TGSRTC: సంక్రాంతికి ఊరెళ్లేందుకు బస్సులు రెడీ - తెలుగు రాష్ట్రాల ప్రయాణికులకు ఆర్టీసీ గుడ్ న్యూస్, పూర్తి వివరాలివే!

Telangana News: సంక్రాంతికి సొంతూళ్లకు వెళ్లే వారికి టీజీఎస్ఆర్టీసీ గుడ్ న్యూస్ చెప్పింది. తెలంగాణతో సహా ఏపీలోని ప్రధాన నగరాలకు ప్రత్యేక సర్వీసులను నడపనుంది.

సంక్రాంతికి టీజీఎస్ఆర్టీసీ ప్రత్యేక బస్సులు

Source : Twitter (X)

TGSRTC Special Buses For Sankranthi Festival: తెలుగువారికి పెద్ద పండుగ సంక్రాంతి. ఉద్యోగ, ఉపాధి నిమిత్తం భాగ్యనగరంలో స్థిరపడ్డ వారంతా ఆ 3 రోజుల వేడుక కోసం సొంతూళ్లకు పయనమవుతారు. ఈ క్రమంలో పండుగకు ఊరెళ్లే వారికి టీజీఎస్ఆర్టీసీ (TGSRTC) గుడ్ న్యూస్ చెప్పింది. పండుగ నేపథ్యంలో ప్రయాణికుల రద్దీ దృష్ట్యా 6,432 ప్రత్యేక బస్సులను నడపాలని నిర్ణయించింది. అందులో 557 సర్వీసులకు ముందస్తు రిజర్వేషన్ సదుపాయం కల్పించింది. గతేడాది సంక్రాంతికి 4,484 ప్రత్యేక బస్సులు నడిపేందుకు ప్రణాళిక రూపొందించగా.. రద్దీ ఎక్కువగా ఉండడంతో 5,246 బస్సులు ఏర్పాటు చేసింది. 

ఆ అనుభవాలను దృష్టిలో ఉంచుకుని ఈసారి 6,432 ప్రత్యేక బస్సులను నడపనున్నట్లు అధికారులు వెల్లడించారు. జనవరి 9 నుంచి 15 వరకూ ఈ ప్రత్యేక బస్సులు అందుబాటులో ఉండనున్నాయి. హైదరాబాద్‌లో రద్దీ ప్రాంతాలైన ఎంజీబీఎస్, జేబీఎస్, ఉప్పల్ క్రాస్ రోడ్స్, ఆరాంఘర్, ఎల్బీనగర్ క్రాస్ రోడ్స్, కేపీహెచ్‌బీ, బోయిన్పల్లి, గచ్చిబౌలి తదితర ప్రాంతాల నుంచి ఈ బస్సులు బయలుదేరనున్నాయి. ఆయా ప్రాంతాల్లో ప్రయాణికుల రద్దీకి అనుగుణంగా స్పెషల్ బస్సులు ఏర్పాటు చేసేలా ప్రత్యేక అధికారులను ఆర్టీసీ నియమించింది.

ఏపీలోని ప్రధాన నగరాలకు..

హైదరాబాద్ (Hyderabad) నుంచి తెలంగాణతో పాటు ఆంధ్రప్రదేశ్‌కు (AP) కూడా ప్రత్యేక బస్సులు నడపనున్నట్లు అధికారులు తెలిపారు. అమలాపురం, కాకినాడ, కందుకూరు, నర్సాపురం, పోలవరం, రాజమహేంద్రవరం, రాజోలు, ఉదయగిరి, విశాఖ, నెల్లూరు, ఒంగోలు, గుంటూరు, విజయవాడ, శ్రీశైలం, తిరుపతి నగరాలకు ఈ బస్సులు నడుస్తాయి. తెలంగాణతో పాటు ఏపీ నుంచి తిరుగు పయనమయ్యే వారి కోసం కూడా ఈ ప్రత్యేక బస్సులను సంస్థ ఏర్పాటు చేసింది. కరీంనగర్, నిజామాబాద్, వరంగల్ నుంచి ఎలక్ట్రిక్ బస్సులు ప్రయాణికులకు అందుబాటులో ఉంచేలా సంస్థ ప్లాన్ చేస్తోంది.

ముందస్తు రిజర్వేషన్లు..

మహాలక్ష్మి పథకంలో భాగంగా సంక్రాంతికి నడిపే పల్లెవెలుగు, ఎక్స్ ప్రెస్, సిటీ ఆర్డినరీ, మెట్రో ఎక్స్‌ప్రెస్ బస్సుల్లో మహిళలకు ఉచిత బస్సు ప్రయాణ సదుపాయం అమల్లో ఉంటుందని ఆర్టీసీ స్పష్టం చేసింది. ప్రయాణ సమయంలో మహిళలు విధిగా జీరో టికెట్లను తీసుకోవాలని తెలిపింది. ఇక ప్రత్యేక బస్సుల్లో ముందస్తు రిజర్వేషన్లు ఆర్టీసీ అధికారిక వెబ్‌సైట్ www.tgsrtcbus.in లో చేసుకోవాలని పేర్కొంది. ప్రత్యేక బస్సులకు సంబంధించి పూర్తి సమాచారం కోసం ఆర్టీసీ కాల్ సెంటర్ 040 - 69440000, 040 - 23450033 నెంబర్లకు సంప్రదించాలని సూచించింది.

ఏపీఎస్ఆర్టీసీ సైతం

అటు, సంక్రాంతి పండుగ రద్దీ దృష్ట్యా ఏపీఎస్ఆర్టీసీ (APSRTC) సైతం ప్రత్యేక సర్వీసులు నడపనున్నట్లు తెలిపింది. హైదరాబాద్‌ (Hyderabad) నుంచి ఏపీలోని తమ స్వస్థలాలకు వెళ్లే వారి కోసం 2,400 ప్రత్యేక బస్సులు (Special Buses) నడపనున్నట్లు వెల్లడించింది. ఇవి జనవరి 9 నుంచి 13 వరకూ అందుబాటులో ఉంటాయని అధికారులు వెల్లడించారు. ఈ స్పెషల్ బస్సులు రెగ్యులర్ ఛార్జీలే ఉంటాయని, అదనపు ఛార్జీలు వసూలు చేయడం లేదని ఆర్టీసీ స్పష్టం చేసింది.