BRAT డైట్ అంటే ఏంటి? బరువు తగ్గేందుకు ఇది పాటించవచ్చా?

పిల్లలకి పొట్టలో ఎటువంటి సమస్య ఉన్నా ఈ బ్రాట్ డైట్ ఆహారం పెడితే ఆరోగ్యంగా ఉంటారని ఆరోగ్య నిపుణులు సూచిస్తున్నారు.

Image Credit: Pixabay

పిల్లల ఆరోగ్యం మీద తల్లిదండ్రులు చాలా శ్రద్ధగా ఉండాలి. వారికి కడుపులో అసౌకర్యంగా ఉన్నా, మలబద్ధకం సమస్య, డయేరియా వంటి సమస్యలు ఉంటే తల్లిదండ్రులు పాటించే డైట్ బ్రాట్(BRAT). పిల్లలు అనారోగ్యాల బారిన పడితే ఎక్కువ మంది బ్రాట్ డైట్ సిఫార్సు చేస్తారు. అసలు ఏంటి ఈ బ్రాట్ డైట్? ఇది పాటించడం వల్ల ఆరోగ్యంగా ఉంటారా? ఎన్ని రోజులు పాటించాలి అనే దాని గురించి తెలుసుకుందాం.

బ్రాట్ అంటే ఏంటి?

BRAT అంటే అరటిపండు(Banana), అన్నం(Rice), యాపిల్ సాస్(Apple Sauce), టోస్ట్(Toast). ఇది చప్పగా ఉండే ఆహారం. కడుపు సమస్యల నుంచి ఉపశమనం పొందేందుకు ఈ బ్రాట్ డైట్ ఫాలో అవుతారు. విరోచనాలు అయినప్పుడు ఎక్కువగా దీన్ని ఫాలో అవుతారు. ఎన్నో దశాబ్దాలుగా ప్రజాదరణ పొందిన ఆహారం ఇది. అయితే ఇది ఎక్కువ రోజులు తీసుకోవడం చాలా కష్టం. అది చప్పగా ఉండటమే కారణం.

ఈ ఆహారంలో ఫైబర్ తక్కువగా ఉంటుంది. పొట్టకి సున్నితంగా ఉంటుంది. ఎందుకంటే ఈ ఆహారంలో చేర్చిన పదార్థాల్లో కొవ్వులు, ప్రోటీన్లు తక్కువగా ఉంటాయి. ఇవి పొట్ట మీద ఎక్కువగా భారం వేయలేవు. ఇది తీసుకోవడం వల్ల పొట్టలో ఎటువంటి చికాకు లక్షణాలు ఉండవు. అంతే కాదు ఈ బ్రాట్ ఆహారం వికారాన్ని తగ్గిస్తుందని డైటీషియన్లు చెప్తున్నారు.

బ్రాట్ లో వీటిని కూడా చేర్చుకోవచ్చు?

కేవలం నాలుగు పదార్థాలతో ఉండే ఈ డైట్ బోరింగ్ ఉంటుంది. అందుకే వాటిలో ఈ ఆహార పదార్థాలు కూడా జోడించుకోవచ్చు. పెరుగు కలుపుకోవడం వల్ల ప్రోబయాటిక్స్ అందుతాయి. ఇవి గట్ ఆరోగ్యాన్ని కాపాడతాయి. డయేరియా లక్షణాల నుంచి ఉపశమనం పొందడంలో సహాయపడతాయి. ఉడికించిన బంగాళాదుంపలు, ఉడికించిన క్యారెట్లు, పుచ్చకాయ, యాపిల్ జ్యూస్, కొబ్బరి నీళ్ళు కూడా బ్రాట్ డైట్ లో తీసుకోవచ్చు.

పెద్దవాళ్ళు ఈ డైట్ ఫాలో అవొచ్చా?

ఇది ఎక్కువగా పిల్లలు అనారోగ్యానికి గురైనప్పుడు పాటిస్తారు. పెద్దలు కూడా వాంతులు, విరోచనాలతో బాధపడుతున్నప్పుడు బ్రాట్ డైట్ ని అనుసరించవచ్చు. అయితే విటమిన్లు, ఇతర పోషకాలు లేని కారణంగా ఈ ఆహారాన్ని దీర్ఘకాలం పాటు అనుసరించకూడదు. పౌష్టికాహార లోపాన్ని నివారించడానికి సాధారణ ఆహారం తీసుకోవాలని నిపుణులు హెచ్చరిస్తున్నారు.

ఎన్ని రోజులు పాటించాలి?

అతిసారంతో బాధపడుతున్న పిల్లలకి ఈ డైట్ ఎక్కువ రోజులు పాటించడం మంచిది కూడా కాదని ఆరోగ్య నిపుణుల భావన. ఎందుకంటే ఇందులో ఫైబర్, పోషకాలు, ప్రోటీన్స్ తక్కువగా ఉంటాయి. అయితే అప్పుడప్పుడు బ్రాట్ డైట్ ఫాలో అవడం పెద్దలు, పిల్లలకి మంచిదే. బ్రాట్ ఆహారం ఒకటి లేదా రెండు రోజులు మాత్రమే పాటించడం ఉత్తమం. బరువు తగ్గడం కోసం కొంతమంది ఈ డైట్ ఫాలో అవుతూ ఉంటారు. కానీ అది ఆరోగ్యానికి ఎంత మాత్రం మంచిది కాదని పోషకాహార నిపుణులు సూచిస్తున్నారు. అందులో కాల్షియం, విటమిన్ బి 12, ప్రోటీన్, ఫైబర్ వంటి ముఖ్యమైన పోషకాలు బ్రాట్ ఆహారంలో ఉండవు. అందుకే ఎక్కువ రోజులు కొనసాగించడం మంచిది కాదు.

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.