Hyderabad Ganesh idol rules: గ్రేటర్ పరిధిలో గణేష్ మండపం ప్లాన్ చేసుకుంటున్నారా? - ఖచ్చితంగా ఈ విషయాలు తెలుసుకోవాలి
Ganesh Mandal: హైదరాబాద్ పరిధిలో గణేష్ మండలం పెట్టాలనుకునేవారి కొన్ని విషయాలు తెలుసుకోవాలి. చిన్న తప్పు జరిగినా పోలీసులు ఉపేక్షించే పరిస్థితి ఉండదు.
Ganesh idol rules: హైదరాబాద్లో గణేష్ మండపం ఏర్పాటు చేయడానికి కింది అనుమతులు , నిబంధనలు పాటించాలి. ఈ రోజుల్లో ప్రతి గల్లీలో ఓ మండపం పెడుతున్నారు. ఈ క్రమంలో రూల్స్ అండ్ రెగ్యలేషన్స్ పై చాలా మందికి స్పష్టత లేదు.
గణేష్ విగ్రహాలను పబ్లిక్ ప్లేస్లలో ఏర్పాటు చేయడానికి సంబంధిత డివిజనల్ అసిస్టెంట్ కమిషనర్ ఆఫ్ పోలీస్ (ACP) నుండి ముందస్తు రాత అనుమతి తప్పనిసరి. ఆన్లైన్ ద్వారా https://www.tspolice.gov.in వెబ్సైట్లో ఇంటిమేషన్ ఫారమ్ సమర్పించాలి. అయితే అపార్టుమెంట్లలో , ప్రైవేట్ ఇళ్లల్లో పబ్లిక్ కు యాక్సెస్ లేని విగ్రహాలకు ఈ నిబంధనలు వర్తించవు. మండపం ఏర్పాటు చేసే స్థలం ప్రైవేట్ లేదా ప్రభుత్వ భూమి అయినా, ల్యాండ్ఓనర్ నుండి నో ఆబ్జెక్షన్ సర్టిఫికేట్ (NOC) తప్పనిసరి.
అనధికార విద్యుత్ కనెక్షన్లు నిషిద్ధం. తెలంగాణ స్టేట్ సదరన్ పవర్ డిస్ట్రిబ్యూషన్ కంపెనీ లిమిటెడ్ (TGSPDCL) నుండి అధికారిక విద్యుత్ కనెక్షన్ సర్టిఫికేట్ సమర్పించాలి. సీరియల్ లైటింగ్ లేదా డెకరేషన్ లైటింగ్ మండపం వెలుపల నిషిద్ధం ఒక్కో మండపంలో రెండు బాక్స్-టైప్ లౌడ్స్పీకర్లు మాత్రమే అనుమతిస్తారు. రాత్రి 10:00 గంటల నుండి ఉదయం 6:00 గంటల వరకు లౌడ్స్పీకర్లు లేదా పబ్లిక్ అడ్రస్ సిస్టమ్లు ఉపయోగించకూడదు. సుప్రీం కోర్టు మార్గదర్శకాల ప్రకారం శోభాయాత్ర సమయంలో DJలు ఏర్పాటు చేయడం నిషిద్ధం.
నిర్వాహకులు తగిన గుర్తింపు కార్డులు, బ్యాడ్జ్లతో వాలంటీర్లను నియమించాలి, వీరు దర్శనం కోసం వచ్చే భక్తుల క్యూలను నిర్వహించడం, భద్రతను కాపాడడం ,ఫైర్ సేఫ్టీ చర్యలను పాటించడం చేయాలి. మండపం వద్ద 24 గంటలు కనీసం ఒక వాలంటీర్ ఉండేలా చూడాలి. సీసీ కెమెరాలు తప్పనిసరిగా ఏర్పాటు చేయాలి. మండపాలు ట్రాఫిక్కు ఆటంకం కలిగించకుండా లేదా పబ్లిక్ ఆర్డర్కు భంగం కలిగించకుండా ఏర్పాటు చేయాలి. శోభాయాత్రల కోసం పోలీసు క్లియరెన్స్లో నిర్దేశించిన రూట్లు, టైమింగ్లను ఖచ్చితంగా పాటించాలి.
ఆన్లైన్ దరఖాస్తు కోసం https://www.tspolice.gov.in లో దరఖాస్తు చేయవచ్చు మండపం నిర్వాహకులు తమ కమిటీ వివరాలు, బాధ్యతలు వహించే వ్యక్తుల వివరాలు, ఫోన్ నంబర్లను మండపంలో ప్రదర్శించాలి. సమస్యలు ఎదురైతే, స్థానిక పోలీసు స్టేషన్ను సంప్రదించవచ్చు లేదా హైదరాబాద్ సిటీ పోలీస్ హెల్ప్లైన్ 8712665785ను సంప్రదించవచ్చు. గత ఏడాది అనుమతి పొందిన గణేష్ మండపాలకు ప్రభత్వం ఉచిత విద్యుత్ ఇచ్చింది. కాలనీలు, అపార్ట్మెంట్లు, గేటెడ్ కమ్యూనిటీలలో మండపాలకు పోలీసు అనుమతి అవసరం లేదు, కానీ స్థానిక పోలీసు స్టేషన్కు ముందస్తు సమాచారం ఇవ్వాలి.
టాప్ హెడ్ లైన్స్
ట్రెండింగ్ వార్తలు
