Year Ender 2023: వన్డేలను ఏలింది మన బ్యాటర్లే, తొలి మూడు స్థానాలు మనవే

Year Ender 2023: పొట్టి క్రికెట్‌లో చాలామంది క్రికెటర్లు ఈ ఏడాది తమ మార్కు ఆటతీరుతో అబ్బురపరిచారు. అలా వన్డే క్రికెట్‌లో టీమిండియా బ్యాటర్లు పూర్తి ఆధిపత్యం ప్రదర్శించారు.

వన్డేలను ఏలింది మన బ్యాటర్లే ( Image Source : Twitter )

కొత్త సంవత్సరం రాబోతుంది. మరో క్రీడా సంవత్సరం కాల గర్భంలో కలిసిపోతోంది. ఈ ఏడాది క్రీడల్లో ఎన్నో అద్భుతాలు.. మరెన్నో మధుర విజయాలు. కొన్ని విజయాలు అంతర్జాతీయ క్రీడా వేదికపై భారత ఖ్యాతిని విశ్వవ్యాప్తం చేశాయి. కొన్ని పరాజయాలు అభిమానులను కంటతడి పెట్టించాయి. పొట్టి క్రికెట్‌లో చాలామంది క్రికెటర్లు ఈ ఏడాది తమ మార్కు ఆటతీరుతో అబ్బురపరిచారు. అలా వన్డే క్రికెట్‌లో టీమిండియా బ్యాటర్లు పూర్తి ఆధిపత్యం ప్రదర్శించారు. ఈ ఏడాది వన్డే క్రికెట్‌లో భారత స్టార్‌ ఓపెనర్‌ శుభ్‌మన్ గిల్ విధ్వంసం సృష్టించాడు. ఈ ఏడాది వన్డే క్రికెట్‌లో అద్భుతాలు సృష్టించిన పది మంది ఆటగాళ్లు ఎవరో ఓసారి మననం చేసుకుందాం. 

 

ఏడాది వన్డే క్రికెట్‌లో అద్భుతాలు సృష్టించిన తొలి పది మంది ఆటగాళ్ల జాబితాలో ముగ్గురు భారత క్రికెటర్లు ఉన్నారు. ఈ జాబితాలో తొలి మూడు స్థానాల్లో టీమిండియా దిగ్గజ ఆటగాళ్లే ఉన్నారు. తొలి స్థానంలో గిల్‌ ఉండగా.. రెండో స్థానంలో విరాట్‌ కోహ్లీ.. మూడో స్థానంలో రోహిత్ శర్మ ఉన్నాడు. స్టార్‌ ఓపెనర్‌ శుభమన్‌ గిల్ ఈ ఏడాది మొత్తం 29 వన్డే మ్యాచ్‌లు ఆడి 63.36 సగటుతో 1584 పరుగులు చేశాడు. ఇందులో 5 సెంచరీలు, 9 అర్ధ సెంచరీలు ఉన్నాయి. 2023లో గిల‌్ అత్యధిక స్కోరు 208 పరుగులు. ఈ ఏడాది గిల్ ఒక్కసారి మాత్రమే డకౌట్‌ అయ్యాడు. రెండో స్థానంలో ఉన్న విరాట్ కోహ్లీ ఈ ఏడాది 27 వన్డే మ్యాచ్‌లు ఆడాడు. ఇందులో 24 ఇన్నింగ్స్‌లలో బ్యాటింగ్ చేసి 72.47 సగటుతో 1377 పరుగులు చేశాడు. ఇందులో 6 సెంచరీలు, 8 అర్ధ సెంచరీలు ఉన్నాయి. 2023లో కోహ్లీ అత్యధిక స్కోరు 166 పరుగులు నాటౌట్. ఆ తర్వాత మూడో స్థానంలో ఉన్న భారత కెప్టెన్ రోహిత్ శర్మ 27 మ్యాచ్‌ల్లో 26 ఇన్నింగ్స్‌ల్లో 52.29 సగటుతో 1255 పరుగులు చేశాడు. ఇందులో 2 సెంచరీలు, 9 హాఫ్ సెంచరీలు వచ్చాయి. ఈ ముగ్గురు భారత బ్యాట్స్‌మెన్‌లలో రోహిత్ శర్మ  అత్యధికంగా 67 సిక్సర్లు కొట్టాడు. రోహిత్ శర్మ, విరాట్ కోహ్లీ, శుభ్‌మన్ గిల్‌ ఇక ఈ ఏడాది వన్డే మ్యాచ్‌లు ఆడడం లేదు. దక్షిణాఫ్రికాతో జరిగే సిరీస్‌కు కూడా ఈ ముగ్గురికి విశ్రాంతి ఇచ్చారు. 

 

2023లో అత్యధిక వన్డే పరుగులు చేసిన టాప్-10లో నాలుగో స్థానంలో న్యూజిలాండ్‌కు చెందిన డారిల్ మిచెల్... అయిదో స్థానంలో శ్రీలంకకు చెందిన పాతుమ్ నిస్సాంక ఉన్నారు.  పాకిస్థాన్ మాజీ కెప్టెన్ బాబర్ అజామ్ ఆరో స్థానంలో, పాకిస్థాన్ వికెట్ కీపర్ బ్యాట్స్‌మెన్ మహ్మద్ రిజ్వాన్ ఏడో స్థానంలో, ఇంగ్లండ్‌కు చెందిన డేవిడ్ మలన్ ఎనిమిదో స్థానంలో, దక్షిణాఫ్రికాకు చెందిన ఐడెన్ మాక్రమ్‌ తొమ్మిదో స్థానంలో, కేఎల్‌ రాహుల్‌ పదో స్థానంలో స్థానంలో ఉన్నారు. 

 

2023లో వన్డేల్లో టాప్‌ టెన్‌ రన్‌ స్కోర్లు

 

శుభ్‌మన్ గిల్- 1584 (29 మ్యాచ్‌లు)

విరాట్ కోహ్లీ- 1377 (27 మ్యాచ్‌లు)

రోహిత్ శర్మ- 1255 (27 మ్యాచ్‌లు)

డారిల్ మిచెల్- 1204 (26 మ్యాచ్‌లు)

పాతుమ్ నిస్సంక- 1151 (29 మ్యాచ్‌లు)

బాబర్ ఆజం- 1065 (25 మ్యాచ్‌లు)

మహ్మద్ రిజ్వాన్- 1023 (25 మ్యాచ్‌లు)

డేవిడ్ మలన్- 995 (18 మ్యాచ్‌లు)

ఐడెన్ మార్క్రామ్- 983 (21 మ్యాచ్‌లు)

కేఎల్ రాహుల్- 983 (24 మ్యాచ్‌లు).