KCR 2004 election affidavit: కేటీఆర్ 'జమీందార్' వ్యాఖ్యలపై కాంగ్రెస్ మైండ్ గేమ్‌ - కేసీఆర్ 2004 అఫిడవిట్ లీక్.. అందులో ఏముందంటే?

Zamindar family: కేసీఆర్ కుటుంబానికి 1954 నుంచే భూములు ఉన్నాయన్న కేటీఆర్ వ్యాఖ్యలపై కాంగ్రెస్ రీ-కౌంటర్. కేసీఆర్ 2004 ఎన్నికల అఫిడవిట్‌ను సోషల్ మీడియాలో విడుదల చేశాయి కాంగ్రెస్ వర్గాలు.

కేటీఆర్ 'జమీందార్' వ్యాఖ్యలకు కాంగ్రెస్ మైండ్ గేమ్‌: కేసీఆర్ 2004 అఫిడవిట్ లీక్.. అందులో ఏముందంటే?

Source : x

Congress vs BRS land debate:  తెలంగాణ శాసనసభ వేదికగా ప్రారంభమైన భూముల రగడ రోజుకో కొత్త మలుపు తిరుగుతోంది. కేసీఆర్ కుటుంబానికి వందలాది ఎకరాల భూమి ఉందని సీఎం రేవంత్ రెడ్డి చేసిన ఆరోపణలను తిప్పికొట్టే క్రమంలో.. బీఆర్ఎస్ వర్కింగ్ ప్రెసిడెంట్ కేటీఆర్ చేసిన వ్యాఖ్యలను కాంగ్రెస్ వర్గాలు కొత్తగా డాక్యుమెంట్లు లీక్ చేస్తున్నాయి.  మా తండ్రి కేసీఆర్ జమీందారీ కుటుంబానికి చెందినవారు, 1954 నుంచే మాకు వందలాది ఎకరాల భూములు ఉన్నాయి  అని కేటీఆర్ ప్రెస్ మీట్‌లో వ్యాఖ్యానించారు.  దానికి విరుగుడుగా కాంగ్రెస్ నాయకులు కేసీఆర్ 2004 ఎన్నికల అఫిడవిట్‌ను సోషల్ మీడియా , మీడియా వేదికగా విడుదల చేసి కొత్త చర్చకు తెరలేపారు.

కాంగ్రెస్ వర్గాలు బయటపెట్టిన 2004 లోక్‌సభ ఎన్నికల నాటి కేసీఆర్ అధికారిక అఫిడవిట్ ప్రకారం.. ఆయన పేరిట  వ్యవసాయ భూమి 0 ఎకరాలు ,  వ్యవసాయేతర భూమి 0 ఎకరాలు అని స్పష్టంగా నమోదై ఉంది. 1954 నుంచే వందలాది ఎకరాల జమీందారీ ఆస్తులు తమకు ఉన్నాయని కేటీఆర్ వ్యాఖ్యానించినప్పుడు, 2004 నాటికి అధికారిక అఫిడవిట్‌లో సొంత పేరిట సున్నా ఎకరాలు ఉన్నట్లు ఎందుకు పేర్కొన్నారని కాంగ్రెస్ ప్రశ్నిస్తోంది.  కేటీఆర్ చెప్పే జమీందారీ లెక్కలు నిజమా? లేక కేసీఆర్ ఎన్నికల కమిషన్‌కు సమర్పించిన అధికారిక వివరాలు నిజమా? అంటూ టీపీసీసీ నేతలు నేరుగా నిలదీస్తున్నారు.

ఈ పరిణామం కాంగ్రెస్ పార్టీకి రాజకీయంగా పెద్ద అస్త్రాన్ని అందించింది. అసెంబ్లీలో సీఎం రేవంత్ రెడ్డి ఎర్రవల్లి ఫామ్‌హౌస్, సిద్దిపేట పరిసరాల్లో ఉన్న 440 ఎకరాల లెక్కలను బయటపెట్టినప్పుడు డిఫెన్స్‌లో పడ్డ బీఆర్ఎస్.. కౌంటర్ ఇవ్వబోయి మరింత వివాదంలో చిక్కుకుందనే అభిప్రాయం వ్యక్తమవుతోంది. 2004లో సున్నా ఎకరాలు ఉన్న కేసీఆర్ కుటుంబానికి, 2026 నాటికి వందలాది ఎకరాల విస్తారమైన ఫామ్‌హౌస్‌లు, భూకమతాలు ఎలా వచ్చాయనే ప్రశ్నను లేవనెత్తడం ద్వారా ధరణి  పోర్టల్ సమయంలోనే ఈ ఆస్తులన్నీ కూడబెట్టారనే తమ ప్రధాన ఆరోపణకు కాంగ్రెస్ బలం చేకూర్చుకుంటోంది.

