22A Land Declaration: 222A నిషేధిత భూమిగా ఎలా ప్రకటిస్తారు.. నిబంధనలపై సీఎం రేవంత్ రెడ్డి కీలక ప్రకటన

22A Land Declaration: 22A భూముల ప్రకటనపై సీఎం రేవంత్ రెడ్డి కీలక ప్రకటన చేశారు. 22A నిషేధిత జాబితాలో భూములు పెట్టటానికి కొన్ని నిబంధనలు ఉన్నాయని తెలిపారు.

22A నిషేధిత భూమిగా ఎలా ప్రకటిస్తారు.. నిబంధనలపై సీఎం రేవంత్ రెడ్డి కీలక ప్రకటన

Source : Twitter

Show Quick Read

Key points generated by AI, verified by newsroom

• 22A నిషేధిత భూముల ప్రక్రియను సీఎం రేవంత్ రెడ్డి వివరించారు.
• ULC మిగులు, లేఅవుట్ సమస్యల పరిష్కారానికి కొత్త విధానాలు.
• సింగరేణి భూ సమస్యలకు ఉన్నతస్థాయి కమిటీ ఏర్పాటు చేస్తారు.

22A Land Declaration: నిషేధిత భూములు 22Aపై తెలంగాణ అసెంబ్లీలో సీఎం రేవంత్ రెడ్డి కీలక ప్రకటన చేశారు. ఏ భూమిని అయినా 22A నిషేధిత జాబితాలో పెట్టటానికి కొన్ని నిబంధనలు, విచారణలు ఉన్నాయని తెలిపారు. 22A నిషేధిత భూమిగా ప్రకటించే ముందు ఎలాంటి నిబంధనలు, విచారణలు చేస్తారో సీఎం వివరించారు.  

హైపవర్ కమిటీ 

రాష్ట్రంలో 22 A కింద నిషేధిత జాబితాలో నిరుపేదలకు సంబంధించిన ఆస్తులపై 30 రోజుల్లోగా న్యాయం జరిగేలా ప్రభుత్వం నిర్ణయం తీసుకుంటుందని సీఎం  రేవంత్ రెడ్డి శాసనసభ వేదికగా ప్రకటించారు. 22ఏ నిషేధిత జాబితా వివాదాల పరిష్కారానికి సీసీఎల్ఏ ప్రత్యేక కార్యదర్శి, న్యాయ శాఖ కార్యదర్శి, స్టాంప్స్ అండ్ రిజిస్ట్రేషన్స్ ఉన్నతాధికారితో కూడిన హైపవర్ ఆఫీసర్స్ కమిటీని నియమిస్తున్నట్టు తెలిపారు. జాబితా 22A పై శాసనసభలో జరిగిన స్వల్పకాలిక చర్చపై ముఖ్యమంత్రి సుదీర్ఘమైన వివరణ ఇచ్చారు. నిజాం కాలం నుంచి ఉమ్మడి ఆంధ్రప్రదేశ్ ఆ తర్వాత తెలంగాణ ఏర్పడినప్పటి నుంచి ఇప్పటివరకు భూములకు సంబంధించి చేసిన చట్టాలు, వాటి చారిత్రక పరిణామ క్రమాన్ని సభలో వివరించారు.

న్యాయమైన, చట్టబద్ధమైన అంశాల్లో నిరుపేదలకు అన్యాయం జరక్కుండా అవసరమైన అన్ని చర్యలు ప్రభుత్వం తీసుకుంటుందని హామీ ఇచ్చారు. ప్రధానంగా ప్రభుత్వం గుర్తించిన 12 అంశాల్లో ప్రభుత్వం త్వరలోనే నిర్ణయం తీసుకుంటుందని ముఖ్యమంత్రి ఆ 12 అంశాలను సభలో వెల్లడించారు.

