(Source: ECI/ABP News)
MLA Padi Kaushik Reddy: బీఆర్ఎస్ ఎమ్మెల్యే కౌశిక్ రెడ్డిపై కేసు నమోదు.. మినీ మేడారం జాతరలో అసలు వివాదం ఏంటి
కరీంనగర్ పోలీస్ కమిషనర్పై వివాదాస్పద వ్యాఖ్యలు చేసిన బీఆర్ఎస్ ఎమ్మెల్యే పాడి కౌశిక్ రెడ్డిపై కేసు నమోదు చేశారు పోలీసులు. మినీ మేడారం జాతర సందర్భంగా కౌశిక్ రెడ్డి పలు వివాదాల్లో చిక్కుకున్నారు.
హుజూరాబాద్: బీఆర్ఎస్ నేత, హుజూరాబాద్ ఎమ్మెల్యే పాడి కౌశిక్ రెడ్డిపై పోలీసులు కేసు నమోదు చేశారు. కరీంనగర్ నగర పోలీస్ కమిషనర్ని మతం పేరుతో దూషించిన వ్యవహారంలో ఆయనపై 126 (2), 132, 196, 299 బిఎన్ఎస్ (BNS) సెక్షన్లతోపాటు పలు సెక్షన్ల కింద పోలీసులు కేసు నమోదు చేశారు. వీణవంకలోని మినీ మేడారం జాతరలో గురువారం నాడు పోలీసులు ఎమ్మెల్యే కౌశిక్ రెడ్డిని అడ్డుకుని, మొక్కులు సమర్పించకుండా అదుపులోకి తీసుకుంటున్నట్లు వీడియోలు సోషల్ మీడియాలో వైరల్ అయ్యాయి. ఆయన కుటుంబంతో కలిసి రోడ్డుపై కూర్చుని నిరసన తెలపడం తెలిసిందే. జాతరలో పాల్గొనకుండా ప్రతిపక్ష ఎమ్మెల్యేలను సైతం కాంగ్రెస్ ప్రభుత్వం అడ్డుకుంటోందని బీఆర్ఎస్ నేతలు విమర్శలు గుప్పించారు. ఈ వివాదంలోనే కౌశిక్ రెడ్డి కేసులో ఇరుక్కున్నారు.
అసలు విషయం ఇదీ..
కరీంనగర్ జిల్లా వీణవంకలో స్థానికంగా సమ్మక్క జాతర వేడుక నిర్వహిస్తున్నారు. ఈ జాతరకు గురువారం బీఆర్ఎస్ ఎమ్మెల్యే పాడి కౌశిక్ రెడ్డి తన కుటుంబసమేతంగా భారీ కాన్వాయ్తో బయలుదేరగా, మార్గమధ్యంలో పోలీసులు ఆయనను అడ్డుకుని వారించారు. మినీ మేడారం జాతర నిర్వహణపై హైకోర్టు తీర్పు పాటించి, పరిమిత వాహనాలనే అనుమతిస్తామని పోలీసులు సూచించడంతో ఎమ్మెల్యే తీవ్ర ఆగ్రహం వ్యక్తం చేశారు. కారులో నుంచి దిగిన ఎమ్మెల్యే కౌశిక్ రెడ్డి తన కుటుంబసభ్యులతో కలిసి జాతీయ రహదారిపై ఆందోళనకు దిగారు. తమను అడ్డుకోవద్దని, ఇలాగే వెళ్తాం అనుమతించాలంటూ పోలీసులను పట్టుపట్టారు. ఆ క్రమంలోనే అక్కడ డ్యూటీలో ఉన్న కరీంనగర్ పోలీస్ కమిషనర్పై ఎమ్మెల్యే కౌశిక్ రెడ్డి మతపరమైన వ్యాఖ్యలు చేశారు.
తనను అడ్డుకుంటే మీ సంగతి చెబుతానంటూ కౌశిక్ రెడ్డి పోలీసులను బెదిరించే ప్రయత్నం చేశారని పోలీసులు తెలిపారు. ఈ క్రమంలో ఎమ్మెల్యే వర్గం, ఇటు పోలీసులకు మధ్య తీవ్ర వాగ్వాదం చోటుచేసుకుంది. అనంతరం పోలీసులు 4 వాహనాలకు మాత్రమే అనుమతి ఇవ్వడంతో, కౌశిక్ రెడ్డి తన కుటుంబసభ్యులతో కలిసి వీణవంకకు చేరుకున్నారు.
మినీ మేడారంలో కౌశిక్ రెడ్డి హంగామా..
వీణవంకలో జరుగుతున్న మినీ మేడారం జాతరలో దళిత మహిళా సర్పంచ్ చేత కొబ్బరికాయ కొట్టించాలంటూ కౌశిక్ రెడ్డి పట్టుబట్టారు. శాంతిభద్రతల దృష్ట్యా పోలీసులు వారించినా వినకుండా రాబోయేది బీఆర్ఎస్ ప్రభుత్వమేనంటూ కౌశిక్ రెడ్డి కాసేపు అక్కడ హంగామా చేశారు. తమ సూచనలు బేఖాతరు చేయడంతో పోలీసులు ఎమ్మెల్యే కౌశిక్ రెడ్డిని బలవంతంగా సమ్మక్క, సారక్క గద్దెల ప్రాంగణం నుంచి బయటకు తీసుకెళ్లారు. మరోవైపు, వీణవంకలో సమ్మక్క జాతర ట్రస్టీ ఉదయానందరెడ్డి వర్గానికి, ఎమ్మెల్యే కౌశిక్ రెడ్డి వర్గానికి మధ్య విభేదాలు ఉన్నాయని.. అక్కడ గొడవ జరిగే అవకాశం ఉందని పోలీసులు కౌశిక్ రెడ్డిని మొక్కులు చెల్లించుకుని వెళ్లిపోవాలని సూచించారు. కానీ తాను చెప్పినట్లు జరగాలంటూ పట్టుబట్టడంతో పోలీసులు ఎమ్మెల్యేతో పాటు ఆయన కుటుంబసభ్యులను అక్కడి నుంచి బయటకు తీసుకెళ్లి వాహనాల్లో తరలించారు.
టాప్ హెడ్ లైన్స్
ట్రెండింగ్ వార్తలు
