Realme P1 5G Series: రియల్‌మీ పీ1 5జీ సిరీస్ వచ్చేసింది - రూ.15 వేలలోనే సూపర్ ఫోన్!
Realme P1 5G: ప్రముఖ స్మార్ట్ ఫోన్ బ్రాండ్ రియల్‌మీ తన పీ1 5జీ సిరీస్ ఫోన్లను మనదేశంలో లాంచ్ చేసింది. బడ్జెట్ 5జీ మొబైల్స్‌‌గా ఇవి మార్కెట్లోకి వచ్చాయి.
Realme P1 Pro 5G: రియల్‌మీ పీ1 5జీ సిరీస్ ఫోన్లు మనదేశంలో సోమవారం లాంచ్ అయ్యాయి. ఈ సిరీస్‌లో రియల్‌మీ పీ1 5జీ, రియల్‌మీ పీ1 ప్రో 5జీ ఫోన్లు ఉన్నాయి. గ్లాసీ, స్పార్క్లింగ్, ఫీనిక్స్ డిజైన్‌తో ఇవి మార్కెట్లో ఎంట్రీ ఇచ్చాయి. వీటిలో బేస్ మోడల్‌లో మీడియాటెక్ డైమెన్సిటీ 7050 ప్రాసెసర్‌ను అందించారు. హై ఎండ్ ప్రో వెర్షన్‌లో మాత్రం క్వాల్‌కాం స్నాప్‌డ్రాగన్ 6 జెన్ 1 ప్రాసెసర్‌ అందుబాటులో ఉంది. వీటిలో 45W సూపర్‌వూక్ ఛార్జింగ్‌ను సపోర్ట్ చేసే 5000 ఎంఏహెచ్ బ్యాటరీలు ఉండనున్నాయి.
రియల్‌మీ పీ1 5జీ ధర (Realme P1 5G Price in India)
ఈ ఫోన్ రెండు వేరియంట్లలో మనదేశంలో లాంచ్ అయింది. వీటిలో బేస్ వేరియంట్ అయిన 6 జీబీ ర్యామ్ + 128 జీబీ స్టోరేజ్ వేరియంట్ ధర రూ.14,999గా ఉంది. హై ఎండ్ అయిన 8 జీబీ ర్యామ్ + 256 జీబీ స్టోరేజ్ వేరియంట్ ధరను రూ.16,999గా నిర్ణయించారు. పీకాక్ గ్రీన్, ఫీనిక్స్ రెడ్ కలర్ ఆప్షన్లలో దీన్ని కొనుగోలు చేయవచ్చు. ఈ ఫోన్‌కు సంబంధించిన ఎర్లీ బర్డ్ సేల్ నేడు (ఏప్రిల్ 15వ తేదీ) సాయంత్రం ఆరు గంటల నుంచి ఎనిమిది గంటల వరకు జరగనుంది. ఏప్రిల్ 22వ తేదీన మధ్యాహ్నం 12 గంటలకు సేల్ పూర్తి స్థాయిలో ప్రారంభం కానుంది.
రియల్‌మీ పీ1 ప్రో 5జీ ధర (Realme P1 Pro 5G Price in India)
రియల్‌మీ పీ1 ప్రో రెండు రెండు వేరియంట్లలో అందుబాటులో ఉంది. 8 జీబీ ర్యామ్ + 128 జీబీ స్టోరేజ్ వేరియంట్ ధర రూ.19,999గానూ, 8 జీబీ ర్యామ్ + 256 జీబీ స్టోరేజ్ వేరియంట్ ధర రూ.20,999గానూ ఉంది. ప్యారట్ బ్లూ, ఫీనిక్స్ రెడ్ కలర్ ఆప్షన్లలో ఈ ఫోన్ లాంచ్ అయింది. దీనికి సంబంధించిన లిమిటెడ్ సేల్ ఏప్రిల్ 22వ తేదీన సాయంత్రం ఆరు గంటల నుంచి ఎనిమిది గంటల వరకు జరగనుంది. పూర్తి స్థాయిలో సేల్ ఏప్రిల్ 30వ తేదీన మధ్యాహ్నం 12 గంటలకు మొదలవుతుంది.
