Railway Rules : రైలులో టికెట్ తనిఖీ చేసే అధికారం ఎవరికి ఉంటుంది? రైల్వే పోలీసులు అడిగితే ఏంచేయాలి? తప్పక తెలుసుకోండి!
Railway Rules : రైల్వే నిబంధనల్లో చాలా మార్పులు తీసుకొచ్చారు. టికెట్ తనిఖీ చేసే అధికారం టిటిఇకి మాత్రమే ఉంది. అయితే అనుమానం ఉన్నప్పుడు పోలీసులకు కూడా టికెట్ అడగొచ్చు.
Railway Rules : భారతీయ రైల్వేలో ప్రతిరోజూ కోట్లాది మంది రైళ్లలో ప్రయాణిస్తారు. రైళ్లలో ప్రయాణించడానికి భారతీయ రైల్వే ప్రయాణికుల కోసం అనేక నియమాలను రూపొందించింది. అవన్నీ పాటించాలి. ఇందులో అతి ముఖ్యమైన నియమం టికెట్ గురించే. టికెట్ లేకుండా రైలులో ప్రయాణించడం నిబంధనల ఉల్లంఘన. అలా చేస్తే జరిమానా చెల్లించాల్సి వస్తుంది. ప్రయాణికుడు టికెట్తో ప్రయాణిస్తున్నాడా లేదా అని తనిఖీ చేయడానికి రైళ్లలో TTEలు ఉంటారు.
అయితే, రైల్వే పోలీసు అధికారి టికెట్ చూపించమని అడిగితే తరచుగా గందరగోళం ఏర్పడుతుంది. యూనిఫాంలో కనిపించే ప్రతి అధికారి టికెట్ తనిఖీ చేయగలరని ప్రజల్లో ఒక సాధారణ అభిప్రాయం ఉంది. నిజంగా అలా సాధ్యమేనా? రైల్వే నియమాలు ఏమి చెబుతున్నాయో తెలుసుకుందాం.
టికెట్ తనిఖీ చేసే అధికారం ఎవరికి ఉంటుంది?
రైల్వే నిబంధనల ప్రకారం, రైలు, స్టేషన్లో టికెట్ తనిఖీ చేసే అధికారం టికెట్ చెకింగ్ సిబ్బందికి మాత్రమే ఇవ్వబడింది. ఇందులో ట్రావెలింగ్ టికెట్ ఎగ్జామినర్ (TTE), టికెట్ చెకింగ్ స్టాఫ్ (TC) ఉంటారు. ఈ అధికారులు ప్రయాణికుల టికెట్లను తనిఖీ చేస్తారు. టికెట్ లేకుండా లేదా తప్పుడు టికెట్తో ప్రయాణించే వారి నుంచి జరిమానా వసూలు చేయవచ్చు.
జరిమానా వసూలు చేసిన తర్వాత రసీదు ఇవ్వడం కూడా తప్పనిసరి. వీరి వద్ద గుర్తింపు కార్డు, అధికారిక రిజిస్టర్ లేదా డిజిటల్ పరికరం ఉంటుంది. దాని ద్వారా వారిని గుర్తించవచ్చు. ఎవరైనా అధికారి తమను TTE లేదా TC అని చెప్పుకుంటే, ప్రయాణికుడికి వారి గుర్తింపు కార్డును చూపించమని అడిగే హక్కు ఉంది. టికెట్కు సంబంధించిన అన్ని చర్యలు ఈ అధికారుల పరిధిలోకి వస్తాయి.
రైల్వే పోలీసులు టికెట్ అడగవచ్చా?
ప్రయాణికుల భద్రత, రైళ్ల భద్రత కోసం రైల్వే పోలీసులు ఉంటారు. రైల్వే పోలీసుల్లో RPF, GRP ఉంటారు. వీరి సిబ్బంది, అధికారుల ప్రధాన పని భద్రతా ఏర్పాట్లను నిర్వహించడం. స్టేషన్, రైళ్లలో దొంగతనాలు, దాడులు, అక్రమ కార్యకలాపాలను నిరోధించడం, మహిళల భద్రత, అత్యవసర పరిస్థితుల్లో సహాయం చేయడం వీరి బాధ్యత. సాధారణ పరిస్థితుల్లో రైల్వే పోలీసులకు టికెట్ తనిఖీ చేసే లేదా జరిమానా వసూలు చేసే అధికారం లేదు.
అయితే, ఏదైనా నేరానికి సంబంధించి ప్రయాణికుడిపై అనుమానం ఉంటే లేదా భద్రతాపరమైన సమస్య ఉంటే, గుర్తింపు కోసం టికెట్ చూపించమని అడగవచ్చు. దీనిని సాధారణ టికెట్ తనిఖీగా పరిగణించరు. ఏదైనా రైల్వే పోలీసు అధికారి తప్పుగా జరిమానా అడిగితే, ప్రయాణికులు రైల్వే హెల్ప్లైన్ లేదా ఉన్నతాధికారులకు ఫిర్యాదు చేయవచ్చు.
టాప్ హెడ్ లైన్స్
ట్రెండింగ్ వార్తలు
