Ukraine Russia War: పుతిన్‌ను ఆపండి ప్లీజ్- ప్రపంచం ప్రమాదంలో ఉంది: ఉక్రెయిన్

Ukraine Russia War: ఉక్రెయిన్‌పై రష్యా తలపెట్టిన యుద్ధాన్ని ఆపాలని ప్రపంచాన్ని ఆ దేశం కోరింది. ఐరాస తగిన చర్యలు చేపట్టాలని అత్యవసర సమావేశంలో ఉక్రెయిన్ వేడుకుంది.

పుతిన్‌ను ఆపాలని ఉక్రెయిన్ పిలుపు

Ukraine Russia War: ఉక్రెయిన్‌పై రష్యా యుద్ధం చేయడంపై ప్రపంచ దేశాలు ఆందోళన వ్యక్తం చేస్తున్నాయి. శాంతియుత వాతావరణాన్ని కోరుకుంటుంటే రష్యా దూకుడుగా యుద్ధం ఆరంభించిందని ఆవేదన వ్యక్తం చేస్తున్నాయి. రష్యా చర్యలపై ఉక్రెయిన్ దీటుగా స్పందించింది. ఉక్రెయిన్‌పై పుతిన్ పూర్తిస్థాయి యుద్ధాన్ని ఆరంభించారని పేర్కొంది.

" ఉక్రెయిన్‌లో పుతిన్ పూర్తిస్థాయి యుద్ధాన్ని ఆరంభించారు. కానీ ఉక్రెయిన్ బదులిస్తుంది. విజయం సాధిస్తాం. శాంతియుత ఉక్రెయిన్ నగరాల్లో బాంబుల మోత మోగుతోంది. ప్రపంచం.. పుతిన్‌ను ఆపాలి. ప్రపంచ దేశాలు స్పందించాల్సిన సమయం ఇదే. 

ప్రపంచ దేశాలు వెంటనే స్పందించాలి. రష్యాపై తగిన చర్యలు చేపట్టాలి. ఉక్రెయిన్‌కు ఆయుధాలు, సామగ్రిని పంపాలి. ఆర్థిక, మానవతా సాయం చేయాలి. ఐరోపా, ప్రపంచ భవిష్యత్తు ప్రమాదంలో ఉంది. "

-  ఉక్రెయిన్ విదేశాంగ మంత్రి