Kids Diet : మఫిన్స్​ను ఇలా చేసి పెడితే పిల్లల ఆరోగ్యానికి ఎంతో మంచిది.. రెసిపీ చాలా సింపుల్

Healthy Food for Kids : పిల్లలు, పెద్దలు హెల్తీగా, టేస్టీగా, స్పెషల్​గా ఏమైనా తినాలనుకుంటే మీరు ఆదివారం రోజు స్పెషల్​గా క్యారెట్ మఫిన్స్ చేయవచ్చు. వీటిని తయారు చేయడం చాలా సులభం.

క్యారెట్ మఫిన్స్ (Image Source : Unsplash)

Carrot Muffins : పిల్లల ఆరోగ్యం కోసం వారికి హెల్తీ ఫుడ్​ని పెట్టాలనుకుంటారు. కానీ వారికి అవి నచ్చవు. అలాంటప్పుడు పిల్లలకు నచ్చే విధంగా హెల్తీ ఫుడ్​ని తయారు చేయవచ్చు. అలాంటి హెల్తీ రెసిపీనే క్యారెట్ మఫిన్లు. ఇవి పిల్లల్లో రోగనిరోధక శక్తిని పెంచే సూపర్​ ఫుడ్​గా పనిచేస్తాయి. అంతేకాకుండా ఇవి చాలా రుచికరంగా ఉండడం వల్ల పిల్లలు చాలా ఇష్టంగా తింటారు. మరి వీటి వల్ల కలిగే ఆరోగ్య ప్రయోజనాలు ఏమిటో? వాటిని ఎలా తయారు చేయాలో? కావాల్సిన పదార్థాలు ఏమిటో ఇప్పుడు తెలుసుకుందాం. 

కావాల్సిన పదార్థాలు

క్యారెట్స్ - 5

కన్డెన్స్డ్​ మిల్క్ - 60 మి.లీ

పాల పొడి - 20 గ్రాములు

డ్రై ఫ్రూట్స్ - రుచికి తగినంత

పాలు - పావు కప్పు

తయారీ విధానం 

ముందుగా క్యారెట్స్​ బాగా కడిగి పైన లేయర్​ను పీల్ చేయాలి. ఇప్పుడు క్యారెట్స్​ను బాగా సన్నగా తురుముకోవాలి. ఈ కొలతలకు సరిపడాలంటే రెండు కప్పుల క్యారెట్ తురుము ఉండేలా చూసుకోండి. ఇప్పుడు స్టౌవ్ వెలిగించి దానిపై​ నాన్​స్టిక్ పాన్ ఉంచండి. అది వేడి అయిన తర్వాత దానిలో క్యారెట్ తురుము వేయండి. తురుములోని తేమ ఆవిరైపోయే వరకు క్యారెట్​ను వేయించండి. క్యారెట్​లోని తేమ పోయే వరకు స్టౌవ్ దగ్గరే ఉండి వేయించండి. లేదంటే మాడిపోయే ప్రమాదముంది. 

క్యారెట్​లోని తేమ ఆవిరైపోయాక అందులో పాలు వేయండి. పాలల్లో క్యారెట్ మెత్తబడేవరకు మూత పెట్టి ఉడికించండి. అనంతరం పాల పొడి కూడా వేసి బాగా ఉడికించాలి. ఇప్పుడు దానిలో కండెన్స్​డ్ మిల్క్​ వేయండి. క్యారెట్ మిశ్రమం మందపాటిగా అయ్యేవరకు బాగా కలపాలి. ఇప్పుడు స్టౌవ్ ఆపేసి.. దానిని చల్లారనివ్వండి. మఫిన్ మౌల్డ్​ తీసుకుని దానికి బటర్ అప్లై చేయండి. బటర్ అందుబాటులో లేకుంటే గోధుమపిండిని కూడా వేయొచ్చు. ఇది మఫిన్స్​ మోల్డ్ స్టిక్​ కాకుండా చేస్తుంది. 

చల్లారిన క్యారెట్ మిశ్రమాన్ని మఫిన్ మౌల్డ్స్​లో సగం వరకు పోయాలి. ఓవెన్​ను180 డిగ్రీల సెల్సియస్ వద్ద 5 నిమిషాలు ప్రీ హీట్ చేయండి. అనంతరం మౌల్డ్స్​ను ఓవెన్​లో ఉంచి 170 డిగ్రీల వద్ద 10 నిమిషాలు బేక్ చేయండి. వాటిని బయటకు తీసి ఓ ప్లేట్​లోకి మార్చండి. అంతే హెల్తీ, టేస్టీ క్యారెట్ మఫిన్స్ రెడీ. వీటిని మీరు డ్రై ఫ్రూట్స్ గార్నిష్ చేయవచ్చు. వీటిని పిల్లలు చాలా ఇష్టంగా తింటారు. పిల్లలకు హెల్తీ స్నాక్ పెట్టాలనుకుంటే ఇది చాలా మంచి ఎంపిక. ఎందుకంటే క్యారెట్ మఫిన్స్​ వల్ల ఆరోగ్యానికి ప్రయోజనాలు కూడా అందుతాయి. 

క్యారెట్​లో బీటా కెరోటిన్, విటమిన్ ఎ, ఫైబర్, యాంటీ ఆక్సిడెంట్స్ పుష్కలంగా ఉంటాయి. ఇవి రోగనిరోధక శక్తిని, కంటి చూపును మెరుగుపరుస్తాయి. అంతేకాకుండా వైరల్ ఇన్ఫెక్షన్ల నుంచి పిల్లలను రక్షిస్తాయి. గొంతునొప్పి, జలుబు, ఇన్​ఫ్లూఎంజా వంటి వంటి ఆరోగ్య సమస్యలు రాకుండా శరీరానికి పోషకాలు అందిస్తాయి. పిల్లలు మఫిన్స్ వంటి వాటిని ఇష్టంగా తింటారు కాబట్టి హెల్తీ ఫుడ్​గా వీటిని మీరు వారికోసం తయారు చేసి తినిపించవచ్చు. అయితే వీటిని పిల్లలే కాదు.. పెద్దలు కూడా హెల్తీ స్నాక్​గా తీసుకోవచ్చు. 

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.