2A నిషేధిత భూమిగా ప్రకటించే విధానం

1. 22A భూముల వివాదానికి సంబంధించి సబ్ కలెక్టర్, ఆర్డీవో మాత్రమే విచారణ ప్రారంభిస్తారు. 
2. గ్రామాలు అయితే భూ సర్వే నెంబర్, సబ్ డివిజన్, విస్తీర్ణం, పట్టాదారు, యజమాని వివరాలు అధికారులు గుర్తిస్తారు.
3. పట్టణ ప్రాంతాల్లో వార్డు, బ్లాక్, ప్లాట్, డోర్ నెంబర్ వివరాలు నమోదు చేస్తారు.
4. రెవెన్యూ, ఎండోమెంట్, వక్ఫ్ సంబంధిత భూ రికార్డుల వివరాలు సేకరించి వాటిని అధికారులు పరిశీలిస్తారు. భూమి పరిస్థితిపై నిర్థారణకు వస్తారు. 
5. మొత్తం భూమిలో కొంత భాగం మాత్రమే నిషేధిత భూమిలో ఉంటే ఆ భాగాన్ని మాత్రమే 22Aలో చేరుస్తారు. మిగతా భూమిని 22A నిషేధిత జాబితా నుంచి తొలగిస్తారు అధికారులు. 
6. భూయజమానికి ముందుగా నోటీసలు జారీ చేస్తారు. అందుబాటులో లేకపోతే ఈ-మెయిల్ లేదా ఆధార్‌కు లింక్ అయిన అడ్రస్‌కు రిజిస్టర్ పోస్ట్ చేస్తారు.
7. ఈ ప్రాసెస్ పూర్తైన తర్వాత అవసరం అయితే స్థానిక వార్తాపత్రికల్లో ప్రకటన ఇస్తారు. భూ యజమానికి 15 రోజుల సమయం ఇస్తారు.
8. ఈ సమయంలో భూయజమాని.. తన భూమిని నిషేధిత జాబితాలో పెట్టకుండా కాపాడుకోవచ్చు.
9. సబ్ కలెక్టర్, ఆర్డీవో విచారణ మొత్తాన్ని, సంబంధిత డాక్యుమెంట్లను ఆడియో కాపీతో సహా ఆర్డర్ కాపీని సంబంధిత వ్యక్తి అందిస్తారు. 
10. 22A జాబితాకు సంబంధించి వ్యవసాయ భూమి విస్తీర్ణం ఒక  ఎకరానికి మించి, వ్యవసాయేతర భూమి అయితే వెయ్యి గజాలకు మించి ఉంటే రాష్ట్ర ప్రభుత్వం ఉత్తర్వులు జారీ చేస్తుంది. 
11. ఈ విచారణ పూర్తైన తర్వాత.. ఆ భూమిని 22A నిషేధిత జాబితాలో చేరుస్తారు. ప్రభుత్వ ఉత్తర్వులు వెలువడిన తర్వాతే ఆ వివరాలను IGRS రికార్డుల్లో నమోదు చేస్తారు. కేంద్ర ప్రభుత్వ డేటా బేస్‌లో ఆన్‌లైన్‌లో చేరుస్తామని సీఎం రేవంత్ రెడ్డి తెలిపారు. 22A నిషేధిత జాబితాలోకి ఎక్కడ కూడా మ్యాన్యువల్‌గా చేరుస్తామన్నారు.  

'పట్టణ భూగరిష్ట పరిమితి చట్టం (ULC) మిగులు భూముల క్రమబద్ధీకరణ కోసం నూతన విధానాన్ని త్వరలోనే ప్రవేశపెట్టనుంది ప్రభుత్వం.  ఈ పథకం పెండింగ్ లో ఉన్న పాత దరఖాస్తులతో పాటు కొత్త దరఖాస్తులన్నింటికీ వర్తిస్తుంది. భూముల రిజిస్ట్రేషన్, క్రమబద్ధీకరణ ప్రక్రియలు రెండూ సమాంతరంగా, ఏకకాలంలో చేపడతాం' అని సీఎం రేవంత్ రెడ్డి అన్నారు.  

'కాంపిటెంట్ అథారిటీ ఆమోదించిన లేఅవుట్లలో పెండింగ్లో ఉన్న రిజిస్ట్రేషన్ల దరఖాస్తులను పరిశీలించి, తగిన పరిష్కారం చూపేందుకు వారం రోజుల్లోగా ఒక సమగ్ర వ్యవస్థను ఏర్పాటు చేసి ఈ సమస్యను పరిష్కరిస్తాం. ఇలాంటి ఆస్తుల క్రమబద్ధీకరణ త్వరగా పూర్తి చేసేందుకు నూతన పథకాన్ని ప్రవేశ పెడతాం. సింగరేణి బొగ్గు గని ప్రాంతాల సమస్యకు పరిష్కరించడానికి జిల్లా స్థాయి ఉన్నతాధికార కమిటీని ఏర్పాటు చేస్తాం. ఈ కమిటీ పెండింగ్ లో ఉన్న అన్ని దరఖాస్తులన్నింటినీ సమగ్రంగా పరిశీలించి, నిర్దేశిత అర్హతా ప్రమాణాల మేరకు పరిష్కరిస్తుంది' అని సీఎం రేవంత్ రెడ్డి అన్నారు. 

 

మరిన్ని చదవండి

22A భూముల వివాదం.. నిజమైన సంక్షోభమా? బీఆర్ఎస్ మైండ్ గేమా?