Independence Day 2023: స్వాతంత్ర్య దినోత్సవం అంటే మీకు గుర్తొచ్చే విషయాలు ఇవేనా
Independence Day 2023: ఆగస్టు 15 ప్రతి భారతీయుడికి పండుగే. దేశం మొత్తం జరుగుపుకునే పండుగ మాత్రం స్వాతంత్ర్య దినోత్సవం. ఎంతో మంది త్యాగాల ఫలితం ఈ రోజు మనం అనుభవిస్తున్న స్వతంత్రం.
Independence Day 2023: ఆగస్టు 15.. ఈ రోజు ప్రతి భారతీయుడికి పండుగే. దేశంలో హిందువులు దీపావళి, దసరా, వినాయక చవితి జరుపుకుంటారు. ముస్లింలు రంజాన్, బక్రీద్, మొహరం పండుగలు చేసుకుంటారు. క్రిస్టియన్లు క్రిస్మస్, గుడ్ ఫ్రైడే ప్రముఖంగా జరుపుకుంటారు. కానీ దేశం మొత్తం జరుగుపుకునే పండుగ మాత్రం స్వాతంత్ర్య దినోత్సవం. ఎంతో మంది త్యాగాల ఫలితం ఈ రోజు మనం అనుభవిస్తున్న స్వతంత్రం. బ్రిటీష్ సంకెళ్లను తెంచుకుని భారత మాత స్వేచ్ఛా వాయువులు పీల్చుకుంటూ స్వతంత్ర భారతావనిగా వెలసిన చారిత్రాత్మక రోజు. బ్రిటిష్ పాలనకు ముగింపు పలుకుతూ భారత దేశ చరిత్రలో కొత్త శకానికి నాంది పలికింది.
బ్రిటిష్ వలస పాలన నుంచి దేశానికి స్వాతంత్ర్యం పొందిన గుర్తుగా భారతదేశంలో ప్రతి సంవత్సరం ఆగస్టు 15వ తేదీన స్వాతంత్ర్య దినోత్సవాన్ని జరుపుకుంటారు. భారతదేశాన్ని 200 సంవత్సరాలకు పైగా బ్రిటిష్ ఆధిపత్యం ముగిసిన రోజు ప్రాముఖ్యతకు గుర్తింపుగా పండుగ జరుపుకుంటాం. స్వాతంత్ర్య పోరాటంలో ప్రముఖ రాజకీయ పార్టీ అయిన ఇండియన్ నేషనల్ కాంగ్రెస్ 1930 జనవరి 26లోనే సంపూర్ణ స్వాతంత్య్రాన్ని కోరింది. ఈ తేదీ తరువాత గణతంత్ర దినోత్సవంగా మారింది, ఆగస్టు 15 స్వాతంత్ర్య దినంగా స్వాతంత్ర్యదినంగా ఆవిర్భవించింది. ఆ రోజు భారతదేశానికి జాతీయ సెలవుదినం. ఎంతో మంది ప్రాణత్యాగాల ఫలితంగా దక్కిన స్వాతంత్ర్య దినోత్సవాన్ని దేశవ్యాప్తంగా ఎలా జరుపుకుంటారో చూడండి.
స్వాతంత్ర్య దినోత్సవం చరిత్ర
ఆగష్టు 15, 1947న భారతదేశం మొదటి ప్రధాన మంత్రి జవహర్‌లాల్ నెహ్రూ ఢిల్లీలోని ఎర్రకోటపై జాతీయ జెండాను ఎగురవేసి, భారతదేశాన్ని స్వతంత్ర దేశంగా అధికారికంగా ప్రకటించారు. మహాత్మా గాంధీ, సుభాష్ చంద్రబోస్, భగత్ సింగ్, అనేకమంది స్వాతంత్ర్య సమరయోధులు, అనేక మంది నాయకులు చేసిన అవిశ్రాంత పోరాటం, అహింసా ప్రతిఘటన, త్యాగాల ఫలితంగా స్వాతంత్ర్యం వచ్చింది.
స్వాతంత్ర్య దినోత్సవం ప్రాముఖ్యత
స్వయం పాలన, సార్వభౌమాధికారం, ప్రజాస్వామ్యం, కొత్త శకానికి ప్రతీకగా స్వాతంత్ర్య దినోత్సవం నిర్వహిస్తారు. ఇందులో ప్రతి భారతీయుడికి ఎంతో ప్రాముఖ్యత ఉంది. ఇది భారత్ భవిష్యత్తు, భారతీయ ప్రజల స్వేచ్ఛను సూచిస్తుంది.
ఆగస్టు 15న ఎందుకు జరుపుకుంటారు?
ఆగస్టు 15, 1947 భారత స్వాతంత్ర్య చట్టం అమలులోకి వచ్చిన తేదీ. ఈ చట్టం భారత ప్రజలచే ఎన్నుకోబడిన భారత రాజ్యాంగ సభకు శాసన సార్వభౌమాధికారాన్ని బదిలీ చేసింది. భారత స్వాతంత్ర్య చట్టం జూలై 18, 1947న బ్రిటీష్ పార్లమెంటుచే ఆమోదించబడింది. అనేక సంవత్సరాల పోరాటం ఫలితంగా భారతావనికి స్వాతంత్ర్యం కల్పిస్తూ ఈ చట్టం వచ్చింది. ఇది ఒక చారిత్రక ఘట్టం. బ్రిటిష్ పాలనకు ఇండియాలో ముగింపు పలుకుతూ దేశంలో కొత్త శకానికి నాంది పలికింది.
భారతదేశంలో స్వాతంత్ర్య దినోత్సవం వేడుకలు
స్వాతంత్ర్యదినం సందర్భంగా దేశవ్యాప్తంగా వేడుకలు జరుగుతాయి. పాఠశాలలు, ప్రభుత్వ కార్యాలయాలు, బహిరంగ ప్రదేశాలలో జాతీయ జెండాను ఎగురవేస్తారు. ప్రజలు సాంస్కృతిక కార్యక్రమాలు, కవాతులు, జెండా ఎగురవేత వేడుకలలో పాల్గొంటారు. ప్రధాన మంత్రి ఎర్రకోట నుంచి జాతిని ఉద్దేశించి ప్రసంగించారు, దేశం యొక్క పురోగతి మరియు లక్ష్యాలను ప్రతిబింబిస్తారు.
స్వాతంత్ర్య దినోత్సవం సందర్భగా గుర్తొచ్చే కొన్ని అంశాలు
- జెండా ఎరగవేయడం
- విద్యార్థులు, రక్షణ దళాల పరేడ్
- సాంస్కృతిక కార్యక్రమాలు
- నేతలు, ప్రముఖల ప్రసంగాలు
- స్వీట్లు, పండ్లు పంపిణీ
- దీపాలు వెలిగించడం
- దేశభక్తి గీతాలు ఆలపించడం
- దేశభక్తి సినిమాలు చూడడం
- కుటుంబం, స్నేహితులతో సమయం గడపడం
ప్రతి భారతీయుడికి స్వాతంత్ర్య దినోత్సవం ప్రత్యేకం. ఇది మన దేశం సాధించిన విజయాలకు గర్వించదగిన రోజు. మనమందరం ఈ రోజును ఆనందంగా గొప్పగా జరుపుకుందాం. మంచి భవిష్యత్తును నిర్మించడానికి కలిసి పని చేద్దాం.
టాప్ హెడ్ లైన్స్
ట్రెండింగ్ వార్తలు
