీడ్ యాక్సిస్ రోడ్డు, సచివాలయం, హైకోర్టు వంటి కీలక నిర్మాణాలు ఈ విడతలో సేకరించిన భూముల్లోనే చేపట్టారు.

మలి విడత భూసేకరణ
మొదటి విడతలో కొన్ని సాంకేతిక కారణాల వల్ల లేదా లిటిగేషన్ల వల్ల ఆగిపోయిన భూములు, మరియు రాజధాని విస్తరణకు అవసరమైన అదనపు భూముల కోసం రెండో విడతను చేపట్టారు. సీడ్ యాక్సిస్ రోడ్డు అనుసంధానత కోసం, పెండింగ్‌లో ఉన్న లేఅవుట్ల పూర్తి కోసం సీఆర్డీఏ ఈ విడత భూమి సేకరించింది. మలి విడత (సీడ్ యాక్సిస్ రోడ్డు కోసం) భూమి ఇచ్చిన రైతులకు ఈనెల 29న ఈ-లాటరీ ద్వారా ప్లాట్లు కేటాయించాలని సీఆర్డీఏ నిర్ణయించింది. మలి విడతలో భాగంగా జరీబ్ భూములు, మెట్ట భూములకు సంబంధించిన ప్లాట్ల సర్దుబాటును కూటమి ప్రభుత్వం పూర్తి చేస్తోంది.

మరిన్ని చదవండి

పదవి లేకపోతే వైఎస్ జగన్ జాతీయపతాకం ఆవిష్కరించరా? - రాజ్యాంగ వేడుకలకు ఎందుకు దూరంగా ఉంటారు?

రిపబ్లిక్ డే నాడు కనీసం అంబేద్కర్ విగ్రహం వైపు చూడలేదు.. ఇంకెందుకీ స్మృతి వనాలు