Thief Cooks Khichdi: కిచిడి వండాడు.. అరెస్టయ్యాడు, అదే ఈ కథలో ట్విస్ట్!

ఇతగాడేమైనా ‘క్లవర్’ అనుకుంటున్నారా? పెద్ద ‘ఫ్లవరు’. ఎందుకంటే.. వచ్చిన పని చూసుకోకుండా కిచిడీ వండుతూ అడ్డంగా దొరికిపోయాడు.

Representational Image/Pexels

అదేంటీ కిచిడి వండితేనే అరెస్టు చేసేస్తారా? ఇదెక్కడి న్యాయమండి అనేగా మీ ప్రశ్న. ఆగండి.. ఆగండి.. అతడు కిచిడి వండింది.. తన కిచెన్‌లో కాదు. మరొకరి ఇంట్లో. వాళ్లింట్లో గ్యాస్ అయిపోతే.. వెళ్లి ఉంటాడు. దానికే అరెస్టు చేసేస్తారా? అనేగా మీ తర్వాతి ప్రశ్న? అది కూడా కానే కాదు. అతడు తాళం వేసి ఉన్న ఇంటికి కన్నం వేసిన దొంగ. ఖరీదైన వస్తువులన్నీ మూట కట్టేసరికి బాగా ఆకలి వేసిందో ఏమో. దర్జాగా కిచెన్‌లోకి వెళ్లి కిచిడీ చేసుకుని తిన్నాడు. ఇంతలో పోలీసులు వచ్చి.. వేడి వేడిగా వడ్డించారు. కిచెన్ నుంచి నేరుగా కటకటాల్లోకి తోశారు. 

ఈ ఘటన అస్సాంలోని గౌహతీలో చోటుచేసుకుంది. అస్సాం పోలీసులు తాజాగా చేసిన ట్వీటు సోషల్ మీడియాలో వైరల్‌గా చక్కర్లు కొడుతోంది. ఓ దొంగ తాళం వేసి ఉన్న ఇంటికి కన్నం వేశాడు. ఆ తర్వాత ఇంట్లోని ఖరీదైన వస్తువులన్నీ మూట కట్టాడు. ఆ తర్వాత.. కిచెన్‌లోకి వెళ్లి తినడానికి ఏమైనా ఉంటుందేమోనని వెతికాడు. ఏమీ కనిపించకపోవడంతో.. తానే ఏదైనా వండుకుని తిందామని అనుకున్నాడు. కిచెన్‌లో గిన్నెల శబ్దాలు విన్న.. పొరిగింటివారికి ఏదో అనుమానం కలిగింది. వెంటనే ఆ ఇంటి యజమానికి కాల్ చేసి.. వచ్చేశారా అని అడిగారు. ఇంకా ఇంటికి రాలేదనే సమాధానం రావడంతో వెంటనే పోలీసులకు సమాచారం ఇచ్చారు. పోలీసులు అక్కడికి వచ్చేసరికి.. స్థానికులంతా ఇంటిని చుట్టుముట్టి దొంగను పట్టుకున్నారు. అనంతరం పోలీసులకు అప్పగించారు. పోలీసులు చేసిన ట్వీట్ సోషల్ మీడియాలో వైరల్‌గా చక్కర్లు కొడుతోంది. అతడి ఆకలే అతడిని అడ్డంగా పట్టించిందని పోలీసులు అంటున్నారు.

The curious case of a cereal burglar!

Despite its many health benefits, turns out, cooking Khichdi during a burglary attempt can be injurious to your well being.

The burglar has been arrested and @GuwahatiPol is serving him some hot meals. pic.twitter.com/ehLKIgqcZr

— Assam Police (@assampolice) January 11, 2022

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి