DPL Aryavir Replicates Virender Sehwag | అచ్చం సెహ్వాగ్ లాగే కుమారుడి విధ్వంసం

టీమిండియా దిగ్గజ ఓపెనర్ వీరేంద్ర సెహ్వాగ్ తన బ్యాటింగ్‌తో ప్రపంచ క్రికెట్‌లో ఎలాంటి విధ్వంసం సృష్టించాడో ప్రత్యేకంగా చెప్పనక్కర్లేదు. భయం లేని బ్యాటింగ్ స్టైల్‌తో క్రికెట్ చరిత్రలో ఎన్నో ఘనమైన రికార్డులను తన పేరిట లిఖించుకున్నాడు. ఇప్పుడు ఆ వారసత్వాన్ని, అదే బ్యాటింగ్ స్టైల్ ని ఆయన కుమారుడు ఆర్యవీర్ సెహ్వాగ్ ముందుకు తీసుకెళ్తున్నాడు.

ఢిల్లీ ప్రీమియర్ లీగ్ (DPL 2026)లో వెస్ట్ ఢిల్లీ లయన్స్ తరఫున ఆడుతున్న ఆర్యవీర్, గ్రౌండ్ లో అచ్చం తన తండ్రి వీరూని దించినట్లే ఆడుతూ అందరి దృష్టినీ ఆకర్షిస్తున్నాడు. సెహ్వాగ్ ఐకానిక్ షాట్లైన స్క్వేర్ కట్స్, పవర్‌ఫుల్ కవర్ డ్రైవ్స్ ను ఆర్యవీర్ గ్రౌండ్ లో రీ-క్రియేట్ చేస్తుంటే క్రికెట్ ప్రేమికులు ఫిదా అవుతున్నారు.

డీపీఎల్ యాజమాన్యం వీరేంద్ర సెహ్వాగ్ పాత షాట్లను, ఆర్యవీర్ షాట్లతో పోలుస్తూ ఒక ప్రత్యేక వీడియోను విడుదల చేసింది. తండ్రీకొడుకుల బ్యాటింగ్ స్టైల్ ఒక్కలాగే ఉండటంతో ఈ వీడియో ప్రస్తుతం సోషల్ మీడియాలో విపరీతంగా ట్రెండ్ అవుతోంది. మ్యాచ్ ఫలితంతో సంబంధం లేకుండా, ఆర్యవీర్ చూపించిన బ్యాటింగ్ కాన్ఫిడెన్స్, సెహ్వాగ్‌ను గుర్తుచేసిన షాట్లు అభిమానుల్లో కొత్త ఆశలను రేకెత్తిస్తున్నాయి. భవిష్యత్తులో ఆర్యవీర్ కూడా తండ్రిలాగే భారత క్రికెట్‌లో సంచలనాలు సృష్టిస్తాడని నెటిజన్లు కామెంట్లు చేస్తున్నారు.