Modi Launches IRIS: 'ఐరిస్'ను ప్రారంభించిన ప్రధాని మోదీ.. ఆ దేశాలకు అండగా భారత్

చిన్న ద్వీపాల్లో మౌలికవసతులు పెంపొందించేందుకు రూపొందించిన 'ఐరిస్'ను ప్రధాని నరేంద్ర మోదీ ప్రారంభించారు.

గ్లాస్గోలో జరిగిన వాతావరణ సదస్సులో భాగంగా ఐరిస్ (ఇన్ఫ్రాస్ట్రక్చర్​ ఫర్​ రిసీలియంట్​ ఐలాండ్​ స్టేట్స్​)​ను ఆవిష్కరించారు ప్రధాని నరేంద్ర మోదీ. చిన్న ద్వీపాల్లో మౌలికవసతులు పెంపొందించేందుకు దీనిని రూపొందిచినట్లు ప్రధాని మోదీ వెల్లడించారు. ఈ ద్వీపాల్లోని ప్రజల్లో ఐరిస్​ కొత్త ఆశలు రేపుతుందని మోదీ ఆశాభావం వ్యక్తం చేశారు.

గత కొన్నేళ్లుగా వాతావరణ మార్పు ప్రభావం ఎవరినీ విడిచిపెట్టడం లేదు. అభివృద్ధి చెందుతోన్న ద్వీపాలపై ఈ ప్రభావం మరింతంగా ఉంది. అలాంటి ద్వీపాలకు ఈ ఐరిస్ నూతన ఆశలు, నమ్మకాన్ని కలిగిస్తుంది. వాతావరణ మార్పులతో గత దశాబ్ద కాలంగా ప్రతి ఒక్కరు ప్రభావితమవుతున్నారు. అభివృద్ధి చెందిన దేశాలు, సహజసిద్ధ వనరులున్న దేశాలూ ముప్పు బారినపడ్డాయి. మానవజాతి మనుగడకు అందరం కలిసి పనిచేయాల్సిన అవసరం ఉంది. చిన్న ద్వీపాలపై వాతావరణ మార్పు ప్రభావం దారుణంగా ఉంది. వీరికి భారత అంతరిక్ష పరిశోధన సంస్థ ఇస్రో అండగా నిలుస్తుంది. ప్రకృతి విపత్తులకు సంబంధించిన డేటాను ఆయా ద్వీపాలతో ఇస్రో పంచుకుంటుంది. భారత్ అన్ని రకాల ఈ ద్వీపాలను ఆదుకుంటుంది.                                                 - ప్రధాని నరేంద్ర మోదీ

ఈ సమావేశంలో ఐరాస ప్రధాన కార్యదర్శి ఆంటోనియో గుటెరస్​, బ్రిటన్​ ప్రధాని బోరిస్​ జాన్సన్, ఆస్ట్రేలియా ప్రధాని స్కాట్​ మారిసన్​​ సహా పలువురు నేతలు పాల్గొన్నారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి