Gujarat AAP CM Candidate: గుజరాత్‌లో ఆమ్‌ఆద్మీ సీఎం అభ్యర్థిగా గద్వీ- ఎవరో తెలుసా?

Gujarat AAP CM Candidate: గుజరాత్ ఎన్నికల్లో ఆప్ అభ్యర్థిగా ఇసుదాన్ గద్వీ పేరును దిల్లీ సీఎం కేజ్రీవాల్ ప్రకటించారు.

గుజరాత్‌లో ఆమ్‌ఆద్మీ సీఎం అభ్యర్థిగా గద్వీ- ఎవరో తెలుసా?

Gujarat AAP CM Candidate: గుజరాత్ ఎన్నికల్లో తమ పార్టీ ముఖ్యమంత్రి అభ్యర్థిని ఆమ్‌ఆద్మీ ప్రకటించింది. పార్టీ జాతీయ సంయుక్త ప్రధాన కార్యదర్శి ఇసుదాన్ గద్వీని తమ సీఎం అభ్యర్థిగా ఎంపిక చేస్తూ నిర్ణయం తీసుకుంది.

ఇలా ఎంపిక

సీఎం అభ్యర్థి ఎంపిక కోసం ఆన్​లైన్ పోల్ నిర్వహించింది ఆమ్‌ఆద్మీ. ఆన్​లైన్ పోల్ ఫలితాలను దిల్లీ సీఎం అరవింద్ కేజ్రీవాల్ ప్రకటించారు. మొత్తం 16 లక్షల మంది ఈ ఓటింగ్​లో పాల్గొన్నారని కేజ్రీవాల్ తెలిపారు. అందులో 73 శాతం మంది గద్వీని ఎన్నుకున్నట్లు పేర్కొన్నారు. దీంతో అహ్మదాబాద్‌లో జరిగిన మీడియా సమావేశంలో ఆప్ అధినేత అరవింద్ కేజ్రీవాల్.. గద్వీని సీఎం అభ్యర్థిగా ప్రకటించారు. 

గద్వీ ఎవరు?

ప్రస్తుతం AAP నేషనల్ జాయింట్ జనరల్ సెక్రటరీగా ఉన్న ఇసుదాన్ గద్వీ.. రాజకీయాల్లోకి రాకముందు జర్నలిస్టుగా పని చేశారు. ఓబీసీ వర్గానికి చెందిన గద్వీ జామ్ ఖంభాలియాలో తన ప్రాథమిక విద్యను పూర్తి చేశారు. కామర్స్‌లో పట్టభద్రుడయ్యాక, 2005లో గుజరాత్ విద్యాపీఠ్‌లో జర్నలిజం చదివారు.

ఆ తర్వాత దూరదర్శన్‌లో చేరి అక్కడ ఓ షో చేశారు. తర్వాత పోర్‌బందర్‌లోని 'ఈటీవీ గుజరాతీ' ఛానెల్‌లో రిపోర్టర్‌గా పనిచేశారు. 2015లో ఈశుదాన్ అహ్మదాబాద్‌లోని ఓ ప్రముఖ గుజరాతీ ఛానెల్​కు ఎడిటర్ అయ్యారు. 'మహామంథన్' పేరుతో ఓ షోను ప్రారంభించిన గద్వీ​.. అందులో యాంకర్​గా వ్యవహరించారు. ఈ షోతో ఆయనకు రాష్ట్రంలో మంచి పేరు వచ్చింది.