Year Ender 2023: వన్డేలో విరాట్ విశ్వరూపం , ఈ ఏడాదంతా కోహ్లీ నామస్మరణే
Year Ender 2023 Virat Kohli: ఎన్నో రికార్డులను ఈ ఏడాది టీమిండియా స్టార్ బ్యాటర్ కింగ్‌ కోహ్లీ తన పేరిట లిఖించుకుని ఈ ఏడాదిని మరచిపోలేని జ్ఞాపకంగా చేసుకున్నాడు.
మరికొన్ని రోజుల్లో నూతన సంవత్సరం రాబోతోంది. 2023ఏడాది భారత క్రీడా ప్రతిష్ఠను మరింత పెంచింది. ఈ ఏడాది క్రీడల్లో ఎన్నో అద్భుతాలు.. మరెన్నో మధుర విజయాలు. కొన్ని విజయాలు అంతర్జాతీయ క్రీడా వేదికపై భారత ఖ్యాతిని విశ్వవ్యాప్తం చేశాయి. క్రికెట్‌లో కొన్ని రికార్డులు చిరస్మరణీయంగా మారాయి. అలాంటి ఎన్నో రికార్డులను ఈ ఏడాది టీమిండియా స్టార్ బ్యాటర్ కింగ్‌ కోహ్లీ తన పేరిట లిఖించుకుని ఈ ఏడాదిని మరచిపోలేని జ్ఞాపకంగా చేసుకున్నాడు. విరాట్ కోహ్లీకి 2023 సంవత్సరం చాలా ప్రత్యేకమైంది. విరాట్ కోహ్లీకి క్రికెట్‌లో ఈ ఏడాది అద్భుతంగా గడిచింది.
భారత్‌ వేదికగా ముగిసిన ప్రపంచకప్‌లో విరాట్ కోహ్లీ అరుదైన రికార్డులను తన పేరిట లిఖించుకున్నాడు. అద్భుత ఆటతీరుతో ఆ మెగా టోర్నీలో అత్యధిక పరుగులు చేసిన ఆటగాడిగా నవ చరిత్ర లిఖించాడు. సచిన్‌‌కు దరిదాపుల్లో నిలిచే బ్యాటర్ రావడం కష్టమని క్రీడా పండితులు తేల్చేశాక తానున్నానని దూసుకొచ్చిన విరాట్ కింగ్‌ కోహ్లీ... ఆ క్రికెట్ దేవుడి రికార్డును సగర్వంగా దాటేశాడు. ప్రపంచకప్‌ సెమీఫైనల్లో తీవ్ర ఒత్తిడిలో న్యూజిలాండ్‌తో జరిగిన మ్యాచ్‌లో కోహ్లీ అద్భుత శతకంతో సచిన్‌ రికార్డును అధిగమించేశాడు. సచిన్‌ సృష్టించిన రికార్డులను తన పరుగుల ప్రవాహంతో బద్దలు కొట్టిన కోహ్లీ వన్డేల్లో అత్యధిక సెంచరీలు చేసిన సచిన్‌ టెండూల్కర్‌ రికార్డును కూడా తిరగరాసి తన పేరిట లిఖించుకున్నాడు. ఇదే ప్రపంచకప్‌లో సచిన్‌ 49 వన్డే సెంచరీల రికార్డును సమం చేసిన కోహ్లీ... 50 సెంచరీలతో దానిని అధిగమించాడు. తాను ఎంతటి గొప్ప ఆటగాడినో మరోసారి క్రికెట్ ప్రపంచానికి చాటి చెప్పాడు. ఇప్పుడు కోహ్లీ ఖాతాలో అరుదైన ఘనత మరొకటి చేరింది. ఎన్నో రికార్డులను తన పేరిట లిఖించుకున్న ఈ రన్‌ మెషిన్‌ ఇప్పుడు మరో కలికితురాయిని తన కీర్తి కిరీటంలో ఇమడ్చుకున్నాడు.
ఈ ఏడాది భారత్‌ వేదికగా జరిగిన ప్రపంచకప్‌లో 11 మ్యాచ్‌లు ఆడిన విరాట్ కోహ్లీ 95.62 సగటుతో 765 పరుగులు చేశాడు. ఇప్పటి వరకు జరిగిన అన్ని ప్రపంచకప్‌లలో ఏ బ్యాట్స్‌మెన్ కూడా 700 మార్కును దాటలేదు. వన్డే క్రికెట్‌లో అత్యధిక పరుగులు చేసిన జాబితాలో ఈ ఏడాది వరకు విరాట్ కోహ్లీ టాప్-5లో ఉన్నాడు. ఈ ఏడాది విరాట్ వన్డేల్లో మొత్తం 1377 పరుగులు చేశాడు. వన్డేల్లో అత్యధిక పరుగులు చేసిన ఆటగాళ్ల జాబితాలో మూడో స్థానంలో నిలిచాడు. విరాట్ కోహ్లీ ఈ ఏడాది 27 వన్డే మ్యాచ్‌లు ఆడాడు. 72.47 సగటు.... 99 స్ట్రైక్ రేట్‌తో 1377 పరుగులు చేశాడు. ఇందులో 6 సెంచరీలు చేశాడు. ఈ ఏడాది తన కెరీర్‌లో అత్యధిక స్కోరు 166 పరుగులను సాధించాడు. టెస్టుల్లోనూ బాగా బ్యాటింగ్ చేసినా టీ20లో మాత్రం ఒక్క మ్యాచ్‌ కూడా ఆడలేదు. ఈ ఏడాది 7 టెస్టు మ్యాచ్‌లు ఆడిన అతను 55.70 బ్యాటింగ్ సగటుతో 557 పరుగులు చేశాడు. ఈ క్రమంలోనే అతను రెండు సెంచరీలు చేశాడు. టెస్టు క్రికెట్‌లో మొత్తం 8676 పరుగులు చేశాడు. విరాట్ కోహ్లీ ఈ ఏడాది ఒక్క టీ 20 మ్యాచ్‌ కూడా ఆడలేదు. క్రికెట్‌లో ఆరంగేట్రం చేసినప్పటి నుంచి విరాట్ కోహ్లీ ఒక్క టీ 20 మ్యాచ్‌ కూడా ఆడకుండా ముగిసిన తొలి ఏడాది ఇదే.
టాప్ హెడ్ లైన్స్
ట్రెండింగ్ వార్తలు