రియల్‌మీ పీ1 5జీ స్పెసిఫికేషన్లు, ఫీచర్లు (Realme P1 5G Specifications)
ఇందులో 6.67 అంగుళాల ఫుల్ హెచ్‌డీ+ అమోఎల్ఈడీ డిస్‌ప్లేను అందించారు. దీని స్క్రీన్ రిఫ్రెష్ రేట్ 120 హెర్ట్జ్ కాగా, టచ్ శాంప్లింగ్ రేట్ 240 హెర్ట్జ్‌గా ఉంది. రెయిన్ వాటర్ టచ్ ఫీచర్‌ను రియల్‌మీ పీ1లో చూడవచ్చు. అంటే తడి చేతులతో కూడా ఫోన్‌ను ఆపరేట్ చేయవచ్చన్న మాట. మీడియాటెక్ డైమెన్సిటీ 7050 ప్రాసెసర్‌పై రియల్‌మీ పీ1 రన్ కానుంది. 8 జీబీ వరకు ర్యామ్, 256 జీబీ వరకు స్టోరేజ్ ఈ ఫోన్‌లో ఉన్నాయి.
ఇక కెమెరాల విషయానికి వస్తే... ఫోన్ వెనకవైపు డ్యూయల్ కెమెరా సెటప్ ఉంది. వీటిలో ప్రధాన కెమెరా సామర్థ్యం 50 మెగాపిక్సెల్ కాగా, దీంతోపాటు 2 మెగాపిక్సల్ డెప్త్ సెన్సార్‌ను కూడా అందించారు. సెల్ఫీలు, వీడియో కాల్స్ కోసం ముందువైపు 16 మెగాపిక్సెల్ సెన్సార్ అందుబాటులో ఉంది.
ఆండ్రాయిడ్ 14 ఆధారిత రియల్‌మీ యూఐ 5.0 ఆపరేటింగ్ సిస్టంపై ఈ ఫోన్ పని చేయనుంది. మరో రెండు జనరేషన్ల ఆపరేటింగ్ సిస్టం అప్‌డేట్లు అందించనున్నారు. దీని బ్యాటరీ సామర్థ్యం 5000 ఎంఏహెచ్ కాగా, 45W సూపర్‌వూక్ ఫాస్ట్ ఛార్జింగ్‌ను సపోర్ట్ చేయనుంది. ఐపీ54 డస్ట్, స్ప్లాష్ రెసిస్టెన్స్ సపోర్ట్ కూడా ఈ ఫోన్‌లో ఉంది.
Read Also: 'వ్లాగర్' పేరుతో గూగుల్ సృష్టిస్తున్న AI సంచలనం, ఒక్క ఫోటోతో సినిమా తీసేస్తోంది
రియల్‌మీ పీ1 ప్రో 5జీ స్పెసిఫికేషన్లు, ఫీచర్లు (Realme P1 Pro 5G Specifications)
రియల్‌మీ పీ1 ప్రో 5జీ ఆపరేటింగ్ సిస్టం, బ్యాటరీ, ఛార్జింగ్, సెల్ఫీ కెమెరా ఫీచర్లు రియల్‌మీ పీ1 తరహాలోనే ఉన్నాయి. క్వాల్‌కాం స్నాప్‌డ్రాగన్ 6 జెన్ 1 ప్రాసెసర్‌పై ఈ ఫోన్ పని చేయనుంది. 8 జీబీ వరకు ర్యామ్, 256 జీబీ వరకు స్టోరేజ్ ఈ ఫోన్‌లో ఉన్నాయి.
ఇందులో 6.7 అంగుళాల ఫుల్ హెచ్‌డీ+ కర్వ్‌డ్ ఓఎల్ఈడీ డిస్‌ప్లే అందించారు. దీని స్క్రీన్ రిఫ్రెష్ రేట్ 120 హెర్ట్జ్‌గానూ, స్క్రీన్ టు బాడీ రేషియో 93 శాతంగానూ ఉంది. రియల్‌మీ పీ1 తరహాలోనే రెయిన్ వాటర్ టచ్ ఫీచర్ కూడా అందుబాటులో ఉంది. ఐపీ65 డస్ట్, స్ప్లాష్ రెసిస్టెన్స్ ఫీచర్ అందించారు.
రియల్‌మీ పీ1 ప్రో 5జీలో 50 మెగాపిక్సెల్ సోనీ ఎల్‌వైటీ 600 కెమెరాను ప్రధాన సెన్సార్‌గా అందించారు. ఆప్టికల్ ఇమేజ్ స్టెబిలైజేషన్ ఫీచర్ కూడా ఇందులో ఉంది. నైట్ ఫ్యూజన్, అల్ట్రా హెచ్‌డీఆర్, నైట్ ఐ ఫీచర్లు కూడా ఉన్నాయి. దీంతోపాటు 8 మెగాపిక్సెల్ అల్ట్రా వైడ్ యాంగిల్ లెన్స్ అందించారు.
Read Also: మామా నీ ‘టైమ్’ ఎంత? చంద్రుడికి టైమ్ జోన్ సెట్ చేస్తున్న నాసా, వైట్ హౌస్ కీలక ఆదేశాలు
టాప్ హెడ్ లైన్స్
ట్రెండింగ్ వార్తలు
