పిఎం కిసాన్ యోజన తదుపరి వాయిదా ఎప్పుడు రావచ్చు? ఎవరికి ప్రయోజనం లభిస్తుంది ? స్టాటస్‌ ఎలా చెక్‌ చేయాలి?

PM Kisan Yojana: నవంబర్ 2025లో పీఎం కిసాన్ 21వ విడత విడుదలయ్యే అవకాశం ఉంది. ఈకేవైసీ పూర్తి చేసిన, లబ్ధిదారుల జాబితాలో పేరున్న రైతులకు ఇది వర్తిస్తుంది.

పీఎం కిసాన్ 21వ వాయిదా

Source : ABPLIVE AI

PM Kisan Yojana: దేశవ్యాప్తంగా ఉన్న కోట్లాది మంది రైతులకు మరోసారి శుభవార్త రాబోతోంది. కేంద్ర ప్రభుత్వం ప్రతిష్టాత్మకంగా చేపట్టిన ప్రధాన మంత్రి కిసాన్ సమ్మాన్ నిధి యోజన కింద రైతులకు సంవత్సరానికి మూడుసార్లు ఆర్థిక సహాయం అందిస్తారు. అర్హులైన రైతుల బ్యాంకు ఖాతాలో ప్రతిసారీ 2,000 రూపాయల వాయిదా జమ చేస్తారు. ఈ విధంగా ప్రభుత్వం ప్రతి సంవత్సరం రైతులకు మొత్తం 6,000 రూపాయల సహాయం అందిస్తుంది. ఇప్పుడు రైతులు 21వ వాయిదా కోసం ఆసక్తిగా ఎదురు చూస్తున్నారు.

ముందుగా దీపావళికి ముందే రైతుల ఖాతాలో డబ్బులు జమ చేస్తారని చర్చ జరిగింది, కానీ ఇప్పుడు ప్రభుత్వం నవంబర్ 2025లో 21వ వాయిదా విడుదల చేయవచ్చని భావిస్తున్నారు. అయితే, ప్రభుత్వం ఇంకా అధికారికంగా ఎటువంటి తేదీని ప్రకటించలేదు. ప్రధాన మంత్రి కిసాన్ సమ్మాన్ నిధి యోజన 2019లో చిన్న, సన్నకారు రైతులకు ఆర్థిక సహాయం అందించడానికి ప్రారంభించిన పథకం. ఈ పథకం కింద కేంద్ర ప్రభుత్వం ఇప్పటికే రైతుల ఖాతాల్లో వేల కోట్ల రూపాయలను బదిలీ చేసింది.

ఎన్నిసార్లు డబ్బులు వస్తాయి?

కేంద్ర ప్రభుత్వం ప్రతి ఆర్థిక సంవత్సరంలో మూడుసార్లు 2,000 రూపాయల చొప్పున రైతుల ఖాతాల్లో నేరుగా జమ చేస్తుంది. ఈ వాయిదాలు సాధారణంగా ఏప్రిల్ నుంచి జూలై, ఆగస్టు నుంచి నవంబర్,  డిసెంబర్ నుంచి మార్చి మధ్యలో విడుదల చేస్తున్నారు. గత వాయిదా అంటే 20వ వాయిదా ఆగస్టు 2025లో వచ్చింది, ఇప్పుడు నవంబర్లో 21వ వాయిదా వచ్చే అవకాశం ఉంది. ఈ పథకం ప్రయోజనం ప్రధానమంత్రి కిసాన్ పోర్టల్ లబ్ధిదారుల జాబితాలో పేరు నమోదు చేసుకున్న, ఇ-కెవైసి (e-KYC) పూర్తి చేసిన రైతులకు మాత్రమే లభిస్తుంది. ఎవరైనా రైతు ఇ-కెవైసి అసంపూర్తిగా ఉంటే లేదా బ్యాంకు ఖాతాలో ఏదైనా తప్పు ఉంటే, వారికి డబ్బులు జమ అవ్వవు.

మీ స్టేటస్ ను ఇలా చెక్ చేయండి

ప్రధాన మంత్రి కిసాన్ సమ్మాన్ నిధి యోజన అధికారిక వెబ్‌సైట్ pmkisan.gov.in ని సందర్శించవచ్చు. వెబ్‌సైట్‌లో “Know Your Status” లేదా “Beneficiary Status” విభాగంలోకి వెళ్లి, రిజిస్ట్రేషన్ నంబర్ను నమోదు చేసి, క్యాప్చా కోడ్‌ను ఫిల్ చేయండి. దీని తరువాత, మీ వాయిదా వచ్చిందా లేదా అని స్క్రీన్‌పై కనిపిస్తుంది. ఒకవేళ రిజిస్ట్రేషన్ నంబర్ గుర్తులేకపోతే, వెబ్‌సైట్‌లోని “Know Your Registration Number” ఆప్షన్ ద్వారా దానిని తిరిగి పొందవచ్చు.