Vivo V29e: గ్లాసీ డిజైన్, సూపర్ కెమెరాలతో వచ్చిన వివో వీ29ఈ 5జీ - రూ.30 వేలలోపే బెస్ట్ ఫోన్?

ప్రముఖ స్మార్ట్ ఫోన్ బ్రాండ్ వివో తన కొత్త స్మార్ట్ ఫోన్ వీ29ఈని మనదేశంలో లాంచ్ చేసింది. దీని ధర రూ.26,999గా నిర్ణయించారు.

వివో వీ29ఈ స్మార్ట్ ఫోన్ మనదేశంలో లాంచ్ అయింది.

Source : Vivo India X/Twitter

వివో వీ29ఈ స్మార్ట్ ఫోన్ మనదేశంలో లాంచ్ అయింది. వివో వీ29 సిరీస్‌లో ఈ ఫోన్ మార్కెట్లోకి ఎంట్రీ ఇచ్చింది. ఈ సంవత్సరం జూన్‌లో గ్లోబల్ లాంచ్ అయిన వివో వీ29 లైట్ 5జీ తరహాలో దీని ఫీచర్లు ఉన్నాయి. ఈ ఫోన్‌లో క్వాల్‌కాం స్నాప్‌డ్రాగన్ 695 ప్రాసెసర్‌ను అందించారు. దీని బ్యాటరీ సామర్థ్యం 5000 ఎంఏహెచ్‌గా ఉంది. 44W వైర్డ్ ఫాస్ట్ ఛార్జింగ్‌ను ఈ ఫోన్ సపోర్ట్ చేయనుంది.

వివో వీ29ఈ ధర
ఇందులో రెండు వేరియంట్లు అందుబాటులో ఉన్నాయి. వీటిలో ప్రారంభ వేరియంట్ అయిన 8 జీబీ ర్యామ్ + 128 జీబీ స్టోరేజ్ వేరియంట్ ధర రూ.26,999గా నిర్ణయించారు. ఇక 8 జీబీ ర్యామ్ + 256 జీబీ స్టోరేజ్ వేరియంట్ ధర రూ.28,999గా ఉంది. ఆర్టిస్టిక్ బ్లూ, ఆర్టిస్టిక్ రెడ్ కలర్ ఆప్షన్లలో ఈ ఫోన్ కొనుగోలు చేయవచ్చు. దీనికి సంబంధించిన ప్రీ-ఆర్డర్లు ఇప్పటికే ప్రారంభం అయ్యాయి. వివో ఈ-స్టోర్, ఫ్లిప్‌కార్ట్‌ల్లో ఈ ఫోన్ కొనుగోలు చేయవచ్చు. సెప్టెంబర్ 7వ తేదీ నుంచి దీనికి సంబంధించిన సేల్ ప్రారంభం కానుంది. 

ఈ స్మార్ట్ ఫోన్ కొనుగోలుపై రూ.2,000 వరకు అడిషనల్ డిస్కౌంట్ లభించనుంది. దీంతోపాటు ఎంపిక చేసిన బ్యాంక్ ఆఫర్ల ద్వారా మరో రూ.2,500 తగ్గించనున్నారు. దీంతోపాటు కొన్ని కార్డుల వినియోగదారులకు కూడా రూ.2,500 వరకు అదనపు తగ్గింపు లభించనుంది. అయితే రూ.30 వేలలోపు ప్రస్తుతం మార్కెట్లో ఉన్న బెస్ట్ ఫోన్ ఇదేనా అంటే కాస్త ఆలోచించాల్సిందే. ఎందుకంటే ఇదే సెగ్మెంట్‌లో ఐకూ నియో 7, రియల్‌మీ 11 ప్రో ప్లస్, పోకో ఎఫ్5 5జీ, మోటొరోలా ఎడ్జ్ 40లతో వివో వీ29ఈ పోటీ పడనుంది.

వివో వీ29ఈ స్పెసిఫికేషన్లు, ఫీచర్లు
ఇందులో 6.78 అంగుళాల ఫుల్ హెచ్‌డీ+ డిస్‌ప్లేను అందించారు. దీని స్క్రీన్ రిఫ్రెష్ రేట్ 120 హెర్ట్జ్ కాగా, పీక్ బ్రైట్‌నెస్ 1300 నిట్స్‌గా ఉండనుంది. ఆక్టాకోర్ క్వాల్‌కాం స్నాప్‌డ్రాగన్ 695 ప్రాసెసర్‌పై ఈ  ఫోన్ పని చేయనుంది. 8 జీబీ వరకు ర్యామ్, 256 జీబీ వరకు స్టోరేజ్ ఈ ఫోన్‌లో ఉంది.

ఇక కెమెరాల విషయానికి వస్తే... ఫోన్ వెనకవైపు రెండు కెమెరాలు ఉన్నాయి. వీటిలో ప్రధాన కెమెరా సామర్థ్యం 64 మెగాపిక్సెల్ కాగా, దీంతోపాటు 8 మెగాపిక్సెల్ సెన్సార్ కూడా ఉంది. సెల్ఫీలు, వీడియో కాల్స్ కోసం ముందువైపు 16 మెగాపిక్సెల్ కెమెరా అందుబాటులో ఉండనుంది. ఆండ్రాయిడ్ 13 ఆధారిత ఫన్‌టచ్ఓఎస్ 13 ఆపరేటింగ్ సిస్టంపై వివో వీ29ఈ పని చేయనుంది.

దీని బ్యాటరీ సామర్థ్యం 5000 ఎంఏహెచ్‌గా ఉంది. 44W వైర్డ్ ఫాస్ట్ ఛార్జింగ్‌ను ఈ ఫోన్ సపోర్ట్ చేయనుంది. 5జీ, 4జీ, వైఫై, బ్లూటూత్ వీ5.1, జీపీఎస్, యూఎస్‌బీ టైప్-సీ వంటి ఫీచర్లను ఇందులో అందించారు. దీని మందం 0.75 సెంటీమీటర్లు కాగా, బరువు 180.5 గ్రాములుగా ఉంది.

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial