Sudini Srujan Reddy: తెలంగాణ రాజకీయాల్లో అందరి నోటా సృజన్ రెడ్డి పేరే - వ్యక్తిగా లో ప్రోఫైల్ .. కానీ !
Srujan Reddy: సూదిని సృజన్ రెడ్డి ఇప్పుడీ పేరు తెలంగాణ రాజకీయాల్లో మారుమోగిపోతోంది. ఇంతకీ ఈ సృజన్ రెడ్డి ఎవరు? ఎవరికి బాగా దగ్గర?
Complete details about Sudini Srujan Reddy: తెలంగాణ రాజకీయాల్లో ప్రస్తుతం సూదిని సృజన్ రెడ్డి పేరు పెను సంచలనంగా మారింది. బీఆర్ఎస్ పదే పేద ఈయన పేరును వెలుగులోకి తెస్తోంది. అదే సమయంలో కాంగ్రెస్ పార్టీ ఈ సృజన్ రెడ్డి మీవాడేనని ఆధారాలు చూపిస్తోంది. మొత్తంహా ఈ సృజన్ రెడ్డి హాట్ టాపిక్ గా మారారు. రాజకీయాలకు, వ్యాపారాలకు మధ్య వారధిలా వ్యవహరించే సృజన్ రెడ్డి, అటు అధికార కాంగ్రెస్, ఇటు ప్రతిపక్ష బీఆర్ఎస్ రెండింటితోనూ విడదీయలేని బంధుత్వాలు, సంబంధాలు కలిగి ఉండటం విశేషం. ఆయన బీఆర్ఎస్ మాజీ ఎమ్మెల్యే కందాల ఉపేందర్ రెడ్డికి స్వయానా అల్లుడు కావడంతో పాటు, ప్రస్తుత ముఖ్యమంత్రి రేవంత్ రెడ్డి భార్య వైపు నుండి దూరం బంధువు కూడా కావడంతో, ఈ బంధుత్వాల చార్ట్ రాజకీయ వర్గాల్లో హాట్ టాపిక్గా మారింది.
ఢిల్లీ లిక్కర్ స్కాంలో తొలి సారి సృజన్ రెడ్డి పేరు
సృజన్ రెడ్డి పేరు మొదటిసారిగా దేశవ్యాప్తంగా సంచలనం సృష్టించిన ఢిల్లీ లిక్కర్ స్కామ్ విచారణ సమయంలో ప్రముఖంగా వినిపించింది. ఈ కేసులో ఈడీ , సీబీఐ సోదాలు జరిగినప్పుడు ఆయన పాత్రపై అనేక ఆరోపణలు వచ్చాయి. అప్పట్లో బీఆర్ఎస్ అగ్రనేతలకు అత్యంత సన్నిహితుడిగా, ఆ పార్టీ ఆర్థిక వ్యవహారాల్లో కీలక వ్యక్తిగా ఆయన గుర్తింపు పొందారు. కొందరు ఆయన్ని కేవలం వ్యాపారవేత్తగా చూస్తే, రాజకీయ విశ్లేషకులు మాత్రం తెరవెనుక చక్రం తిప్పే వ్యూహకర్తగా అభివర్ణిస్తుంటారు.
బీఆర్ఎస్ హాయాంలో నూ భారీగా ప్రాజెక్టులు, కాంట్రాక్టులు
గత బీఆర్ఎస్ ప్రభుత్వ హయాంలో సృజన్ రెడ్డి సంస్థలు అత్యంత ప్రతిష్టాత్మకమైన మిషన్ భగీరథ, సాగునీటి ప్రాజెక్టుల్లో వేల కోట్ల రూపాయల విలువైన పనులను దక్కించుకున్నాయి. కేసీఆర్ ప్రభుత్వంతో ఉన్న సాన్నిహిత్యమే ఇందుకు కారణమని అప్పట్లో విపక్షాలు తీవ్రంగా విమర్శించేవి. అయితే, అనూహ్యంగా ప్రభుత్వం మారిన తర్వాత కూడా ఆయన హవా తగ్గకపోవడం, రేవంత్ రెడ్డి సీఎంగా ఉన్న ప్రస్తుత కాలంలోనూ ఆయన కంపెనీలు కాంట్రాక్టుల్లో పాలుపంచుకుంటున్నట్లు వార్తలు రావడం చర్చనీయాంశమైంది.
రేవంత్ రెడ్డి సతీమణి తరపు బంధువు - బీఆర్ఎస్కు అదే అస్త్రం
ప్రస్తుతం బీఆర్ఎస్ పార్టీ ముఖ్యమంత్రి రేవంత్ రెడ్డిని టార్గెట్ చేయడానికి సృజన్ రెడ్డిని ఒక అస్త్రంగా వాడుకుంటోంది. తమ హయాంలోనే సృజన్ రెడ్డి అత్యధిక కాంట్రాక్టులు పొందినప్పటికీ, రేవంత్ రెడ్డితో ఉన్న బంధుత్వాన్ని సాకుగా చూపుతూ రాజకీయ విమర్శలకు తెరలేపింది. ఏ పార్టీ అధికారంలో ఉన్నా తన వ్యాపార సామ్రాజ్యాన్ని విస్తరించుకోగల సృజన్ రెడ్డి నేర్పు, అటు మామ బీఆర్ఎస్ నేత ఉపేందర్ రెడ్డి, ఇటు బంధువు సీఎం రేవంత్ మధ్య నలిగిపోతున్నారు. ఇంత జరుగుతున్నా ఆయన ఇప్పటి వరకూ బయటకు వచ్చి తనపై వస్తున్న ఆరోపణలపై స్పందించలేదు.
టాప్ హెడ్ లైన్స్
ట్రెండింగ్ వార్తలు
