Nonveg Storage Guide : మాంసాన్ని ఎంతకాలం నిల్వ చేయవచ్చు? చికెన్, మటన్ కుళ్లిపోవడానికి ఎన్ని రోజులు పడుతుంది?
Tips to Store Meat Properly : మటన్ లేదా కోడి మాంసాన్ని ఎంతకాలం నిల్వ చేయవచ్చు? అది పాడవ్వడం ప్రారంభం కావడానికి ఎన్ని రోజులు పడుతుంది? అసలు మీట్ని ఎలా స్టోర్ చేస్తే మంచిదో చూసేద్దాం.
- మాంసం నిల్వలో లోపాలు బ్యాక్టీరియా పెంచి, ఆరోగ్యం పాడు చేస్తాయి.
- గది ఉష్ణోగ్రతలో గంటలు, ఫ్రిడ్జ్లో 3-5 రోజులు మాత్రమే నిల్వ చేయాలి.
- ఫ్రీజర్లో సరైన ప్యాకింగ్తో నిల్వ, డీఫ్రాస్టింగ్ పద్ధతులు ముఖ్యం.
Chicken, Mutton and Fish Storage Timelines : చికెన్, మటన్ వంటి మాంసాహార పదార్థాలు చాలా మంది ఇష్టంగా తింటారు. అయితే వీటిని కొనుగోలు చేసిన తర్వాత ఎంతకాలం నిల్వ ఉంచవచ్చు? ఎప్పుడు అవి కుళ్లిపోవడం స్టార్ట్ అవుతాయి. ఇలాంటి విషయాలు తెలియక చాలామంది వాటిని వండుకుని తిని.. ఆరోగ్య సమస్యలను ఎదుర్కొంటుంటారు. అలాగే సరైన విధంగా నిల్వ చేయకపోతే మాంసంలో బ్యాక్టీరియా వేగంగా పెరిగి.. ఫుడ్ పాయిజనింగ్కు కారణమవుతుంది. అందుకే మాంసాన్ని ఎంతకాలం, ఎలా భద్రపరచాలో తెలుసుకోవడం చాలా ముఖ్యం.
బయట ఎంతసేపు ఉంచాలి?
చికెన్ లేదా మటన్ను గది ఉష్ణోగ్రతలో ఎక్కువసేపు ఉంచకూడదు. సాధారణంగా వండకుండా ఉంచిన మాంసాన్ని 2 గంటలకు మించి బయట ఉంచితే బ్యాక్టీరియా పెరగడం ప్రారంభమవుతుంది. వేసవిలో లేదా ఉష్ణోగ్రత 32 డిగ్రీల సెల్సియస్ కంటే ఎక్కువగా ఉన్నప్పుడు కేవలం 1 గంటలోనే అవి పాడయ్యే ప్రమాదం ఉంటుంది.
ఎక్కువ కాలం నిల్వ చేయాలంటే..
మాంసాన్ని ఎక్కువ కాలం నిల్వ చేయడానికి ఉత్తమ మార్గం దానిని ఫ్రీజర్లో భద్రపరచడం. అమెరికా వ్యవసాయ శాఖ ప్రకారం.. -18°C లేదా అంతకంటే తక్కువ ఉష్ణోగ్రత వద్ద నిల్వ చేసిన మాంసం ఎక్కువ కాలం నిల్వ ఉంటుంది. ఎందుకంటే ఈ ఉష్ణోగ్రత వద్ద బ్యాక్టీరియా, ఇతర సూక్ష్మజీవులు నిర్వీర్యమవుతాయి. అయితే కాలక్రమేణా దాని రుచి, నాణ్యత క్షీణించవచ్చు.
ఫ్రీజర్లో ఎన్ని రోజులు ఉంచవచ్చు..
