Iran vs Israel: టెహ్రాన్పై దాడికి నేనే ఆదేశించా.. ఇరాన్ అణుశక్తిగా మారకుండా అడ్డుకుంటాం: ట్రంప్
Donald Trump | ఇరాన్ అణుశక్తిగా మారకుండా నిరోధించడానికి తాము దాడులు మొదలుపెట్టామని, ఇదే బెస్ట్ ఆప్షన్ అని అమెరికా అధ్యక్షుడు డొనాల్డ్ ట్రంప్ పేర్కొన్నారు. మరికొన్ని రోజులు దాడులు తప్పవన్నారు.
Iran US-Israel War: ఇరాన్ సుప్రీం లీడర్షిప్ను అంతం చేశామంటూ అమెరికా అధ్యక్షుడు డోనాల్డ్ ట్రంప్ సోమవారం ఒక ప్రకటన విడుదల చేశారు. ఇరాన్ అణు అభివృద్ధి, బాలిస్టిక్ మిసైల్ ప్రోగ్రామ్ను అడ్డుకోవడానికే తాను ఇరాన్పై దాడికి ఆదేశాలిచ్చానని స్పష్టం చేశారు. ఇరాన్ను అణుశక్తి దేశంగా ఎప్పటికీ మారనివ్వబోమని, ఆ దేశం వేగంగా ఆ దిశగా అడుగులు వేస్తోందని ట్రంప్ అన్నారు. అమెరికా, ఇజ్రాయెల్ సైన్యం ఇరాన్ ఆటలు కట్టిస్తుందని, వారిని పూర్తి స్థాయిలో అడ్డుకునే వరకు దాడులు కొనసాగుతాయని తెలిపారు.
ఈ క్రమంలో అమెరికా అధినేత ట్రంప్ రెండు వీడియోలను విడుదల చేశారు. వీటిలో ఇరాన్ అణుశక్తి దిశగా వేస్తున్న అడుగులు, తీసుకుంటున్న చర్యల గురించి ఆయన మాట్లాడారు. వార్తా సంస్థ రాయిటర్స్ ప్రకారం, ఇరాన్ నుండి ముప్పు పొంచి ఉందని, అందుకే వారిని అడ్డుకునేందుకు దాడులు చేయాల్సి వచ్చిందని ట్రంప్ తెలిపారు. అయితే, దీనికి సంబంధించి ఆయన ఎటువంటి ఆధారాలను ఆయన వెల్లడించలేదు.
దాడి చేయడమే మాకున్న బెస్ట్ ఆప్షన్ - ట్రంప్
ఇరాన్పై దాడి చేయడం మాకున్న చివరి, అత్యుత్తమ అవకాశం అని ట్రంప్ తన ప్రకటనలో పేర్కొన్నారు. ‘ఇరాన్ లోని ప్రమాదకరమైన ప్రభుత్వం నుంచి ఎదురయ్యే ముప్పులను అంతం చేయడమే మా లక్ష్యం. అమెరికా చేపట్టిన ఈ దాడి 4 నుంచి 5 వారాల వరకు కొనసాగుతుందని అంచనా వేశాము. ఇంకా ఎక్కువ కాలం కూడా దాడులు కొనసాగవచ్చు. ఇరాన్ అణ్వాయుధాలను తయారు చేయకుండా అడ్డుకోవడమే ఈ యుద్ధం టార్గెట్. అయితే ఇరాన్ దీనిని పలుమార్లు తోసిపుచ్చింది. అలాగే సుదూర లక్ష్యాలను ఛేదించే బాలిస్టిక్ మిసైల్ ప్రోగ్రామ్ను విఫలం చేయడం మా లక్ష్యం. లాంగ్ రేంజ్ మిస్సైల్స్, అణ్వాయుధాలతో కూడిన ఇరాన్ ప్రభుత్వం మిడిల్ ఈస్ట్కు, అమెరికా ప్రజలకు పెద్ద ముప్పుగా మారుతుందని’ ట్రంప్ వ్యాఖ్యానించారు.
— Donald J. Trump (@realDonaldTrump) March 2, 2026
10 ఇరాన్ నౌకలను కూల్చివేశాం - ట్రంప్
అమెరికా సైన్యం 10 ఇరాన్ నౌకలను కూల్చివేసిందని, అవి సముద్రంలో మునిగిపోయాయని అధ్యక్షుడు ట్రంప్ తన ప్రకటనలో తెలిపారు. భయంకరమైన, ఉగ్రవాద పాలన నుండి అమెరికాకు ఎదురయ్యే ముప్పును తగ్గించడానికి తమ సైన్యం ఇరాన్లో భారీ స్థాయిలో పోరాటం చేస్తోందన్నారు. ఇరాన్ క్షిపణి సామర్థ్యాలను ధ్వంసం చేయడం, వారి నౌకాదళాన్ని అంతం చేయడంతో పాటు అణ్వాయుధాలను కలిగి ఉండకుండా అడ్డుకోవడమే అమెరికా ముఖ్య ఉద్దేశ్యమని, ఇందులో ఎలాంటి మార్పు లేదన్నారు.
ఇవే కాకుండా, ఇరాన్ మిలిటెంట్ గ్రూపులకు మద్దతు ఇవ్వకుండా అడ్డుకోవడం సైతం తమ లక్ష్యాల్లో ఒకటిగా ట్రంప్ పేర్కొన్నారు. ఈ పోరాటంలో నలుగురు సైనికులు ప్రాణాలు కోల్పోయారని ట్రంప్ ప్రస్తావించారు.
టాప్ హెడ్ లైన్స్
ట్రెండింగ్ వార్తలు
