SBI Clerk Notification 2026:ఎస్సీ, ఎస్టీ, బీసీల కోసమే SBI క్లర్క్ నోటిఫికేషన్! అర్హతలు, దరఖాస్తు విధానం పూర్తి వివరాలు ఇవే!

SBI Clerk Notification 2026:స్టేట్ బ్యాంక్ ఆఫ్ ఇండియా 15వందల క్లర్క్ పోస్టులకు నోటిఫికేషన్ విడుదల చేసింది. ఇది కేవలం ఎస్సీ, ఎస్టీ, బీసీ అభ్యర్థుల కోసమే నియామక ప్రక్రియ చేపట్టింది. 

ఎస్సీ, ఎస్టీ, బీసీల కోసమే SBI క్లర్క్ నోటిఫికేషన్! అర్హతలు, దరఖాస్తు విధానం పూర్తి వివరాలు ఇవే!

Source : freepik

Show Quick Read

Key points generated by AI, verified by newsroom

• ఎస్‌బీఐ 1538 జూనియర్ అసోసియేట్ బ్యాక్‌లాగ్ పోస్టుల భర్తీకి ప్రకటన.
• ఎస్సీ, ఎస్టీ, ఓబీసీ వర్గాలకు మాత్రమే; డిగ్రీ, వయోపరిమితి అర్హతలు.
• ప్రిలిమ్స్, మెయిన్స్ ఎంపిక విధానం; నవంబర్ 27 చివరి దరఖాస్తు తేదీ.

SBI Clerk Notification 2026:బ్యాంకింగ్‌ రంగంలో కెరీర్‌ ప్రారంభించాలని ఆశిస్తున్న రిజర్వుడ్‌ కేటగిరీ అభ్యర్థులకు దేశంలోనే అతి పెద్ద ప్రభుత్వం రంగ బ్యాంక్, స్టేట్ బ్యాంక్ ఆఫ్ ఇండియా తీపి కబురు చెప్పింది. జూనియర్ అసోసియేట్‌ విభాగంలో ఖాళీగా ఉన్న 1538 బ్యాక్ లాగ్ పోస్టుల భర్తీకి ప్రత్యేక నియామక ప్రక్రియను ప్రారంభించింది. 

సాధారణంగా బ్యాంక్ నోటిఫికేషన్లలో అన్ని వర్గాలకు పోస్టులు ఉంటాయి, కానీ ఈ నోటిఫికేషన్ ప్రత్యేకత ఏంటంటే, ఇది కేవలం ఎస్సీ, ఎస్టీ, ఓబీసీ వర్గాలకు చెందిన బ్యాక్‌లాగ్ పోస్టుల భర్తీ చేయడానికి ఉద్దేశించింది. జనరల్‌ లేదా ఈడబ్ల్యూఎస్ అభ్యర్థులు ఈ పోస్టులకు దరఖాస్తు చేసుకోవడానికి అవకాశం లేదు. తక్కువ పోటీతో భారత్‌లోనే అత్యంత విశ్వసనీయమైన బ్యాంకులో ఉద్యోగం సాధించేందుకు ఇదొక మంచి అవకాశం. 

దేశవ్యాప్తంగా మొత్తం 1538 పోస్టులు ఉండగా, కేటగిరీల వారీగా విభజన చూస్తే ఎస్సీలకు 1219 పోస్టులు, ఎస్సీలు 207 పోస్టులు, ఓబీసీలకు 112 పోస్టులు కేటాయించారు. 

తెలుగు రాష్ట్రాల్లో పరిస్థితి

తెలుగు రాష్ట్రాల్లోని అభ్యర్థులకు కూడా ఈ నోటిఫికేషన్ ద్వారా లబ్ధి చేకూరనుంది. ఆంధ్రప్రదేశ్‌లో మొత్తం 88 పోస్టులు ఉన్నాయి. ఇవన్నీ పూర్తిగా ఎస్సీ కేటగిరీ అభ్యర్థులకు మాత్రమే కేటాయించారు. తెలంగాణలో 32 పోస్టులు ఉన్నాయి. ఇవి కూడా పూర్తిగా ఎస్టీ వర్గానికి కేటాయించారు. అంతేకాకుండా గుజరాత్‌ 289, మహారాష్ట్ర 165 వంటి రాష్ట్రాల్లో కూడా భారీగా ఖాళీలు ఉన్నాయి. 