మరోవైపు, కాంగ్రెస్ విడుదల చేసిన అఫిడవిట్‌పై బీఆర్ఎస్ శ్రేణులు కూడా తమదైన రీతిలో సమర్థించుకునే ప్రయత్నం చేస్తున్నాయి. ఉమ్మడి కుటుంబాల వ్యవస్థలో భూములు పిత్రార్జితంగా లేదా కుటుంబ పెద్దల పేరిట ఉంటాయని, 2004 నాటికి కేసీఆర్ పేరిట ప్రత్యేకంగా రిజిస్టర్ కాకపోవడం వల్ల అఫిడవిట్‌లో సాంకేతికంగా  సున్నా అని నమోదై ఉండవచ్చని బీఆర్ఎస్ మద్దతుదారులు వాదిస్తున్నారు. కేటీఆర్ చెప్పినట్లు కేసీఆర్ తండ్రి ,  పూర్వీకుల కాలం నాటి ఆస్తులనే ఆయన ఉద్దేశించారని, కావాలనే కాంగ్రెస్ సగం సమాచారంతో ప్రచారం చేస్తోందని బీఆర్ఎస్ సోషల్మీడియా కార్యకర్తలు కౌంటర్ ఇస్తున్నారు. ఈ అఫిడవిట్ అంశంపై ఇంకా బీఆర్ఎస్ అగ్రనేతలు స్పందించలేదు. 

 

సున్నా ఎకరాల నుండి వేల కోట్ల విలువైన ఆస్తులకు ఎదిగిన భూ బకాసురుడు కేసీఆర్ @KCRBRSPresident ...

ఎన్నికల అఫిడవిట్ తో అడ్డంగా దొరికిన కల్వకుంట్ల ముఠా!

తనకు ఒక్క ఎకరం కూడా భూమి లేదని 2004 కరీంనగర్ లోక్ సభ ఎన్నికల అఫిడవిట్‌లో తెలిపిన కేసీఆర్ గారికి, ఇప్పుడు వేల కోట్ల విలువైన భూములు… pic.twitter.com/E9oOjS8UBW

— Ponguleti Srinivasa Reddy (@INC_Ponguleti) September 17, 2026

 

 ఈ అఫిడవిట్ వార్  తెలంగాణ రాజకీయాల్లో కేసీఆర్ కుటుంబ ఆస్తుల చుట్టూ తిరుగుతున్న వివాదాన్ని మరింత రాజేసింది. అసెంబ్లీలో మొదలైన భూముల రగడ.. ప్రెస్ మీట్లు, పాత అఫిడవిట్ల తవ్వకాల వరకు వెళ్లడంతో రాబోయే రోజుల్లో 30 రోజుల ఫామ్‌హౌస్ విచారణ నివేదిక వచ్చే వరకు కాంగ్రెస్-బీఆర్ఎస్ మధ్య ఈ పొలిటికల్ ఫైట్ మరిన్ని ఘాటు విమర్శలకు దారితీసేలా కనిపిస్తోంది.

మరిన్ని చదవండి

కేసీఆర్ పుట్టుకతోనే కుబేరుడు - గోడలపై సున్నాలేసుకున్నది నువ్వే - భూములపై రేవంత్‌కు కేటీఆర్ ఘాటు కౌంటర్

కీసర చెరువు వద్ద ఏసీబీ హైవోల్టేజ్ ఆపరేషన్ - రూ. 5 లక్షల లంచం తీసుకుంటూ దొరికిన ఎస్ఐ, సీఐ! అసలు పట్టించింది బిర్యానీనే!