(Source: Poll of Polls)
Hemant Soren: జార్ఖండ్ సీఎంగా ప్రమాణస్వీకారం చేసిన హేమంత్ సోరెన్
Jharkhand CM Hemant Soren : హేమంత్ సోరెన్ గురువారం జార్ఖండ్ సీఎంగా ప్రమాణ స్వీకారం చేశారు. రాష్ట్రానికి 13వ ముఖ్యమంత్రి అయ్యారు. అంతకుముందు చంపై సోరెన్ సీఎం పదవికి రాజీనామా చేశారు.
Hemant Soren: జార్ఖండ్ ముక్తి మోర్చా (జేఎంఎం) నేత హేమంత్ సోరెన్ గురువారం సాయంత్రం సీఎంగా ప్రమాణ స్వీకారం చేశారు. రాష్ట్రానికి 13వ ముఖ్యమంత్రి అయ్యారు. అంతకుముందు చంపై సోరెన్ బుధవారం ముఖ్యమంత్రి పదవికి రాజీనామా చేశారు. ఆ తర్వాత జేఎంఎం నేత హేమంత్ సోరెన్ రాజ్‌భవన్‌లో గవర్నర్ సీపీ రాధాకృష్ణన్‌ను కలిసి ప్రభుత్వ ఏర్పాటుకు ఆహ్వానించారు. హేమంత్ సోరెన్ మూడోసారి జార్ఖండ్ సీఎం అయ్యారు. హేమంత్ సోరెన్ బుధవారం శాసనసభా పక్ష నేతగా ఎన్నికయ్యారు. బుధవారం గవర్నర్‌కు ఎమ్మెల్యేల మద్దతు లేఖను సమర్పించారు.
త్వరలో మంత్రివర్గ విస్తరణ
హేమంత్ సోరెన్ తండ్రి శిబు సోరెన్, ఆయన తల్లి, భార్య కల్పనా సోరెన్ కూడా ప్రమాణ స్వీకారం సమయంలో రాజ్ భవన్‌లో కనిపించారు. హేమంత్ సోరెన్ మాత్రమే సీఎంగా ప్రమాణం చేశారు. అయితే ఈ రోజు ఆయనతో ఏ ఎమ్మెల్యే కూడా మంత్రిగా ప్రమాణం చేయలేదు. త్వరలోనే మంత్రివర్గ విస్తరణ జరగనుందని విశ్వసనీయ వర్గాల సమాచారం. కొత్త కేబినెట్‌లో సీఎం సతీమణి కల్పనా సోరెన్‌కు చోటు దక్కే అవకాశాలున్నట్లు ఊహాగానాలు వినిపిస్తున్నాయి. జూలై 7న హేమంత్ ముఖ్యమంత్రిగా ప్రమాణ స్వీకారం చేస్తారని అంతకుముందు ప్రచారం జరిగింది. రాంచీలోని చంపై సోరెన్ నివాసంలో జరిగిన సమావేశంలో అధికార కూటమి నాయకులు, ఎమ్మెల్యేలు జార్ఖండ్ ముక్తి మోర్చా లెజిస్లేచర్ పార్టీ నాయకుడిగా హేమంత్ సోరెన్‌ను ఏకగ్రీవంగా ఎన్నుకున్నారు.
హేమంత్‌కు అనుకూలంగా కూటమి నిర్ణయం
తన రాజీనామాను గవర్నర్‌కు సమర్పించిన అనంతరం చంపై సోరెన్ మాట్లాడుతూ, “జేఎంఎం నేతృత్వంలోని కూటమి నిర్ణయం మేరకు నేను రాజీనామా చేశాను. రాష్ట్రంలో మా కూటమి బలంగా ఉంది. హేమంత్‌కు ఏమి జరిగిందో అందరికీ తెలుసు. ఆయన నిష్క్రమణ తర్వాత కూటమి భాగస్వామ్య పక్షాలు నాకు రాష్ట్ర బాధ్యతలు అప్పగించాయి. ఇప్పుడు కూటమి హేమంత్ సోరెన్‌కు అనుకూలంగా నిర్ణయం తీసుకుంది” అన్నారు.
అన్ని లాంఛనాలు పూర్తి
రాష్ట్రంలో కొత్త ప్రభుత్వ ఏర్పాటుకు సంబంధించిన అన్ని లాంఛనాలు పూర్తయ్యాయని హేమంత్ సోరెన్ తెలిపారు. ప్రమాణస్వీకారం గురించి జేఎంఎం వర్కింగ్ ప్రెసిడెంట్‌ని ప్రశ్నించగా ఎందుకు జరిగిందో అన్నీ త్వరలో చెబుతామని చెప్పారు. జార్ఖండ్ ముఖ్యమంత్రిగా హేమంత్ మూడోసారి ప్రమాణ స్వీకారం చేశారు.
గత నెల 28న విడుదల
చంపై సోరెన్, హేమంత్ సోరెన్‌లతో పాటు గవర్నర్‌ను కలిసిన రాష్ట్ర అధికార కూటమి ప్రతినిధి బృందంలో కాంగ్రెస్ రాష్ట్రాధ్యక్షుడు రాజేష్ ఠాకూర్, రాష్ట్ర ఇన్‌ఛార్జ్ గులాం అహ్మద్ మీర్, రాష్ట్రీయ జనతాదళ్ (ఆర్‌జేడీ) నాయకుడు, మంత్రి సత్యానంద్ భోక్తా, సీపీఐ(ఎంఎల్) ఎమ్మెల్యే వినోద్ సింగ్ కూడా పాల్గొన్నారు. భూ కుంభకోణానికి సంబంధించిన మనీలాండరింగ్ కేసులో హైకోర్టు బెయిల్ మంజూరు చేయడంతో గత నెల జూన్ 28న హేమంత్ సోరెన్ జైలు నుంచి విడుదలయ్యారు. దాదాపు 5 నెలల పాటు జైలులోనే ఉన్నాడు. జనవరి 31న అరెస్టు కాకముందే హేమంత్ సీఎం పదవికి రాజీనామా చేశారు. మరి కొన్ని నెలల్లో (నవంబర్-డిసెంబర్) ఇక్కడ అసెంబ్లీ ఎన్నికలు జరగనున్న తరుణంలో హేమంత్ మళ్లీ రాష్ట్ర బాధ్యతలు చేపట్టారు.
టాప్ హెడ్ లైన్స్
ట్రెండింగ్ వార్తలు
