CM Revanth : హార్వార్డ్ లో 21వ శతాబ్దంలో నాయకత్వంపై శిక్షణ పూర్తి - మెరుగైన సేవలందించడంలో సాయపడుతుందని రేవంత్ సంతృప్తి

Harvard course: సీఎం రేవంత్ హార్వార్డ్ కోర్స్ పూర్తి చేశారు. ఈ విషయాన్ని సోషల్ మీడియాలో పోస్టు చేశారు

హార్వార్డ్ లో 21వ శతాబ్దంలో నాయకత్వంపై శిక్షణ పూర్తి - మెరుగైన సేవలందించడంలో సాయపడుతుందని రేవంత్ సంతృప్తి

Source : x

CM Revanth completes Harvard course:  తెలంగాణ ముఖ్యమంత్రి రేవంత్ రెడ్డి మరో అరుదైన మైలురాయిని చేరుకున్నారు. ప్రపంచ ప్రఖ్యాత  హార్వర్డ్ విశ్వవిద్యాలయం లోని  కెన్నడీ స్కూల్  వేదికగా ఆయన తన ఎగ్జిక్యూటివ్ ఎడ్యుకేషన్ ప్రోగ్రామ్‌ను విజయవంతంగా పూర్తి చేశారు.  21వ శతాబ్దంలో నాయకత్వం అనే అంశంపై ప్రత్యేక శిక్షణ తీసుకున్న ఆయన, ఈ విషయాన్ని సోషల్ మీడియా వేదికగా పంచుకుంటూ తన సంతోషాన్ని వ్యక్తం చేశారు. 

అంతర్జాతీయ వేదికపై అభ్యాసం 

ఈ ప్రతిష్టాత్మక ప్రోగ్రామ్‌లో ప్రపంచవ్యాప్తంగా 20 దేశాలకు చెందిన సుమారు 60 మందికి పైగా విద్యార్థులు పాల్గొన్నారు.  అక్కడి అసాధారణమైన అధ్యాపకులు, ఫ్యాకల్టీ నుండి మాత్రమే కాకుండా, వివిధ దేశాల నుండి వచ్చిన సహచర విద్యార్థుల నుండి కూడా నాయకత్వ లక్షణాలు, ప్రపంచ రాజకీయ పరిణామాలు,  పాలనాపరమైన మెలకువలను నేర్చుకున్నట్లు రేవంత్ రెడ్డి తెలిపారు. వివిధ రంగాల్లో అత్యున్నత శిఖరాలను అధిరోహించిన వ్యక్తులతో భేటీ కావడం ద్వారా కొత్త దృక్పథం లభించిందని ఆయన పేర్కొన్నారు.

ప్రతికూల వాతావరణంలోనూ పట్టుదల 

ముఖ్యమంత్రి ఈ శిక్షణను అత్యంత కఠినమైన వాతావరణ పరిస్థితుల మధ్య పూర్తి చేశారు. ఆయన అక్కడ ఉన్న సమయంలో అమెరికాను భారీ మంచు తుఫాను వణికించింది. ఉష్ణోగ్రతలు గడ్డకట్టే స్థాయి కంటే చాలా తక్కువగా పడిపోవడమే కాకుండా, సుమారు 3 అడుగుల మేర మంచు పేరుకుపోయింది. అత్యంత చల్లని గాలులు వీస్తున్నప్పటికీ, ఏమాత్రం వెనకడుగు వేయకుండా రేవంత్ రెడ్డి తన విద్యాభ్యాసాన్ని కొనసాగించి,  విజయవంతంగా పూర్తి చేశారు.

నాయకత్వ పటిమకు కొత్త మెరుగులు 

రాష్ట్ర అభివృద్ధి కోసం నిరంతరం శ్రమించే రేవంత్ రెడ్డి, తన నాయకత్వ పటిమను మరింత మెరుగుపరుచుకోవడానికి ఈ కోర్సును ఎంచుకున్నారు. ప్రస్తుత ఆధునిక కాలంలో ఎదురవుతున్న సవాళ్లను ఎలా ఎదుర్కోవాలి, వ్యూహాత్మక నిర్ణయాలు ఎలా తీసుకోవాలి అనే అంశాలపై హార్వర్డ్ వంటి సంస్థలో శిక్షణ పొందడం తెలంగాణ పాలనలో కొత్త మార్పులకు సంకేతంగా భావిస్తున్నారు. ఈ సందర్భంగా ఆయనతో కలిసి చదివిన వివిధ దేశాల ప్రతినిధులతో తెలంగాణ రాష్ట్ర ప్రగతిని కూడా చర్చించే అవకాశం లభించింది. 

With great delight and modest accomplishment I wish to share that I have completed my executive education program “Leadership in the 21st century”at the prestigious #Harvard @Kennedy_School today.

The class of over 60 students from 20 countries meant acquiring learnings not… pic.twitter.com/54azRDuL3v

— Revanth Reddy (@revanth_anumula) January 30, 2026

రేవంత్ సంతోషం  

"చాలా సంతోషంగా ఉంది.. ఈ ఘనతను వినమ్రంగా స్వీకరిస్తున్నాను" అంటూ రేవంత్ రెడ్డి తన అనుభవాన్ని పంచుకున్నారు. ప్రపంచ స్థాయి విద్యా సంస్థలో నేర్చుకున్న ఈ పాఠాలు రాబోయే రోజుల్లో రాష్ట్ర ప్రజలకు మెరుగైన సేవలందించడంలో తనకు ఎంతగానో తోడ్పడతాయని ఆయన ఆశాభావం వ్యక్తం చేశారు. ప్రస్తుతం ఆయన హార్వర్డ్ గ్రాడ్యుయేషన్ పూర్తి చేసిన ఫోటోలు సోషల్ మీడియాలో వైరల్ అవుతుండగా, అభిమానులు మరియు పార్టీ శ్రేణుల నుండి అభినందనలు వెల్లువెత్తుతున్నాయి. 

 

మరిన్ని చదవండి

నల్లమల సాగర్‌కు రేవంత్ సహకారం - తెలంగాణకు అన్యాయం - హరీష్ రావు మరోసారి తీవ్ర ఆరోపణలు

మేడారంలో జనజాతర! 8 కిలోమీటర్ల ట్రాఫిక్‌ జామ్, రద్దీ పెరగడంతో ప్రధాన ద్వారం వద్దే మొక్కులు!