Asia Cup 2026 Trophy Row Erupts: ఛాంపియన్‌గా నిలిచినా వేదికపైకి రాని భారత్.. నఖ్వీ చేతుల మీదుగా ట్రోఫీ నిరాకరణ, ఆసియా కప్‌లో మరోసారి వివాదం
శ్రీలంకను 72 పరుగులతో చిత్తు చేసి 8వ ఆసియా కప్ గెలిచిన భారత్, ఏసీసీ చీఫ్ మొహ్సిన్ నఖ్వీ చేతుల మీదుగా ట్రోఫీని తీసుకునేందుకు నిరాకరించింది.
Indian Women Clinch Historic Eighth Title Amid High Drama: దుబాయ్ ఇంటర్నేషనల్ స్టేడియం వేదికగా వరుసగా రెండో ఏడాది ఆసియా కప్ ఫైనల్ ట్రోఫీ వివాదం చెలరేగింది. గతంలో భారత పురుషుల జట్టు విషయంలో జరిగిన హైడ్రామా ఈసారి మహిళల ఫైనల్ అనంతరం రిపీట్ అయింది. హర్మన్‌ప్రీత్ కౌర్ సారథ్యంలోని భారత మహిళల జట్టు శ్రీలంకను 72 పరుగుల భారీ తేడాతో మట్టికరిపించి రికార్డు స్థాయిలో ఎనిమిదోసారి ఆసియా కప్ టైటిల్‌ను ద‌క్కించుకుంది. అయితే మ్యాచ్ ముగిసిన తర్వాత పాకిస్తాన్ అంతర్గత వ్యవహారాల మంత్రి, ఏషియన్ క్రికెట్ కౌన్సిల్ (ఏసీసీ) చీఫ్ మొహ్సిన్ నఖ్వీ చేతుల మీదుగా ట్రోఫీని స్వీకరించేందుకు భారత జట్టు నిరాకరించడంతో సరికొత్త వివాదం చెలరేగింది. రాత్రి 11:20 గంటలకు మ్యాచ్ పూర్తి కాగా, అర్ధరాత్రి 12:05 గంటల వరకు ప్రజెంటేషన్ వేడుక స్టార్ట్ కాలేదు.
త్వ‌ర‌గా ముగిసిన వేడుక‌లు..
శ్రీలంక మాజీ ఆటగాడు ఫర్వీజ్ మహరూఫ్ ప్రజెంటేషన్ వేడుకను ప్రారంభించి రన్నరప్ శ్రీలంకను వేదికపైకి ఆహ్వానించాడు. ఆ జట్టు నఖ్వీ చేతుల మీదుగా రన్నరప్ చెక్కును, శ్రీలంక క్రికెట్ తాత్కాలిక చీఫ్ ఎరాన్ విక్రమరత్నే చేతుల మీదుగా పతకాలను అందుకుంది. ఆ తర్వాత ఛాంపియన్ ఇండియాను వేదికపైకి ఆహ్వానిస్తారని అందరూ భావించిన తరుణంలో మహరూఫ్ అకస్మాత్తుగా వేడుక ముగిసినట్లు అనౌన్స్ చేశాడు. మరోవైపు భారత క్రీడాకారిణులు మైదానంలో జట్టుగా చేరగా, బీసీసీఐ ఉపాధ్యక్షుడు రాజీవ్ శుక్లా, కార్యదర్శి దేవజిత్ సైకియాలు ఉత్తమ ఫీల్డర్ నందిని శర్మకు పతకం అందజేసి జట్టును అభినందించారు. అనంతరం భారత జట్టు డ్రెస్సింగ్ రూమ్‌కు వెళ్లిపోయింది. లంక కెప్టెన్ చమరి ఆట‌ప‌ట్టుకు అవార్డు ఇచ్చిన వెంటనే నఖ్వీ మైదానం నుంచి నిష్క్ర‌మించాడు. మొహ్సిన్ నఖ్వీ చేతుల మీదుగా ట్రోఫీని అందుకోకపోవడం బీసీసీఐ తీసుకున్న అధికారిక నిర్ణయమని టీమ్ ఇండియా హెడ్ కోచ్ అమోల్ ముజుందార్ తెలిపాడు.
సేమ్ సీన్ రిపీట్.. పురుషుల జట్టు మాదిరిగానే..
2025 సెప్టెంబర్ 28న ఇదే మైదానంలో పాకిస్తాన్‌ను ఓడించి పురుషుల జట్టు ఆసియా కప్ గెలిచినప్పుడు కూడా నఖ్వీ వేదికపై ఉండటంతో గంద‌ర‌గోళం చెలరేగింది. ఆ సమయంలో నఖ్వీ ట్రోఫీని తీసుకెళ్లిపోవాలని ఆదేశించడంతో సూర్యకుమార్ యాదవ్ బృందం ట్రోఫీ లేకుండానే సంబరాలు చేసుకుంది. ఇప్పటికీ ఆ ట్రోఫీని ఏసీసీ కార్యాలయంలోనే ఉంచారు. ఇప్పుడు మహిళల జట్టు విషయంలోనూ అదే తరహా పరిస్థితి పునరావృతమైంది.
ప్ర‌తీకారం తీర్చుకున్న భారత్..
అంతకుముందు బ్యాటింగ్‌లో భారత ఓపెనర్లు షఫాలీ వర్మ 68, స్మృతి మంధాన 59 పరుగులతో విరుచుకుపడి 12.5 ఓవర్లలోనే 129 పరుగుల భాగస్వామ్యం నెలకొల్పారు. మహిళల ఆసియా కప్ చరిత్రలోనే షఫాలీ 24 బంతుల్లో వేగవంతమైన హాఫ్ సెంచరీ రికార్డు నమోదు చేసింది. భారత్ 20 ఓవర్లలో 183/5 పరుగులు సాధించింది. ఛేదనలో లంక కెప్టెన్ చమరి ఆట‌ప‌ట్టు 36 రన్స్ చేసినా, దీప్తి శర్మ ఒకే ఓవర్లో రెండు వికెట్లు తీసి కోలుకోలేని దెబ్బతీసింది. లెఫ్టార్మ్ స్పిన్నర్ శ్రీ చరణి 20 పరుగులిచ్చి 4 వికెట్లు తీయడంతో శ్రీలంక 111 పరుగులకే పరిమితమై భారీ తేడాతో ఓటమిపాలైంది. దీంతో గ‌త ఎడిష‌న్ ఫైన‌ల్లో లంక చేతిలో ఎదురైన ఓట‌మికి టీమిండియా ఘ‌నంగా బ‌దులు తీర్చుకున్న‌ట్లు అయింది.
టాప్ హెడ్ లైన్స్
ట్రెండింగ్ వార్తలు