అర్హతలు- వయోపరిమితి 

అభ్యర్థులు ఏదైనా గుర్తింపు పొందిన విశ్వవిద్యాలయం నుంచి డిగ్రీ పూర్తి చేసి ఉండాలి. ప్రస్తుతం డిగ్రీ చివరి సంవత్సరం చదువుతున్న వారు కూడా దరఖాస్తు చేసుకోవచ్చు. కానీ వారు డిసెంబర్ 31, 2026 నాటికి ఉత్తీర్ణత పత్రాన్ని సమర్పించాల్సి ఉంటుంది. ఏప్రిల్ 2026 నాటికి అభ్యర్థుల వయసు 20 నుంచి 28 సంవత్సరాల మధ్య ఉండాలి. అయితే ప్రభుత్వ నిబంధనల ప్రకారం వయో సడలింపు వర్తిస్తాయి. ఎస్సీ, ఎస్టీ అభ్యర్థులు ఐదేళ్ల సడలింపు ఉంది. గరిష్టంగా ౩౩ ఏళ్ల వరకు  దరఖాస్తు చేసుకోవచ్చు. OBC అభ్యర్థులకు 3ఏళ్లు సడలింపు ఉంటుంది. 31 ఏళ్ల వరకు దరఖాస్తు చేసుకోవచ్చు. దివ్యాంగులకు కేటగిరీని బట్టి 13 ఏళ్ల నుంచి 15 ఏళ్ల వరకు సడలింపు ఉంటుంది. 

ఎంపిక విధానం ఎలా ఉంటుంది?

ఎస్‌బీఐ క్లర్క్‌ ఎంపికలో ఎలాంటి ఇంటర్వ్యూ ఉండదు. మూడు దశల ద్వారా అభ్యర్థులను ఎంపిక చేస్తారు. మొదటి దశలో వంద మార్కులు ప్రిలిమ్స్ ఉంటుంది. ఇందులో ఇంగ్లీష్, న్యూమరికల్ ఎబిలిటీ, రీజనింగ్ అంశాల నుంచి ప్రశ్నలు వస్తాయి. ప్రతి తప్పు సమాధానానికి 0.25 మార్క్‌లు కట్ చేస్తారు. నాలుగు తప్పులకు ఒక మార్కు పోతుంది. 

రెండో దశలో మెయిన్స్‌ పరీక్ష 200 మార్కులకు ఉంటుంది. ప్రిలిమ్స్‌లో అర్హత సాధించిన వారిని 1:10 నిష్పత్తిలో మెయిన్స్‌కు పిలుస్తారు. ఇందులో జనరల్ అవేర్‌నెస్, ఇంగ్లీష్‌ క్వాంటేటివ్ ఆప్టిట్యూడ్‌, రీజనింగ్ అండ్ కంప్యూటర్‌ అంశాలు ఉంటాయి. దీనికి 2 గంటల 40 నిమిషాల సమయం కేటాయిస్తారు. 

స్థానిక భాషా పరీక్ష మూడో దశలో ఉంటుంది. అభ్యర్థులు తాము దరఖాస్తు చేసుకున్న రాష్ట్ర భాషను చదవడం రాయడం, మాట్లాడటం తెలిసి ఉండాలి. పది లేదా 12వ తరగతిలో ఆ భాషను చదివి ఉంటే ఈ పరీక్ష అవసరం లేదు. 

జీతం- ఇతర ప్రయోజనాలు 

ఎస్‌బీఐలో జూనియర్‌ అసోసియేట్‌గా చేరిన వారికి ఆకర్షణీయమైన వేతనం అందుతుంది. మెట్రో నగరాల్లో చేరిన వారికి నెలకు దాదాపు 37వేల నుంచి 42 వేల వరకు గ్రాస్ శాలరీ అందుతుంది. దీంతోపాటు డీఏ, హెచ్‌ఆర్‌ఏ, మెడికల్ ఇన్సూరెన్స్‌ సదుపాయాలు ఉంటాయి. పదోన్నతుల ద్వారా వేగంగా ఆఫీసర్ స్థాయికి చేరుకోవచ్చు. 

దరఖాస్తు ప్రక్రియ 

దరఖాస్తులు ఇప్పటికే ప్రారంభమయ్యాయి. శుక్రవారం నుంచి దరఖాస్తులు స్వీకరిస్తున్నారు. ఈనెల 27వ తేదీ వరకు దరఖాస్తు స్వీకరిస్తారు. ఎస్సీ, ఎస్టీ, దివ్యాంగులు ఫీజులు చెల్లించాల్సిన పని లేదు. ఓబీసీ అభ్యర్థులు 750 రూపాయలు చెల్లించాలి. 

అభ్యర్థులు sbi.bank/careers వెబ్సైట్ ద్వారా ఆన్‌లైన్‌లో రిజిస్టర్ చేసుకోవాలి. ఫొటో, సంతకం, ఎడమచేతి బొటనవేలి ముద్రను స్కాన్ చేసి అప్‌లోడ్ చేయాలి.