7 Days Without Coffee : కాఫీ మానేస్తే మొదట్లో కలిగే ఇబ్బందులు.. తర్వాత జరిగే బెనిఫిట్లు ఇవే, 7 రోజులు మానేసి చూడండి

Thinking of Quitting Coffee : కాఫీ తాగడం మానేసే ఆలోచనలో ఉన్నారా? అయితే మొదట్లో ఎదురయ్యే ఇబ్బందులు, తర్వాత వచ్చే ఆరోగ్య ప్రయోజనాలు ఏంటో చూసేద్దాం.

7 రోజులు కాఫీ మానేస్తే శరీరంలో జరిగే మార్పులు ఇవే

రోజూ కాఫీ తాగే అలవాటు ఉన్నవారు ఒక్కసారిగా కాఫీ ఆపేస్తే మొదటి కొన్ని రోజుల్లో తలనొప్పి, అలసట, చిరాకు, ఏకాగ్రత తగ్గడం వంటి లక్షణాలు కనిపించవచ్చు. దీనికి ప్రధాన కారణం కెఫీన్‌కు శరీరం అలవాటు పడటమే. రోజులో ఎక్కువ కాఫీ తాగే వారిలో ఈ లక్షణాలు కొంత ఎక్కువగా ఉండవచ్చు. సాధారణంగా ఇవి తాత్కాలికమే.

కెఫీన్ మెదడులో నిద్రను ప్రోత్సహించే అడెనోసిన్ అనే కెమికల్ ప్రభావాన్ని అడ్డుకుంటుంది. అందుకే ముఖ్యంగా సాయంత్రం లేదా రాత్రి కాఫీ తాగే అలవాటు ఉన్నవారిలో నిద్రపై ప్రభావం పడవచ్చు. నిద్ర త్వరగా పట్టడం, రాత్రి మధ్యలో మేల్కొనే సమస్య తగ్గడం, ఉదయం తాజాగా అనిపించడం వంటి మార్పులు కనిపించవచ్చు.

కాఫీ తాగిన వెంటనే చురుగ్గా, ఉత్సాహంగా అనిపించడం సాధారణమే. అయితే కెఫీన్ ప్రభావం తగ్గిన తర్వాత కొంతమందికి అలసటగా అనిపించవచ్చు. కాఫీని పూర్తిగా మానేసిన మొదటి రోజుల్లో ఈ తేడా స్పష్టంగా కనిపించొచ్చు.

కెఫీన్ కొంతమందిలో గుండె వేగంగా కొట్టుకోవడం, చేతులు వణకడం, ఆందోళన లేదా నెర్వస్‌గా అనిపించడం వంటి లక్షణాలను పెంచవచ్చు. ముఖ్యంగా కెఫీన్‌కు సున్నితంగా స్పందించే వ్యక్తులు కాఫీ మానేసిన తర్వాత ఇలాంటి లక్షణాల్లో మార్పును గమనించవచ్చు.

కాఫీ కొంతమందిలో యాసిడ్ రిఫ్లక్స్ లేదా గుండెల్లో మంట లక్షణాలను ప్రేరేపించవచ్చు. అలాంటి వారు కాఫీని మానేసినప్పుడు జీర్ణవ్యవస్థకు సంబంధించిన అసౌకర్యం తగ్గినట్లు అనిపించవచ్చు. అయితే కాఫీ మానేయడం వల్ల అందరిలోనూ ఎసిడిటీ పూర్తిగా తగ్గిపోతుందని చెప్పలేం. ఆహారపు అలవాట్లు, బరువు, రిఫ్లక్స్ వంటి ఇతర కారణాలు కూడా ప్రభావం చూపుతాయి.

కాఫీలో చక్కెర, ఫుల్‌ఫ్యాట్ పాలు, క్రీమ్ లేదా ఫ్లేవర్డ్ సిరప్స్ ఎక్కువగా కలుపుకునే అలవాటు ఉంటే.. కాఫీని మానేయడం వల్ల అదనపు చక్కెర, కేలరీల తీసుకోవడం తగ్గుతుంది. అయితే బ్లాక్ కాఫీ లేదా చక్కెర లేకుండా కాఫీ తాగే వ్యక్తిలో ఈ ప్రయోజనం పెద్దగా ఉండకపోవచ్చు.

కాఫీని రోజూ తాగే వ్యక్తికి 7 రోజులు పూర్తిగా మానేయడం చిన్న విషయం కాదు. మొదటి కొన్ని రోజులు ఇబ్బందిగా ఉన్నా.. వారం పూర్తయ్యే సరికి వాటిలో చాలావరకు తగ్గే అవకాశం ఉంటుంది. అయితే 7 రోజుల్లోనే శరీరం పూర్తిగా డిటాక్స్ అయిపోతుంది లేదా అన్ని ఆరోగ్య సమస్యలు పరిష్కారమవుతాయి అనుకోకూడదు.