Real Jab We Met: ఎవర్ని ప్రేమించినా పెళ్లి మాత్రం లవర్స్ చేతుల్లో ఉండదు - దానికి ఈ ప్రేమికురాలి కథే సాక్ష్యం - ఇంట్రెస్టింగ్ !
Indore woman missing case: ప్రేమించిన వాడ్ని కలవడానికి వెళ్లిన ఓ మహిళ మిస్ అయింది. పోలీసులు అతి కష్టం మీద ఆచూకీ తెలుసుకున్నారు.కానీ జరిగిన విషయం తెలుసుకుని సినిమా చూసిన ఫీలింగ్ కు వచ్చారు.
Planned to meet her lover ended up marrying another: జర్నీలో ప్రయాణమయ్యే వారితో ప్రేమలో పడటం సినిమాల్లో సహజంగానే జరుగుతుంది. కానీ నిజ జీవితంలో జరిగితే మాత్రం చాలా విచిత్రాలు లైన్ లో వెనకే వస్తాయి. అలాంటిదే ఇప్పుడు ఇండోర్ కు చెందిన ఓ మహిళ విషయంలో చోటు చేసుకుంది.
మధ్యప్రదేశ్లోని ఇండోర్కు చెందిన 24 ఏళ్ల మహిళ తన ప్రేమికుడిని కలవడానికి ఇంటి నుంచి వెళ్లింది. కానీ బాలీవుడ్ సినిమా ‘జబ్ వీ మెట్’ను తలపించేలా ఊహించని మలుపులు ఆ ప్రయాణంలో చోటు చేసుకున్నాయి. ఆమె తన ప్రేమికుడిని కలవకుండా, రైలు ప్రయాణంలో ఒక అపరిచిత వ్యక్తిని పెళ్లి చేసుకుని, కొత్త జీవితాన్ని ప్రారంభించింది.
ప్రేమికుడ్ని కలవడానికి రైల్లో వెళ్లింది !
ఇండోర్లోని ఖజ్రానా ప్రాంతానికి చెందిన ఈ మహిళ, ఆగస్టు 24, 2025న తన ప్రేమికుడిని కలవడానికి ఇంటి నుంచి బయల్దేరింది. ఆమె తిరిగి రాకపోవడంతో, ఆమె కుటుంబ సభ్యులు ఆందోళన చెంది, ఖజ్రానా పోలీస్ స్టేషన్లో మిస్సింగ్ కేసు నమోదు చేశారు. పోలీసులు ఆమె ఆచూకీ కోసం గాలింపు చేపట్టారు. సీసీటీవీ ఫుటేజ్, మొబైల్ ఫోన్ లొకేషన్ ట్రాకింగ్ ద్వారా ఆమె ఆగ్రాకు వెళ్లినట్లు తెలిసింది. ఆగ్రా రైల్వే స్టేషన్లో ఆమె ఆచూకీ కనిపించినప్పటికీ, ఆమె ఒక యువకుడితో కలిసి ఉన్నట్లు సమాచారం అందింది. ఆగ్రా పోలీసుల సహకారంతో ఇండోర్ పోలీసులు ఆమెను గుర్తించగలిగారు.
రైల్లో పరిచయమైనవాడితో ప్రేమలో పడింది.. వెంటనే పెళ్లి
ఆమె తన ప్రేమికుడితో కాకుండా, రైలు ప్రయాణంలో పరిచయమైన మరో వ్యక్తితో ఆగ్రాలో నివసిస్తున్నట్లు తేలింది. ఆశ్చర్యకరంగా, ఆమె ఆ యువకుడిని పెళ్లి చేసుకుని, అతనితో కలిసి కొత్త జీవితాన్ని ప్రారంభించినట్లు పోలీసులు తెలిపారు. ఇండోర్ పోలీసులు ఆమెను సంప్రదించినప్పుడు, ఆమె తన స్వంత ఇష్టంతో ఆగ్రాలో ఉంటున్నట్లు, తన కొత్త భర్తతో సంతోషంగా జీవిస్తున్నట్లు చెప్పింది. ఆమె తన ప్రేమికుడిని కలవడానికి వెళ్లినప్పటికీ, రైలు ప్రయాణంలో ఈ యువకుడితో పరిచయం ఏర్పడి, వారిద్దరూ ప్రేమలో పడి, వెంటనే వివాహం చేసుకున్నామని తెలిపింది. ఆమె తన కుటుంబం వద్దకు తిరిగి వెళ్లే ఉద్దేశం లేదని, తన నిర్ణయంతో సంతోషంగా ఉన్నట్లు స్పష్టం చేసింది.
ప్రియుడ్ని, తల్లిదండ్రుల్ని మర్చిపోయిన లవర్
మహిళ సురక్షితంగా ఉందని, ఆమె స్వంత ఇష్టంతో వివాహం చేసుకున్నట్లు తెలిసింది. ఆమె నిర్ణయాన్ని గౌరవిస్తూ, కేసును మూసివేస్తున్నామని పోలీసులు ప్రకటించారు. 2007లో విడుదలైన బాలీవుడ్ చిత్రం ‘జబ్ వీ మెట్’లోని కథ లాగే ఈ లవ్ స్టోరీ సాగింది. ఆ సినిమాలో కరీనా కపూర్ పాత్ర, తన ప్రేమికుడిని కలవడానికి బయల్దేరి, రైలు ప్రయాణంలో షాహిద్ కపూర్ను కలిసి, చివరకు అతనితో ప్రేమలో పడి వివాహం చేసుకుంటుంది. ఈ నిజ జీవిత ఘటనను స్థానికులు “రియల్ లైఫ్ జబ్ వీ మెట్”గా అభివర్ణిస్తున్నారు.
టాప్ హెడ్ లైన్స్
ట్రెండింగ్ వార్తలు
