Realme GT Neo 3 Naruto Edition: కొత్త థీమ్‌తో రానున్న రియల్‌మీ జీటీ నియో 3 - వావ్ అనిపించే లుక్, డిజైన్‌తో!

ప్రముఖ స్మార్ట్ ఫోన్ బ్రాండ్ రియల్‌మీ తన కొత్త స్మార్ట్ ఫోన్‌ను మనదేశంలో లాంచ్ చేయనున్నట్లు తెలుస్తోంది.

రియల్‌మీ జీటీ నియో 3 నరుటో ఎడిషన్ స్మార్ట్ ఫోన్ లాంచ్ అయింది.

రియల్‌మీ జీటీ నియో 3 నరుటో ఎడిషన్ ఈ సంవత్సరం మేలో చైనాలో లాంచ్ అయింది. ఇప్పుడు ఈ ఫోన్ మనదేశంలో కూడా లాంచ్ కానుందని తెలుస్తోంది. ప్రముఖ టిప్‌స్టర్ అభిషేక్ యాదవ్ ఈ విషయాన్ని ట్విట్టర్ ద్వారా లీక్ చేశారు. అయితే సరిగ్గా ఎప్పుడు లాంచ్ అవుతుందనే విషయం మాత్రం తెలియరాలేదు.

చైనాలో రియల్‌మీ జీటీ నియో 3 నరుటో ఎడిషన్ స్మార్ట్ ఫోన్ చైనాలో 2,799 యువాన్ల (సుమారు రూ.32,250) ధరతో లాంచ్ అయింది. ఇది 12 జీబీ ర్యామ్ + 256 జీబీ స్టోరేజ్ వేరియంట్ ధర. మనదేశంలో కూడా ఈ ఫోన్ ఇదే ధరతో లాంచ్ అయ్యే అవకాశం ఉంది.

రియల్‌మీ ప్రముఖ జపనీస్ యానిమ్, మాంగా సిరీస్ నరుటోతో భాగస్వామ్యం ఏర్పరచుకుంది. నరుటో థీమ్‌పై ఈ కొత్త స్మార్ట్ ఫోన్‌ను రియల్‌మీ రూపొందించింది. దీని కోసం రియల్‌మీ కొత్త థీమ్స్‌ను కూడా తీసుకువచ్చింది.

రియల్‌మీ ఇటీవలే జీటీ నియో 3లో థోర్ లవ్ అండర్ థండర్ ఎడిషన్‌ను లాంచ్ చేసింది. ఈ నెలలో థోర్: లవ్ అండ్ థండర్ సినిమా విడుదలైన సందర్భంగా ఈ స్పెషల్ ఎడిషన్‌ను కంపెనీ మనదేశ మార్కెట్లోకి తీసుకువచ్చింది.

రియల్‌మీ జీటీ నియో 3 థోర్: లవ్ అండ్ థండర్ ఎడిషన్ స్పెసిఫికేషన్లు, ఫీచర్లు
ఈ స్మార్ట్ ఫోన్‌తో పాటు ప్రత్యేకమైన ప్రీమియం గిఫ్ట్ బాక్స్ లభించనుంది. ఈ బాక్స్‌లో రియల్‌మీ జీటీ నియో 3 150W స్మార్ట్ ఫోన్‌తో పాటు థోర్: లవ్ అండ్ థండర్ థీమ్డ్ కార్డ్స్, వాల్ పేపర్, స్టిక్కర్లు, మెడల్స్, సిమ్ కార్డు ట్రేలు ఉండనున్నాయి. 

ఈ స్మార్ట్ ఫోన్ 6.7 అంగుళాల ఫుల్ హెచ్‌డీ+ అమోఎల్ఈడీ డిస్‌ప్లేను అందించారు. దీని స్క్రీన్ రిఫ్రెష్ రేట్ 120 హెర్ట్జ్‌గా ఉంది. టచ్ శాంప్లింగ్ రేట్ ఏకంగా 1000 హెర్ట్జ్‌గా ఉండటం విశేషం. సెల్ఫీ కెమెరా కోసం పంచ్ హోల్‌ను అందించారు. ఆక్టాకోర్ మీడియాటెక్ డైమెన్సిటీ 8100 ప్రాసెసర్‌పై రియల్‌మీ జీటీ నియో 3 థోర్: లవ్ అండ్ థండర్ ఎడిషన్ పనిచేయనుంది. 12 జీబీ వరకు ర్యామ్, 256 జీబీ వరకు స్టోరేజ్ ఇందులో ఉండనున్నాయి.

ఇక కెమెరాల విషయానికి వస్తే... దీని వెనకవైపు మూడు కెమెరాలు ఉన్నాయి. వీటిలో ప్రధాన కెమెరా సామర్థ్యం 50 మెగాపిక్సెల్ కాగా, దీంతోపాటు 8 మెగాపిక్సెల్ అల్ట్రా వైడ్ యాంగిల్ లెన్స్, 2 మెగాపిక్సెల్ మాక్రో సెన్సార్ కూడా అందించారు. సెల్ఫీలు, వీడియో కాల్స్ కోసం ముందువైపు 16 మెగాపిక్సెల్ కెమెరా ఉంది. ఆండ్రాయిడ్ 12 ఆధారిత రియల్‌మీ యూఐ 3.0 స్కిన్‌పై ఈ స్మార్ట్ ఫోన్ పనిచేయనుంది.

5జీ, డ్యూయల్ 4జీ ఎల్టీఈ, వైఫై 6ఈ, బ్లూటూత్ వీ5.2, జీపీఎస్, ఎన్ఎఫ్‌సీ, యూఎస్‌బీ టైప్-సీ పోర్టు వంటి కనెక్టివిటీ ఫీచర్లు ఇందులో ఉన్నాయి. దీని బ్యాటరీ సామర్థ్యం 4500 ఎంఏహెచ్ కాగా, 150W ఫాస్ట్ చార్జింగ్‌ను ఈ ఫోన్ సపోర్ట్ చేయనుంది. ఇన్ డిస్‌ప్లే ఫింగర్ ప్రింట్ సెన్సార్ కూడా ఇందులో అందించారు. ఈ ఫోన్ మందం 0.82 సెంటీమీటర్లు కాగా, బరువు 188 గ్రాములుగా ఉంది.