Poco M4 Pro 4G Launch: పోకో కొత్త ఫోన్ వచ్చేస్తుంది - ధర రూ.13 వేలలోపే?

ప్రముఖ స్మార్ట్ ఫోన్ బ్రాండ్ పోకో మనదేశంలో కొత్త స్మార్ట్ ఫోన్ లాంచ్ చేయనుంది. అదే పోకో ఎం4 ప్రో 5జీ. ఫిబ్రవరి 28వ తేదీన ఈ ఫోన్ లాంచ్ కానుంది.

పోకో ఎం4 ప్రో 4జీ స్మార్ట్ ఫోన్ ఫిబ్రవరి 28వ తేదీన లాంచ్ కానుంది. (Image Credit: Poco India Twitter)

Poco M4 Pro 4G: పోకో ఎం4 ప్రో 4జీ స్మార్ట్ ఫోన్ మనదేశంలో ఫిబ్రవరి 28వ తేదీన లాంచ్ కానుంది. ఈ విషయాన్ని కంపెనీ అధికారికంగా ప్రకటించింది. రెడ్‌మీ నోట్ 11 5జీకి రీబ్రాండెడ్ వెర్షన్‌గా పోకో ఎం4 ప్రో 5జీని కంపెనీ ఇప్పటికే లాంచ్ చేసింది. ఇప్పుడు ఇందులో 4జీ వేరియంట్ కూడా లాంచ్ కానుంది. ఇందులో రెండు ర్యామ్, స్టోరేజ్ వేరియంట్లు ఉండనున్నట్లు తెలుస్తోంది. మీడియాటెక్ హీలియో జీ96 ప్రాసెసర్‌ను ఇందులో అందించనున్నట్లు వార్తలు వస్తున్నాయి.

పోకో ఎం4 ప్రో 4జీ ఇండియా లాంచ్ తేదీ
ఈ స్మార్ట్ ఫోన్ లాంచ్‌ను పోకో ఇండియా ట్విట్టర్ ఖాతా ద్వారా కంపెనీ ప్రకటించింది. ఫిబ్రవరి 28వ తేదీన సాయంత్రం ఏడు గంటలకు ఈ ఫోన్ మనదేశంలో లాంచ్ కానుంది. దీనికి సంబంధించిన మీడియా ఇన్వైట్లను కూడా కంపెనీ పంపించింది. దీని ధర వివరాలు ఇంకా తెలియరాలేదు. ఇందులో 5జీ వేరియంట్ ధరే రూ.15 వేలలోపు ఉంది. కాబట్టి దీని ధర రూ.13 వేల రేంజ్ నుంచి ప్రారంభం అయ్యే అవకాశం ఉంది.

పోకో ఎం4 ప్రో 4జీ స్పెసిఫికేషన్లు (అంచనా)
ప్రముఖ టిప్‌స్టర్ యోగేష్ బ్రార్ టీజ్ చేసిన దాని ప్రకారం... ఈ ఫోన్ ఆండ్రాయిడ్ 11 ఆధారిత ఎంఐయూఐ 13 ఆపరేటింగ్ సిస్టంపై ఈ ఫోన్ పని చేయనుంది. ఇందులో 6.4 అంగుళాల ఫుల్ హెచ్‌డీ+ అమోఎల్ఈడీ డిస్‌ప్లేను అందించారు. ఈ ఫోన్ స్క్రీన్ రిఫ్రెష్ రేట్ 90 హెర్ట్జ్‌గా ఉండనుంది.

మీడియాటెక్ హీలియో జీ96 ప్రాసెసర్‌పై ఈ ఫోన్ పని చేయనుందని తెలుస్తోంది. 8 జీబీ వరకు ఎల్‌పీడీడీఆర్4ఎక్స్ ర్యామ్, 128 జీబీ యూఎఫ్ఎస్ 2.2 స్టోరేజ్‌ను ఇందులో అందించనున్నారు. ఈ టిప్‌స్టర్ తెలిపిన  దాని ప్రకారం... ఇందులో రెండు ర్యామ్, స్టోరేజ్ వేరియంట్లు ఉండనున్నాయి.

ఇందులో వెనకవైపు మూడు కెమెరాలు ఉన్నట్లు తెలుస్తోంది. వీటిలో ప్రధాన కెమెరా సామర్థ్యం 64 మెగాపిక్సెల్ కాగా... దీంతోపాటు 8 మెగాపిక్సెల్ అల్ట్రా వైడ్ యాంగిల్ సెన్సార్, 2 మెగాపిక్సెల్ మాక్రో షూటర్ కూడా ఉండనున్నాయి. సెల్ఫీలు, వీడియో కాల్స్ కోసం ముందువైపు 16 మెగాపిక్సెల్ కెమెరా ఉండనుందని సమాచారం.

దీని బ్యాటరీ సామర్థ్యం 5000 ఎంఏహెచ్‌గా ఉండనుందని వార్తలు వస్తున్నాయి. 33W ఫాస్ట్ చార్జింగ్‌ను కూడా ఇది సపోర్ట్ చేయనుంది. పోకో ఎం4 ప్రో 5జీ స్మార్ట్ ఫోన్ రూ.14,999గా ఉండనుంది. ఇందులో మూడు వేరియంట్లు లాంచ్ అయ్యాయి. వీటిలో 8 జీబీ వరకు ర్యామ్, 128 జీబీ వరకు స్టోరేజ్ అందించారు. దీని స్క్రీన్ రిఫ్రెష్ రేట్ 90 హెర్ట్జ్‌గా ఉంది. ఆక్టాకోర్ మీడియాటెక్ డైమెన్సిటీ 810 ప్రాసెసర్‌పై ఈ ఫోన్ పనిచేయనుంది. ఫోన్ వెనకవైపు రెండు కెమెరాలు ఉన్నాయి. 5000 ఎంఏహెచ్ బ్యాటరీని ఇందులో అందించారు. 33W ప్రో ఫాస్ట్ చార్జింగ్‌ను ఈ ఫోన్ సపోర్ట్ చేయనుంది.