మాంసం గడ్డకట్టడం వల్ల దానిని స్టోర్ చేసే కాలం గణనీయంగా పెరుగుతుంది. ఫుడ్ అండ్ డ్రగ్ అడ్మినిస్ట్రేషన్ ప్రకారం.. చికెన్ను సుమారు ఒక సంవత్సరం వరకు గడ్డకట్టించవచ్చు. వివిధ రకాల చేపలను 2 నుంచి 8 నెలల వరకు గడ్డకట్టించి స్టోర్ చేయవచ్చు. అయితే దాని రుచి, నాణ్యత కోసం వాటిని నిర్దేశించిన కాలపరిమితిలోనే ఉపయోగించాలని ఆహార నిపుణులు సిఫార్సు చేస్తున్నారు.
ఫ్రీజర్లో మాంసాన్ని ఎలా నిల్వ చేయాలంటే..
మాంసాన్ని గడ్డకట్టించే ముందు దానిని సరిగ్గా ప్యాక్ చేయడం చాలా ముఖ్యం. అసలు ప్యాకేజింగ్పై ప్లాస్టిక్ ర్యాప్ లేదా ఫాయిల్ వంటి లేయర్ వేసి ప్యాక్ చేయడం వల్ల తేమ బయటకు పోకుండా నిరోధించవచ్చని, మాంసం ఎక్కువ కాలం తాజాగా ఉంటుందని నిపుణులు చెబుతున్నారు.
మాంసాన్ని ఎంత తాజాగా గడ్డకట్టిస్తే, దాని నాణ్యత అంత మెరుగ్గా ఉంటుంది. డీఫ్రాస్ట్ చేసే పద్ధతి కూడా అంతే ముఖ్యం. గడ్డకట్టిన మాంసాన్ని గది ఉష్ణోగ్రతలో ఉంచి కరిగించడం సురక్షితం కాదు. దానిని రిఫ్రిజిరేటర్లో గానీ, చల్లటి నీటితో నింపిన మూసివున్న పాత్రలో గానీ, లేదా మైక్రోవేవ్ను ఉపయోగించి గానీ కరిగించాలి. సరిగ్గా కరిగించకపోయినా బ్యాక్టీరియా వేగంగా పెరుగుతుంది.
ఫ్రిడ్జ్లో నిల్వ చేయాలంటే..
మీరు పచ్చి మాంసాన్ని ఫ్రిడ్జ్లో ఉంచాలనకుంటే.. ఎక్కువ కాలం నిల్వ ఉంచలేరు. యుఎస్ వ్యవసాయ శాఖ, ఆహార-ఔషధ పరిపాలన సంస్థ మార్గదర్శకాల ప్రకారం.. చాలా రకాల పచ్చి మాంసాలు రిఫ్రిజిరేటర్లో కేవలం 3 నుంచి 5 రోజుల వరకు మాత్రమే సురక్షితంగా ఉంటాయి. ముక్కలుగా కోసిన లేదా కీమా చేసిన మాంసాన్ని రిఫ్రిజిరేటర్లో 1 నుంచి 2 రోజులు మాత్రమే ఉంచాలి. ఆ తర్వాత.. అది పాడయ్యే ప్రమాదం పెరుగుతుంది.
అలాగే చికెన్, ఇతర పౌల్ట్రీ ఉత్పత్తులను తక్కువ కాలం మాత్రమే స్టోర్ చేయాలి. పచ్చి చికెన్ రిఫ్రిజిరేటర్లో కేవలం 1 నుంచి 2 రోజుల వరకు ఉంచితే దానిని సురక్షితంగా పరిగణిస్తారు. ఒకవేళ చికెన్ను వండినట్లయితే.. దానిని 3 నుంచి 4 రోజులలోపు ఉపయోగించాలి. దానిని ఎక్కువ కాలం నిల్వ ఉంచడం వల్ల బ్యాక్టీరియా పెరిగే ప్రమాదం పెరుగుతుంది.
Before You Go
Simple Yoga for Body Fat | చెడు కొవ్వును సింపుల్ యోగాసనాలతో దూరం చేయండి
టాప్ హెడ్ లైన్స్
ట్రెండింగ్ వార్తలు
